2014
Kauta mai na Veivakalougatataki ni Matabete ki na Nomu Vuvale
Epereli 2014

Kauta mai na Veivakalougatataki ni Matabete ki na Nomu Vuvale

Mai vei Bonnie L. Oscarson

Peresitedi Raraba ni Goneyalewa

iVakatakilakila
Bonnie L. Oscarson

Ni o maroroya na nomu veiyalayalati, o sa na kauta mai na mana ni matabete me vakalougatataki kina na nomu itikotiko kei na nomu matavuvale.

iVakatakilakila
Buildings from various countries.

DROINI MAI VEI Sudi McCollum

Na sala cava beka ena rawa kina vei iko na cauravou se na goneyalewa, se cava ga na ituvaki ni nomu matavuvale, mo kauta mai na mana ni veiyalayalati ni matabete o a vakayacora ena gauna ni papitaiso me vaqaqacotaka na nomu itikotiko kei na nomu matavuvale? Na noda kila na itavi kei na bibi ni noda matavuvale ena nona ituvatuva na Turaga ena rawa me vakauqeti keda me da rokova na veiyalayala eda sa cakava ena noda raica me vakayacori mai vale na noda veiqaravi vinaka ka gugumatua duadua. Me da raica mada eso na sala me da kauta mai kina na mana ni noda veiyalayalati me vaqaqacotaki ira ka qaravi ira kina o ira na ka bibi duadua ena noda bula.

Mo na Sotava Vakacava?

E sa bogi ni Moniti, ka dua na ka na levu ni nomu lesoni me mai caka e vale. O rogoca ni sa kaciva vata tiko o tamamu na matavuvale ki na lotu vakamatavuvale. “Na cava mo cakava”

Digidigi A: Mo kaya vaqo, “Isa Ta, e sega na noqu gauna ni ka qori ena bogi nikua! Meu vuli lesoni mada!”

Digidigi B: O vakasoqoni ira vakatotolo ga na tacimu ka vakaitavi ena yalomarau ena masu, sere, kei na itukutuku.

Ni Tiko na Veiliutaki ni Matabete e Vale

Nomu veitokoni vei rau na nomu itubutubu ena nomu vakaitavi ena lomasoli ena lotu vakamatavuvale, masumasu vakamatavuvale, kei na vuli ivolanikalou vakamatavuvale eso na sala me da vaqaqacotaka kina na veiliutaki ni matabete e nomuni itikotiko. E vuqa tale na sala, me vaka na:

  • Masulaki rau nomu itubutubu. (Erau dau masulaki iko voleka ni veisiga kece.)

  • Tokoni rau na nomu itubutubu ena nodrau veikacivi ena Lotu ka lomasoli mo veivuke ena itikotiko, vakauasivi ni rau osooso tiko ena ilesilesi bibi eso.

  • Vukei rau na nomu itubutubu ena nodra kidavaki na dauveituberi vakamatavuvale ni ra yaco mai, qai vakarorogo vakavinaka ena nodrau itukutuku.

  • Kevaka e tiko e dua na valetabu ena nomu vanua, soli iko mo veimei vei ira na tacimu gone me rawa ni rau lako na nomu itubutubu ki na valetabu ka vakaitavi ena veicakacaka vakalotu ni matabete.

Nanuma tiko ni sega ni nodrau itavi walega na itubutubu na kena sureti ka maroroi tiko na Yalo ena noda itikotiko. E levu tu na ka e rawa ni o cakava mo sureta kina na Yalo ena nomu ivalavala kei na ivakarau ni vakasama. O sa cakava tiko beka na nomu itavi mo sureta na veivakauqeti ni Yalo ki na nomu itikotiko?

Ni Sega na Veiliutaki ni Matabete ena iTikotiko

E sega ni dau tautauvata na irairai kei na icicici ni veimatavuvale. O lewena tiko beka e dua na matavuvale e dua ga na kena itubutubu se sega ni dua na matabete e vakatulewa tiko ena nomu itikotiko. E se vuqa ga na sala me sureti kina na mana ni matabete me vaqaqacotaki iko kei na nomu matavuvale. Oqo na veika e dodonu me da cakava kece tiko, se cava ga na keda ituvaki:

  • Masu yadua, vulica na ivolanikalou, ka dau lolo. Na sasaga oqo ena vukei iko mo kaukauwa tiko vakayalo ka sureta na Yalo ki na nomu bula kei na nomu iyalava ni veiqaravi.

  • Taura na gauna mo qarava kina vakavinaka na nomu veikacivi se ilesilesi vaka-Lotu ka vakarautaki iko ki na lesoni ena Sigatabu. Ni o vakayacora vakakina ena vukei iko mo nuitaki iko vakataki iko ka veitokoni ena parokaramu ni matabete.

  • Vakaraitaka na nomu veidokai ena vukudra na lewe ni matavuvale ka tokona na nodra itaviqaravi e taucoko. Na veidigidigi oqo ena vukea na kena vaqaqacotaki na matavuvale taucoko.

  • Wasea kei iratou na nomu matavuvale na veika o vulica ka dau cakava ena nomu kalasi kei na kuoramu ena Lotu. Oqo e dua na sala me kau mai kina ki na itikotiko na ivakavuvuli ni kosipeli.

  • Vakasaqara na sala mo qaravi ira kina era vakavolivoliti iko ena veicakacaka rawarawa ni yalovinaka.

  • Veivuke e vale ena nomu cakava na itavi eso se vukea e dua na tacimu se ganemu.

  • Vakaraitaka na loloma va-Karisito ki na nomu matavuvale—ena mana cake sara na kena yaga ena kena tarai cake na isema qaqaco vinaka ni matavuvale mai na veika kece tale e rawa ni da cakava.

Rokova na Nomu Veiyalayalati

Ena noda qarava, lomana, ka vaqaqacotaka na noda matavuvale, eda sa dinata kina na veiyalayalati eda vakayacora ena noda papitaiso me da tu ka ivakadinadina kei Jisu Karisito, muria Nona ivakaro, ka vaqaqacotaki ira era tu wavoliti keda. E rawa ni da kauta mai na qaqaco ni veiyalayalati ni matabete me veivakalougatataki ka veivuke ena noda itikotiko kei na matavuvale. Na matabete, veiqaravi, kei na itikotiko sai ira na vosa e dodonu me ra semati vata tawamudu ena noda vakasama. Sa dodonu me ra naba dua ena veika me liu ena noda vakasaqara na sala me da vakaitavi kina ena cakacaka ni veivakabulai o ira na lewe ni noda matavuvale. Ni da vaqaqacotaka na noda matavuvale, eda sa vaqaqacotaka tale tikoga na Lotu, noda itikotiko, kei na vuravura.