iVaqa ni Veisiko
Na iLesilesi Vakalou i Jisu Karisito: Na iVakabula ka Dauveivueti
Vulica ena masumasu na itukutuku oqo ka vaqara mo kila na ka mo na wasea. Ena vakalevutaka vakacava na nomu vakabauta na nomu kila na bula kei na ilesilesi ni iVakabula, ka yaco me vakalougatataki ira talega o vakaraica voli ena veisiko? Me ikuri ni itukutuku, lako ki na reliefsociety.lds.org.
Vakabauta, Matavuvale, Veivukei
E dua vei ira na itutu bibi ka vakamacalataki Jisu Karisito na Dauveivueti,” e kaya vakaoqo o Elder D. Todd Christofferson ena Kuoramu ni iApositolo Le Tinikarua. “Na vosa vueta e kena ibalebale me sauma e dua na icolacola se dinau. Na vueta e rawa talega ni kena ibalebale me vakabula se vagalalataka me vaka na saumi ni kena ivesu. … Na kena ibalebale yadua oqo e tukuna tiko na veitikina duidui ni Veivueti cecere sa mai vakayacora o Jisu Karisito ena vuku ni Nona Veisorovaki, ka okati kina, ena vosa ni ivolavosa, ‘me sereki mai na ivalavala ca kei na kena itotogi, me vaka e dua na isoro sa caka ena vukui koya e ivalavala ca.’”1
E kaya o Linda K. Burton, na peresitedi raraba ni iSoqosoqo ni Veivukei: “Na Tamada Vakalomalagi … ka tala mai na Luvena e Duabau ga tawacala me mai vakararawataki ena vuku ni noda ivalavala ca, mosi ni yaloda, kei na veika kece sara e rairai cala ena noda dui bula vakayadua.
“… E dua na marama ka sotava tiko na veiyabaki ni veivakatovolei kei na rarawa ka kaya ena vosa tagitagi, ‘Sa yaco mai na gauna ni noqu vakila niu sa tautauvata e dua na noti 20 na dola makawa—kakalobilobi, kabasu, duka, vakacacani, ka vakamawe tu. Ia … au se dua tiko ga na noti 20 na dola.’ E kila tu na marama oqo … ka kilikili kaya [vua na Kalou] na Nona tala mai na Luvena me sorovaki koya sara ga. Na marama vakayadudua ena Lotu e dodonu me kila na ka e kila na marama oqo.”2
Mai na iVolanikalou
Mai na Keda iTukutuku Makawa
Era volai tale tu ga ena Veiyalayalati Vou na kedra itukutuku na marama era vakabauti Jisu Karisito, ka ra vulica ka bulataka na Nona ivakavuvuli, ka ra vakadinadinataka na Nona cakacaka vakalotu, cakamana, kei na Nona lagilagi.
A kaya o Jisu vua na yalewa ena ikeli ni wai:
“Ia ko koya sa gunuva na wai kau na solia vua ena sega sara ni viagunu ka tawa mudu; ia na wai kau na solia vua, ena tu e lomana me mata-ni-wai sa tovure ki na bula tawamudu.
“Sa kaya vei koya na yalewa, Solia saka, mai vei au na wai oqori, meu kakua ni viagunu. …
“Au sa kila ni na lako mai [na Mesaia], ko koya sa vakatokai na Karisito: ni sa tadu mai ko koya, ena tukuna vei keda na ka kecega.
“Sa kaya vua ko Jisu, Sai au ga sa qai vosa tiko vei iko.”
Sa qai “biuta na nona itakitaki na yalewa” ka lako yani ki na koro ka tukuni Koya vei ira na tamata. (Raica na Joni 4:6–30.)