Era Vakadinadinataka na Karisito sa Bula o Ira na iVakadinadina Digitaki
O iratou na lewe ni Mataveiliutaki Taumada kei na Kuoramu ni iApositolo Le Tinikarua era sa parofita, daurairai, ka daunivakatakila ena gauna oqo ka ra sa “lesi me vunautaka yani na yaca i Karisito ki vuravura taucoko” (V&V 107:23). Sa yaco kina, me nodratou ilesilesi na vakadinadinataka ni sa vakalou o Jisu Karisito kei na Nona ilesilesi me iVakabula ka dauveivueti kei vuravura.
Ena vosa e tarava, o ira na turaga oqo era sa digitaki ka lesi mera wasea na nodra ivakadinadina baleta na Veisorovaki ni iVakabula, sa Tucake Tale, ka sa bula dina tiko.
O Jisu Sa Noda Dauveivueti
“Mai vu ni yaloqu kei na gagadre ni lomaqu, au laveta kina na domoqu ena vakadinadina me vaka e dua na vakadinadina bula digitaki, ka kaya ni bula dina tiko na Kalou. E Luvena ko Jisu, na Le Duabau Ga nei Tamana ena lewe. O Koya na noda Dauveisereki; O Koya na noda Dautataro vei Tamana. Sai Koya a mate ena kauveilatai me sorovaka na noda ivalavala ca. Sa yaco ko Koya me kena imatai ni Tucaketale. Ena nona Mate, eda na bula kece. “Rogo talei tu vei au: ‘Au sa kila ni bula tu!’” [“Au sa Kila ni Bula Tu,” Sere ni Lotu, naba 76].”
Peresitedi Thomas S. Monson, “Au sa Kila ni Bula Tu na Noqu iVakabula!” Liaona, Me 2007, 25.
Au Dua na iVakadinadina
Oi au e dua na ivakadinadina ni nona Tucaketale na Turaga me vaka ga au a tiko beka kina ena yakavi o ya vata kei na rua na tisaipeli ena vale e gaunisala ki Emeo. Au kila ni bula tiko o Koya me vaka dina a yaco vei Josefa Simici ena gauna a raica kina na Tamana kei na Luvena ena rarama ni dua na mataka totoka ena dua na veikau mai Palmyra. …
“… Au sa vakadinadinataka niu sa ivakadinadina ni iVakabula sa tucaketale ka noda Dauveivueti.”
Peresitedi Henry B. Eyring, iMatai ni Daunivakasala ena Mataveiliutaki Taumada, “Dou Lako Mai vei Au,” Liaona, Me 2013, 25.
Na Veisorovaki kei na Veivakabulai
“Na Kalou sa vakatekivuna na kosipeli; sa tiki bibi ni nona yavu ni veivakabulai, se ituvatuva ni veivueti. E vakatokai me kosipeli i Jisu Karisito baleta ni ena Veisorovaki nei Jisu Karisito sa yaco rawa kina na veivueti kei na veivakabulai. Ena vuku ni veisorovaki sa yaco na tagane, yalewa, kei na gone kece sara me ra vueti soli wale mai na mate vakayago, ka yaco mera vueti kece mai na nodra ivalavala ca ka sa lavaki kina na nodra rawa ni ciqoma ka muria na kosipeli i Jisu Karisito… .
“Oqo sa noqu ivakadinadina mai na vu ni yaloqu kei na noqu vakasama taucoko.”
Peresitedi Dieter F. Uchtdorf, iKarua ni Daunivakasala ena Mataveiliutaki Taumada, “E Sega Li ni Kilikili Me da Marau?” Liaona, Nove. 2007, 19, 21.
O Jisu na Karisito
“Au kila ni Kalou sa ikoya na Tamada. A vakatakilaitaka na Luvena, o Jisu Karisito, kivei Josefa Simici. Au sa vakaraitaka oqo kivei kemuni niu sa kila ni sa Karisito ko Jisu. Au kila ni bula tiko o Koya. E a sucu o Koya ena gauna cecere duadua. A vakatavulica na Nona kosipeli ka vakatovolei. A sotava na rarawa ka vakoti ki na kauveilatai ka tucake tale ena ikatolu ni siga. Me vakataki Tamana ga, sa vakayago ena lewe kei na sui. Sa vakayacora na Nona Veisorovaki. Au sa vakadinadinataki Koya. Au sa Nona ivakadinadina.”
Peresitedi Boyd K. Packer, Peresitedi ni Kuoramu ni iApositolo Le Tinikarua, “Na Le Tinikarua,” Liaona, Me 2008, 87.
Na iVoli ni Matavuvale ni Kawa Tamata
“O [Jisu Karisito] na uto ni yavu tawamudu ni Tamada, na iVakabula ka a vakarautaki me qai soli yani me baleta na kawa tamata. Na Kalou e tala mai na Luvena Daulomani me mai uabaleta na Lutu nei Atama kei Ivi. O Koya e lako mai ki vuravura me mai noda iVakabula ka Dauveivueti. O Koya e voroka na dredre ni mate vakayago me baleti keda ena Nona solia na Nona bula. Na gauna e mate kina o Koya ena kauveilatai, erau a veitalatala kina na Yalona kei na Yagona. Erau sa qai veisotari tale me tawamudu na Yalona kei na Yagona ka sega ni veitawasei tale ena ikatolu ni siga.”
Elder L. Tom Perry ena Kuoramu ni iApositolo Le Tinikarua, “Na Yavu ni Veivakabulai,” Liaona, Nove. 2006, 71.
Na iUsutu ni iTukutuku ni Kawatamata
“A tekivu yaco na Veisorovaki [ni iVakabula] mai Kecisemani, na vanua a titiri kina mai vua na tiki ni dra (raica na Luke 22:44), ka vakakina mai Kolikoca (se Kalivari), na vanua a laveti kina i cake na yagona ena kauveilatai na ‘vanua ni qavokavoka,’ sa kena ibalebale na mate (Marika 15:22; Maciu 27:33; raica talega na 3 Nifai 27:14). Na Veisorovaki tawayalani oqo ena sereki ira na tamata mai na mate tawayalani (raica na 2 Nifai 9:7). Na Veisorovaki ni iVakabula sa mai yaco dina kina na tucake tale kei na bula tawamudu ki na tamata kecega. Na Nona Veisorovaki sa mai iusutu ni itukutuku ni kawatamata kecega.”
Elder Russell M. Nelson ena Kuoramu ni iApositolo Le Tinikarua, “The Peace and Joy of Knowing the Savior Lives,” Liahona, Dec. 2011, 22.
Na Solibula ena Vuku ni iValavala Ca
“A vosota o Jisu Karisito na veivakararawataki e sega ni vakasamataki rawa me sorovaki Koya kina me baleta na ivalavala ca ni tamata kecega. Na isoro oqori e soli kina na ulumatua ni vinaka—na Lami savasava sa sega na kena ca—me baleta na levu ni ca—na ivalavala ca ni vuravura taucoko. …
“Na isoro oya—na Veisorovaki nei Jisu Karisito—e itakele ni ituvatuva ni veivakabulai. …
Au kila ni o Jisu Karisito na Luvena e Duabau Ga na Kalou na Tamada Tawamudu. Au kila ena vuku ni Nona isoro ni veivakaduavatataki, sa vakadeitaki kina vei keda na tawamate rawa kei na madigi ni bula tawamudu. O Koya na noda Turaga, na noda iVakabula, ka noda Dauveisereki.”
Elder Dallin H. Oaks ena Kuoramu ni iApositolo Le Tinikarua, “Na Solibula,” Liaona, Me 2012, 19, 22.
Na iVakabula sa Dusimaka Tiko na Nona Lotu Nikua
“Na Veisorovaki nei Jisu Karisito e tiki bibi sara ni ituvatuva ni Tamada Vakalomalagi me baleta na Nona cakacaka e vuravura na Luvena kei na noda vakabulai. Sa dodonu meda vakavinavinaka vakalevu ni a sega ni curu maliwa na Tamada Vakalomalagi, ia a kinoca na Nona gagadre vakatama me vakabula na Luvena Daulomani. Ena vuku ni Nona loloma tawamudu vei iko vata kei au, e a vakalaiva kina me vakacavara o Jisu na Nona itavi ka lesi taumada me yaco me noda Dauveisereki. …
“O Jisu Karisito, na iVakabula ka Dauveisereki ni tamata kecega, e sega ni mate. E bula tiko o Koya—e bula tiko na Luve ni Kalou sa vakaturi cake tale—oqori na noqu ivakadinadina, ka liutaka tiko na cakacaka ni Nona Lotu edaidai.”
Elder M. Russell Ballard ena Kuoramu ni iApositolo Le Tinikarua, “Na Veisorovaki kei na Yaga ni Dua na Yalo,” Liaona, Me 2004, 85, 86.
Noda iNuinui, Noda Daunitataro, Noda Dauveivueti
“Na noda taqomaki sa tu ga [vua na Tamada Vakalomalagi] kei na Luvena Lomani, o Jisu Karisito. Au kila ni lomani kemuni na iVakabula. Ena vakadeitaka o Koya na nomuni sasaga me vaqaqacotaki na nomuni ivakadinadina me rawa ni dua na kaukauwa tudei vinaka ena nomu bula, na kaukauwa ena tokoni iko ena nomu gagadre kece ka solia vei iko na vakacegu kei na veivakadeitaki ena gauna dredre eso.
“Me vaka niu dua na Nona iApositolo ka vakatarai meu vakadinadinataki Koya, au vakadinadinataka niu kila ni bula tiko na iVakabula, ni sa tucaketale o Koya, ka sa lagilagi ena loloma sa uasivi sara. O Koya na noda inuinui, noda Dauveisereki, noda iVakabula.”
Elder Richard G. Scott ena Kuoramu ni iApositolo Le Tinikarua, “Na iGu ni iVakadinadina Kaukauwa,” Liaona, Janu. 2002, 103.
Gunu Mai na Bilo ni Cudru
“Ena Were o Kecisemani, a sega ni guce na iVakabula kei na Dauveivueti mai na nona gunuva na bilo ni cudru ni Veisorovaki [raica na V&V 19:16–19]. Ia ena kauveilatai a vakararawataki tale me vakayacora na lewa nei Tamana, me yacova ni sa qai kaya rawa, ‘Sa oti’ [Joni 19:30]. E a vosota o Koya me yacova na ivakataotioti. Me idole ni nona talairawarawa uasivi me tudei kaukauwa tu na iVakabula, a kaya kina na Tamada Vakalomalagi, “Raica oqo na noqu Gone ni toko, kau sa dau vinakata vakalevu; sai Koya sa vakacaucautaki kina na yacaqu.” [3 Nifai 11:7].
“… Meda sa vakacaucautaka na yaca ni Kalou ena noda tudei tu vata kei na noda iVakabula, o Jisu Karisito. Sa noqu ivakadinadina oqo ni sa bula tiko o Koya.”
Elder Robert D. Hales ena Kuoramu ni iApositolo Le Tinikarua, “Mo Dou Tudei ena Vanua Tabu,” Liaona, Me 2013, 51.
Na Luve ni Kalou sa Uasivi Duadua
“Au kila ni Kalou ena veigauna kecega kei na sala kecega kei na ituvaki kecega sa Tamada mai Lomalagi dauloloma ka dauveivosoti. Au kila ni ko Jisu e Luvena uasivi duabau duadua, ka a solia na nona bula ena yalololoma ena nodrau lewa na Tamada kei na Luvena meda vakabulai kina oi keda kece oqo eda sa sega ni taucoko sara. Au kila ni a tucake mai na mate o ya, me bula tale, ka ni baleta na Nona sa vakayacora, o iko kei au ena vakakina.
Elder Jeffrey R. Holland ena Kuoramu ni iApositolo Le Tinikarua, “Kemuni na Turaga, Au sa Vakabauta,” Liaona, Me 2013, 95
Au Kila ni Bula Tiko na iVakabula.
“Au vakaraitaka eke na noqu vakadinadina kei na vakavinavinaka me baleta na solibula tawayalani ka tawamudu ni Turaga o Jisu Karisito. Au kila ni bula tiko na iVakabula. Au sa sotava ruarua na Nona kaukauwa veivueti kei na Nona kaukauwa veivukei, kau sa vakadinadinataka ni sa dina sara na kaukauwa e rua oqo ka sa vakarautaki tu vei keda yadudua. Sa dina sara, ni sa rawa meda cakava ka vorata rawa na veika kecega “ena kaukauwa ni Turaga” ni da toso tikoga ki liu ena noda ilakolako ni bula oqo.
Elder David A. Bednar ena Kuoramu ni iApositolo Le Tinikarua, “Na Veisorovaki kei na iLakolako ni Bula Oqo,” Liaona, Epe. 2012, 19.
Sa Vakayacora na Karisito na Nona iLesilesi
“Sa taura Vua ko Koya [na iVakabula] na ‘icolacola ni nodra ivalavala ca na kawatamata’ kei na veika ‘rerevaki e rawa ni vakavuna ko Setani’ [James E. Talmage, Jisu na Karisito, 613]. Ena ivalavala oqori a vosota rawa kina ko Koya na veilewai ni veibeitaki vakailasu kei na veika vakaloloma ka vakarerevaki ka qai laki tini ena Nona vakamatei ena Kauveilatai. A qai yaco kina na qaqa ni Nona sa Tucaketale na Karisito ena Sigatabu ni Siganimate. Sa qarava vakavinaka sara na Karisito na Nona ilesilesi tabu vaka-iVakabula ka Dauveivueti. Eda na tucaketale mai na mate ka vakaduavatataki na yaloda kei na yagoda. …
“Au wasea na noqu ivakadinadina vakaiapositolo ni bula tiko o Jisu Karisito na iVakabula ka Dauveivueti ni vuravura. Sa vakarautaka ko Koya na sala ki na bula marau.”
Elder Quentin L. Cook ena Kuoramu ni iApositolo Le Tinikarua, “Eda Muri Jisu Karisito,” Liaona, Me 2010, 83–84, 86.
Sa Vueti Keda na iVakabula
“Na nona vakararawataki na iVakabula mai Kecisemani kei na Nona yaluma ena kauveilatai sa vueti keda mai na mate ena nona vakamamautaka na gagadre ni lewa dodonu vei keda. Sa dedeka yani na loloma veivueti kei na veivosoti vei ira sa veivutuni. Na Veisorovaki talega e sauma na noda dinau ki na lewa dodonu ena nona vakabulai keda ka sauma lesu vei keda na veika rarawa eda sa vosota ena yalodina. ‘A sa colata ko koya na rarawa ni tamata kecega, io na rarawa ni veika bula kecega, na tagane kei na yalewa kei na gone, ko ira na kawa i Atama’ (2 Nifai 9:21; raica talega na Alama 7:11–12). …
“… Na ulu ni veivueti e tu vei Jisu Karisito, io vei koya duadua ga. Au vakadinadinataki Koya ena yalomalumalumu kei na vakavinavinaka ni o Koya na Dauveivueti.”
Elder D. Todd Christofferson ena Kuoramu ni iApositolo Le Tinikarua, “Veivueti,” Liaona, Me 2013, 110, 112.
Na Tucaketale kei na Bula
“Ena veika kecega, eda vunautaka na noda iVakabula ka Dauveivueti, ko Jisu Karisito. Na veika kece e baleti keda—na veika kecega eda na vakakina—eda sa dinau tu kina Vua. …
“E voqa basikata na veisenijiuri na domona:
“Oi au na vu ni tucake tale, kei na vu ni bula, ko koya sa vakabauti au kevaka sa mate ena bula ga:
“‘Ia ko koya yadua sa bula ka vakabauti au, ena sega sara ni mate’ (Joni 11:25–26).
Kemuni na taciqu kei na ganequ, e bula tiko o Koya. Sa tucake tale o Koya. E liutaka tiko na Nona cakacaka tabu e vuravura.”
Elder Neil L. Andersen ena Kuoramu ni iApositolo Le Tinikarua, “Lako Mai ki Vua,” Liaona, Me 2009, 80.