“Oqori E Sa Rui Rawarawa, Tukaqu!”
E dua na vosa mai na koniferedi raraba ni Epereli 2013.
“Dou sa vakasaqaqara ena ivolatabu; ni dou sa nanuma ni dou sa rawata kina na bula tawamudu: ia na ivola oqo sa tukuni au” (Joni 5:39).
Au taleitaka na iVola i Momani kei na noqu iVakabula, o Jisu Karisito. Au a tarogi makubuqu yalewa o Raquel ena dua na siga se cava e nanuma me baleta na tuvakataki ni dua na inakinaki me wiliki na iVola i Momani. E se qai vulica toka ga o Raquel na iwalewale ni wilivola.
“Ia, Tukaqu,” a kaya okoya, “e sa rui dredre. E sa ivola levu.”
Au a qai tukuna vua me wilika vei au e dua na tabana. Au taura mai e dua na kaloko vakaitarovi ka taura nona gauna. E tauri koya e tolu walega na miniti me wilika na tabana.
Keitou wilika na iVola i Momani vaka-Sipeni, kei na iVola i Momani vaka-Sipeni e 642 taucoko na kena tabana. Au tukuna vua ni na tauri koya e 1,926 na miniti me wilika kina na ivola taucoko.
Oqo ena rawa ni vakarerei koya vakalevu cake, ka’u sa mani vida na iwiliwili oya ena 60 na miniti. Au tukuna vua ni na gadreva walega okoya e 32 na aua me wilika kina na ivola. Oya ena lailai mai na dua ka veimama na siga!
A qai kaya o koya vei au, “Oqori e sa rui rawarawa, Tukaqu.”
A tauri Raquel, o ganena, o Esteban, kei na makubui keirau tale eso e vakalailai tale na gauna me wilika na iVola i Momani. Oya baleta ni keitou sa wilika, keitou sa gadreva me tauri na gauna ni masumasu ka me vakasamataki na ka keitou sa wilika.
Me vakataki Raquel kei Esteban, eda rawa ni vulica taucoko na taleitaka na ivolanikalou. Sa da na qai rawa ni vakatakila yadua: “A kena kamikamica na nomuni vosa ki na gusuqu! Io, na oni sa sega ni kamikamica e na gusuqu!” (Same 119:103.).