Auaunaga i le Ekalesia
Auauna Atu i se Tagata Ese
E alala le tusitala i Kalefonia, ISA.
Ina ua latalata ona ou tuua Korea, sa ou popole. O ai o le a tausia le uso o lo’u tina pe a ou alu?
E lei taliaina lava e lo’u tina le talalelei a o soifua, e ui lava sa ou tatalo mo ia ma lagonaina o le a ia talia i se aso. O ia o se tamaitai malosi ma na ositaulaga i lona olaga atoa e lagolago lo matou aiga ina ua mavae le Taua a Korea. I le atoa ai o le tasi le tausaga talu ona maliu lo’u tina, na ma o ma lo’u toalua i le Malumalu o Los Angeles Kalefonia e faatino ai lona papatisoga ma le faamauga. Sa faamaonia mai e le malosi o le Agaga i le potu ia te au o lo’u tina ua taliaina ma le fiafia le talalelei ma sauniga.
Ina ua latalata ona maliu lo’u tina, sa ia fai mai ia te au e tausi lona uso laitiiti, o le sa i ai i se falemai i Korea. Matou te nonofo ma lou aiga i Kalefonia, ISA, o le mea lea e faanoanoa ai aua sa foliga mai ua leai se auala e faataunuu ai moomooga alofa mulimuli o lo’u tina. Ona faafuasei lea ona toe siitia la’u galuega i Korea i Saute, ma e tatau ona ou aluese mai lo’u aiga mo se tausaga. E ui ina sa ou popole e uiga i le nofo mamao ese mai lo’u aiga, sa ou naunau foi e asiasi atu i le uso o lo’u tina ma lo’u tama, o le sa i ai i se falemai Korea e mafatia i le mai o le Galonimo o mea.
Sa ou tatalo atu i le Tama Faalelagi mo le fesoasoani faalelagi i le nofoese ai mai lo’u aiga. A o ou mafaufau e uiga i le taimi o le a ou faaaluina i Korea, sa tonu ai ia te au e asiasi atu i lo’u tama, uso o lo’u tina, ma le malumalu i vaiaso taitasi faapea foi ma le tatalo mo lo’u aiga i aso taitasi.
Ina ua ou i ai Korea, na valaauina au e le epikopo o lau uarota fou e avea ma peresitene o Alii Talavou ma le faiaoga o Mataupu Faavae o le Talalelei. O la’u uarota ma falemai e nonofo ai lo’u tama ma le uso o lou tina e mamao ese mai le tasi i le isi, ma o lau galuega e matuai tele taimi e alu foi; ae sa faamanuiaina au e le Tama Faalelagi i le malosi ma le tumau e faalautele ai ou valaauga ma tausi i a’u filifiliga.
Na vave ona ou iloaina ina ua amata ona ou asiasi atu i le uso o lo’u tina, sa seasea i ai ni tagata e asiasi mai. Sa ou filifili e pikiina o ia ma ma nonofo i le faaiuga o vaiaso i loʼu faletalimalo, lea sa i ai se potu faaopoopo. Ae peitai, sa i ai sou faafitauli: pe tatau ona ou aveina o ia i le lotu i le aso Sa? Sa ou manatu o le a le fiafia o ia pe malamalama foi i sauniga, ma o le a ia faatali mo au mo ni itula pe a uma le lotu ma sauniga ma isi tiute. Ae mo se mafuaaga sa ou lagona ai e tatau ona ou aveina o ia.
O lena Aso Sa sa ou aveina o ia faatasi ma au, ma, e pei ona faamoemoeina, sa tatau ona ia faatali mo a’u mulimuli ane. Ina ua uma a’u fonotaga, sa ou aveina o ia i le faletalimalo e ai ai. Sa ou matauina sa ia uuina se ato. Sa ou fesili ia te ia e uiga i ai, ma sa ia fai mai na tuuina mai e se tuafafine ia te ia ni meaai mama.
Soo se taimi sa ou faataunuuina ai tiute i le tuua o le lotu, o lenei tuafafine—sa le’i iloa le uso o lo’u tina—na ofoina mai meaai mama mo le uso o lo’u tina. I se tasi vaiaso i le taimi o la’u lesona o le Aoga Sa, na ofo mai ai se leo masani e faitau se mau. Ou te lei mafaufauina o le a volenitia le uso o lo’u tina, ae sa uunaia e se tuafafine na nofo i autafa o le uso o lo’u tina o ia e faitau mo le vasega. E ui lava o le uso o lo’u tina sa le lelei i fegalegaleaiga ona o lona taimi na faaesea ai i le falemai, na faafeiloai ma le agalelei ma talatalanoa tagata lotu uma ia te ia.
O afiafi o Aso Sa uma ou te toe ave ai o ia i le falemai ma folafola atu e piki o ia i luga i le faaiuga o le vaiaso na sosoo ai, lea e aumaia i taimi uma se ataata fiafia i ona foliga.
I se tasi aso na faasoa mai e sa’u uo se popolega atonu o le a faigata i le uso o lo’u tina pe a faafuasei lava ona taofi au asiasiga pe a ou tuua Korea. Ina ua latalata lou taimi faatulagaina e tuua ai Korea, sa ou mauaina se lagona le mautonu—fiafia o le a vave ona toe faatasia ma lo’u aiga ae faanoanoa i le tuua toatasi o le uso o lo’u tina.
Mulimuli ane, sa ou faamalamalama atu i le uso o lo’u tina o le a le mafai ona ou toe asiasi soo i a te ia. Sa tu o ia mo se taimi, e mautinoa lava lona le fiafia. Ona ia taumafai lea e faatulaga ia lava ma fesili mai pe mafai ona ou asiasia o ia i le isi tausaga. Sa ou tagi ma tatalo faatauanau atu i le Tama Faalelagi e fesoasoani i lenei tamaitai.
I lo’u aso Sa mulimuli i Korea, na fesili mai le epikopo pe mafai e tagata o le uarota ona piki le uso o lo’u tina i aso Sa e aumai o ia i le lotu. Sa ia fai mai o se vaega o tagata lotu na naunautai e asia o ia i taimi uma—e matuai toatele naua o le a latou manaomia e faatulaga ma feauauai. Sa ou le talitonu i lana ofo! O le tali lenei e le’i faamoemoeina i au tatalo faatauanau.
Talu ai o tagata o le ekalesia e nonofo mamao ese mai le falemai o le uso o lo’u tina, sa ou ofoina atu e tuua se tupe mo i latou e totogi ai le femalagaaiga, ae na mumusu tagata lotu e ave a’u tupe. Sa latou fai mai o le a latou feauaua’i e asiasi faatasi i le masina, ae na ou iloa i se taimi mulimuli ane na latou asia moni lava o ia i vaiaso taitasi. O se tasi o tuafafine faamaoni e pikiina le uso o lo’u tina i aso Faraile uma ina ia auai i le inisitituti ma fai le taumafataga o le aoauli. Sa ia aveina foi o ia i le fale faaaulelei mo le otiina o lona lauulu. Sa ofofua atu se isi tamaitai, o se tina nofofua o ni tamaiti talavou se toalua, e piki o ia i taeao o Aso Sa uma. Sa ia kuka mo le uso o lo’u tina, ave o ia mo se savalivaliga, ma faalogologo i musika ma ia. O le mea e aupito sili ona taua, sa ia taumafai e avea ma se uo, ma na iu lava ina talanoa fiafia atu i ai le uso o lo’u tina ia te ia ma isi tagata lotu. I afiafi o Aso Sa uma e piki ai le uso o lo’u tina mai le fale o se tagata lotu e le epikopo pe a mavae se aso umi o fonotaga a le Ekalesia ma isi tiute e toe ave o ia i le falemai. O Aso Tofi uma na te auina mai ai se imeli ia te au e lipoti mai ai la latou auaunaga faalelagi mo le uso o lo’u tina.
Ou te talitonu na vaai lo’u tina i faatinoga a le Au Paia faamaoni o Aso e Gata ai o loo auauna atu i lona uso laitiiti. Ma o lenei ua ou iloa, sili atu ona manino nai lo se isi lava taimi, pe aisea tatou te valaauina ai o tatou uso a tagata o le Ekalesia “uso” ma “tuafafine.”