Gidaghanon sa mga Miyembro ug sa mga Misyonaryo Gipahibalo sa Kinatibuk-ang Komperensya
Ang mga miyembro sa Simbahan miabut og 15 ka milyon, pahibalo ni Presidente Thomas S. Monson sa pangbukas nga sesyon sa ika-183 nga Tunga sa Tuig nga Kinatibuk-ang Komperensya niadtong Oktubre 5, 2013. Gipahibalo usab niya nga tungod sa pagpaubos sa edad alang sa misyonaryo nga serbisyo niadtong Oktubre 2012, ang gidaghanon sa full-time nga mga misyonaryo nga nagserbisyo sa tibuok kalibutan mitubo—gikan sa 58,500 ngadto sa 80,333.
Ang Simbahan padayong naglambo ug nag-usab og mga kinabuhi sa nagkadaghang mga tawo matag tuig. “Mikatap na kini sa tibuok kalibutan samtang ang atong misyonaryo nga pwersa nangita niadtong nangita sa kamatuoran.”
Iyang giawhag ang mga miyembro ug mga misyonaryo sa pagtambayayong sa pagpakigbahin sa ebanghelyo. “Karon ang panahon sa mga miyembro ug mga misyonaryo sa paghiusa, sa pag-uban og trabaho, sa paghago sa ubasan sa Ginoo sa pagdala og mga kalag ngadto Kaniya” miingon si Presidente Monson, nga nagserbisyo isip Apostol sulod sa 50 ka tuig.
Sa sesyon sa Sabado sa hapon, tulo ka mga miyembro sa Unang Korum sa Seventy—sila si Elder John B. Dickson, Paul E. Koelliker, ug F. Michael Watson—gi-released nga madungganon ug gihimong nga emeritus, ug Elder Kent D. Watson sa Ikaduhang Korum sa Seventy gi-released usab nga madungganon. Dugang pa, si Julio A. Angulo, 45, sa Bogotá, Colombia; Peter F. Evans, 54, sa Siyudad sa Salt Lake, Utah, USA; ug Gennady N. Podvodov, 47, sa Donetsk, Ukraine, gipaluyohan isip mga Area Seventy. Gipahibalo nga si César H. Hooker ug Craig T. Wright gi-released isip mga Area Seventy.
Minilyon ang nanan-aw o naminaw sa tibuok kalibutan sa komperensya pinaagi sa telebisyon, Internet, radyo, ug mga sibya sa satellite. Sulod sa unang higayon, ang sesyon sa priesthood sa Sabado sa gabii gisibya sa telebisyon ug real time diha sa Internet. Labaw sa 100,000 ka mga tawo mitambong sa lima ka mga sesyon sa Conference Center sa Siyudad sa Salt Lake, Utah, niadtong Oktubre 5 ug 6. Ang komperensya anaa usab sa lain-laing mga media sa 95 ka pinulongan ug gisibya ngadto sa 197 ka mga nasud ug mga teritoryo.
Si Presidente Monson mitapos sa komperensya nga nag-awhag sa mga miyembro sa Simbahan sa pagpakita og dugang kamabination sa usag usa ug sa “paghimo sa buhat sa Ginoo.”
Thomas S. Monson sa Tabernacle sa Temple Square niadtong 1963, mga sitwasyon sa wala pa siya mapaluyohi isip General Authority.
Litrato gikan sa Opisina sa Presidente