A pee i Toʻna taahiraa avae

Na Melissa Zenteno

Te mau veʻa a te Ekalesia

E ohipa tatuhaa e o te oraraa taatoa te riroraa mai te Faaora ra te huru, e e nehenehe ta outou e haamata na roto i te raveraa i te mau taahiraa naʻinaʻi i te mau mahana atoa.

Christ walking with sheep in the background.

Te faaitoito mai nei te mau papaʻiraa moʻa ia tatou ia riro mai ia Iesu Mesia te huru, e ia faaau i to tatou haerea « mai toʻna atoa ra haerea e tiʻa’i » (1 Ioane 2:6). Tera râ, e nehenehe i taua taahiraa matamua ra i te riro ei ohipa fifi—mai te mea ihoa râ e, aita outou i ite e, nahea i te haamata.

E ite outou i te tauturu i roto i te Ia Poro Haere i Ta’u nei Evanelia: Te hoê arata‘i no te ohipa misionare. E mana‘o paha outou e, e buka arataʻi noa teie na te mau misionare rave tamau, tera râ, e tauihaa maitai roa o te tauturu ia outou ia haamata i ta outou opuaraa ia riro mai te Faaora te huru. Ua faataahia te pene 6 no te tauturu ia outou ia maramarama e ia faaohipa e iva huru taa ê o te Mesia.

Teie te tahi mau manaʻo tauturu no niʻa i te faaohiparaa i te Ia Poro Haere i Ta’u nei Evanelia e i te mau papaʻiraa moʻa, a imi ai outou i te raveʻa no te faatupu i te mau huru o te Mesia :

• No te haamata, a haere i niʻa i te tuhaa ra, Ohiparaa no te taipe, i te pae hopea o te pene 6 i roto i te Ia Poro Haere i Ta’u nei Evanelia (api 144). E nehenehe i teie ohiparaa e tauturu ia outou ia maʻiti eaha to outou mau huru puai pae varua i teie taime, e eaha te mau huru e tiʻa ia outou ia haamaitai.

• Ia hope anaʻe te ohiparaa, a maʻiti na roto i te pure, i te hoê huru o ta outou e tuatapapa atu. A taiʻo i te tuhaa i roto i te pene 6 no niʻa i te reira huru.

• A haamau i te mau opuaraa papû e o te tiʻa ia faitohia, o te tauturu ia outou ia faahotu i teie huru. A faataa i te hoê area taime no te faatupu i ta outou opuaraa. I muri iho, a hiʻopoʻa i to outou haereraa i mua. Ei hiʻoraa, mai te mea e, te tamata ra outou ia faarahi atu i to outou huru aroha i te taata, e haamau ïa outou i te hoê opuaraa no te faahiti i te mau parau maitai no niʻa i to outou taeaʻe e aore râ, to outou tuahine e toru aʻe taime i te mahana hoê, no te roaraa hoê hepetoma. I te hopea o te hepetoma, e hiʻopoʻa outou eaha te ohipa ta outou i rave no te reira opuaraa, e a rave i te mau faatitiaifaroraa o te tauturu ia outou ia tamau noa i te haamaitai atu â.

• E itehia i roto i te Ia Poro Haere i Ta’u nei Evanelia te mau irava e tuatapapa no niʻa i te huru tataʻitahi. E nehenehe ta outou e tuatapapa na roto i te pure, i te mau irava i tapurahia e a papaʻi i te mau manaʻo ta outou i farii a taiʻo ai outou i te reira.

• A ani i te Metua i te Ao ra i te tauturu no te faahoturaa i te mau huru o te Mesia. A ani i te hoê tauturu taa ê mai teie te huru, « A horoʻa mai oe i te puai ia haavî i to’u riri ia rave anaʻe to’u mau taeaʻe i ta’u mau tauihaa ». Rahi atu te papû o ta outou mau pure, hau atoa’tu te ohie no outou ia ite i te pahonoraa a te Fatu.

E ohipa tatuhaa noa te riroraa mai to tatou Faaora ra te huru, o Iesu Mesia, e e ohipa no te oraraa taatoa. I te tahi taime mai te mea ra e, ua hau atu te fifi o te reira i te tuatapaparaa hohonu i te ihi puai (sciences physiques). Tera râ, eiaha e haaparuparu. Ua fafau mai te Fatu ia tatou e : « O oia o te farii i te maramarama, e e tamau noa hoi i ta te Atua ra, e farii mai â oia i te maramarama ; e e tupu te maramarama i te anaanaraa e tae noa’tu i te mahana mau ra » (PH&PF 50:24). Ia farii ana‘e tatou, e ia tuatapapa ana‘e, e ia faaohipa ana‘e i te maramarama e te parau mau ma te pee tamau noa i te Atua i te mau mahana atoa, e nehenehe ta tatou e papû e, e rahi atu to tatou riroraa mai to tatou Faaora ra te huru, o Iesu Mesia.

Seeking the One, na Liz Lemon Swindle, eiaha e tapitihia te neneʻiraa ; hohoʻa faahohoʻaraa © Shayla Marie Fursov ; na muri mai © iStock/Thinkstock ; filigrees © Hemera/Thinkstock

Te mau ohipa i te mau mahana atoa

Ua riro te mau ohipa naʻinaʻi i te mau mahana atoa ei mau taahiraa i niʻa i te eʻa no te riroraa mai to tatou Faaora te huru. A feruri i teie atu â mau ohipa no te tauturu ia outou ia faatupu i te mau huru o te Mesia :

• A taiʻo i te mau irava i tapurahia i roto i te Arataʻi faahoro tumu parau (Topical guide) e aore râ, i roto i te Arataʻi faahoro papaʻiraa moʻa (Guide des écritures) no niʻa i te huru ta outou e imi nei ia faatupu.

• A pure i te mau mahana atoa no te ani i te hinaaro ia taui e i te puai no te haamaitai.

• A papaʻi i te hoê buka aamu no te tapaʻo i to outou haereraa i mua.

• A paraparau i to outou na metua. A faaite ia raua i ta outou mau opuaraa ia nehenehe ia raua ia tauturu mai ia outou.

A Tomo i roto i te paraparauraa

I roto i te avaʻe atopa, e tuatapapa outou no niʻa i te huru no te riroraa mai te Mesia te huru (mai te mea e, ua farii ta outou paroisa e aore râ, ta outou amaa i te mau haapiiraa apî i roto i to outou reo). Ia hope ta outou taiʻoraa i teie parau papaʻi, a maʻiti na roto i te pure i te hoê huru o ta outou e faaohipa i teie hepetoma e aore râ, i teie avaʻe. E nehenehe ta outou e haamau i te hoê opuaraa e i muri iho, a hiʻopoʻa i to outou haereraa i mua. Ei hiʻoraa, ua rahi atu anei to outou huru aroha i te taata e aore râ, to outou haapaʻo e aore râ, to outou faaoromai ? E mea nahea ta outou opuaraa ia rahi atu to outou huru Mesia, i te tautururaa ia outou ia upootiʻa i niʻa i te mau fifi ? A feruri ia faaite i to outou iteraa i te tahi atu feia apî e aore râ, i to outou utuafare.

Te mau haapiiraa no te sabati

Parau tumu no teie avaʻe : Ia rahi atu te riroraa mai te Mesia te huru