Te horoʻa a Jen
Te ora nei te taata papaʻi i Utaha, te mau Hau Amui no Marite.
Ua rave au i te tahi mau maʻitiraa hape i ta’u matahiti piti i te haapiiraa tuarua. Ua arataʻi te reira mau maʻitiraa i roto i te mau hopearaa fifi roa e te oaoa ore, e ua faaoti aʻera vau ia faaohipa i ta’u tau faafaaearaa no te haamata i te taui. Ia haamata faahou aʻera te haapiiraa, ua tamaa vau i te avatea i roto i te hoê piha hopuraa pape, e aore râ, i roto i te hoê aroa taata ore ia ore ia tupu mai te mau auraa iino o te tiaʻi noa ra ia’u ia na reira faahou.
Aita â vau i manaʻo otahi aʻenei mai teie te huru.
E ua horoʻa mai ra te Atua i te hoê horoʻa ia’u : ua tono mai oia ia Jen. Aita roa’tu oia i faahapa ia’u i ta’u mau hapa, ua faaitoito mai râ oia ia’u ia tamau noa i te haere i roto i te aveiʻa ti‘a. Na to’u ite e, e haere mai oia i te haapiiraa, i tauturu ia’u ia tamau noa i te taiʻo i ta’u mau papaʻiraa moʻa e ia aupuru i to’u iteraa papû. Ia tae aʻera i te taime no te haafetiaraa, ua parau vau ia’u iho e, ua fafau roa vau e taui.
Te uiui nei te mana‘o i te tahi taime e, tei hea ïa vau i teie mahana ahani e, aita o Jen i haere mai e farerei ia’u. E haapaʻo anei au i ta’u mau parau tumu ahiri e, aita oia ? Auaʻe râ, e ore roa vau e ite, no te mea, tei reira oia e toʻna aau atoa, ua ineine e ua hinaaro mau e tauturu ia’u.