Tei te fare au

Steven Sainsbury, California, te mau Hau Amui no Marite

Ei tuhaa no te hoê ohipa totauturu, ua ratere atu vau i Rwanda e te tahi mau taote no te tauturu i te rapaauraa i te taata. E piti hepetoma i muri iho, i te pae hopea o to’u tere, ua haamata vau i te mihi i te fenua. Ua mihi au i to’u utuafare, i to’u roʻi au maitai, e i to’u fare.

I ta’u Sabati hopea i Afirita, ua tiʻa ia’u ia faanaho i ta’u tarena ohipa ia nehenehe ta’u e haere i te pureraa. Noa’tu e, aitâ te Ekalesia i ite-papû-hia i Rwanda, ua itehia ia’u i niʻa i te Itenati i te hora pureraa e te mau arataʻiraa no te puromu.

Teie hoʻi taua mau arataʻiraa ra no te puromu : « A haere na niʻa i te purumu timahia e tae atu i mua i te fare faatereraa hau. A imi i te hoê opani aua matara. I muri iho a pou i te mau e‘a ».

A pee ai au i teie mau arataʻiraa, ua haamata aʻera vau i te faaroo i te hoê reo himene matarohia. Ua pou vau i te mau e‘a, e ua faaroo aʻera vau i te mau parau ra no te himene « Auê te Paari » (Te mau himene, no. 41). Ua tae atu vau i te hoê fare naʻinaʻi, tei reira te tahi tau taata rii te apapa ra i mua i te uputa tomoraa. Noa’tu e, e taata ê au no teie amuiraa, mai te mea ra i roto ia’u e, ua fetii au ia ratou. E rave rahi taeaʻe e te tuahine no Rwanda tei haere mai e aroha rima ia’u, e i taua taime ra, ua pee ê te teimaha o te vai-otahi-raa tei niʻa ia’u—tei te fare au !

A tomo ai au i roto i te fare, ua faaea vau i roto i na hora pureraa e toru i matarohia, aita i taa ê i te mau pureraa e faatupuhia i roto i ta’u paroisa i Carifonia. Ua opere te Autahuʻaraa a Aarona i te oroʻa moʻa, ua faatumuhia te mau aʻoraa i niʻa i te Faaora, e tae noa’tu i te haapiiraa no te Haapiiraa Sabati, hoê â huru e te haapiiraa i haapiihia i roto i ta’u paroisa i taua hepetoma ra.

Te mea faufaa roa’tu, ua itehia te Varua o te Fatu i roto i te mau pureraa atoa. Papû maitai e, ua ataata mai te Fatu i niʻa i teie mau taata maitai o te tamata nei i te tavini Ia’na ia au i te maraa ia ratou. Ua faaroo vau e, i te matahiti i maʻiri aʻenei, e mea iti roa te taata no Rwanda i haere mai i te pureraa i ô nei. Areʻa râ, ua taiʻo vau e, ua hau i te 100 taata tei tae mai, te afaraa e mau tamarii mata ataata.

I teie nei, ua matara Rwanda no te ohipa misionare, no reira, te manaʻo nei au e, e manuïa rahi roa te mau misionare na roto i te faaiteraa te Varua i te rahiraa o te mau taata imi no Rwanda e, te Ekalesia i faahoʻi-faahou-hia mai, o te basileia ïa o te Atua no te ao taatoa nei—no te mau fenua atoa, no te mau taata atoa, e no te mau tamarii atoa a te Atua. Auê hoʻi to’u mauruuru no te Ekalesia, i Califonia ropu anei e aore râ, i raro mai i te purumu timahia i Afirita ropu.