Stap Kam Wan Man blong Pis
Tempol, misin, mo seves i bin helpem Roja mo famle blong hem blong muv blong kam wan famle we i no save finis.
Roja Randrianarison i bin save se wan samting i no stap insaed long famle laef blong hem.
Hem i talem: “Mi prea long God blong helpem mi blong faenem wan samting blong lidim famle blong mi. Mi wantem blong lidim famle blong mi blong mekem wan gud samting, wan samting we bae i lidim mifala i go long stret rod.”
Hem i stap wari long olsem wanem nao bae hem i lukaotem ol trifala pikinini blong hem—tufala boe, Radrianandri mo Sedinirina, mo gel blong tufala, Nirina. Hem i no hapi from se sotkat fasin bong hem i bin lidim olgeta blong gat ol jalenj insaed long famle. Hem i bin wantem blong stap wan papa we i moa kaen.
“Mi disaed se, mi nao, bae mi mas jenis from mi bin luk se mi bin kam wanem kaen man,” hem i talem.
Sam yia bifo, Roja i bin lusum bisnis blong hem blong bildim ol haos mo i bin stap wok olsem wan taksi draeva long Antananariva, long Madagaska. Wan dei, hem i pikimap tufala sista misinari.
Hem i talem: “Taem tufala i sidaon long trak, tufala i askem nem blong mi mo sapos mi gat wan famle. Tufala i askem sapos mi bin save se huia God mo sapos mi bin stap prea long Hem.”
Tufala misinari i bin singsing ol singsing wetem Roja long taem we trak i ron mo tufala i bin invaetem hem i kam long jos. Hem i bin traem blong go plante taem, be hem i neva save putum taem blong go long jos from wok blong hem, mo hem i lusum kontak wetem tufala misinari.
Samples faef manis afta, Roja i bin stap wok long haos blong hem wan dei, mo hem i harem tufala misinari i stap toktok long wan man aotsaed long fanis blong hem. Roja i save se bae oli kam toktok long hem. Hem i filim se bae hem i mas ansa yes long eni kwestin we bae tufala i askem.
Nao tufala misinari i talemaot nem blong tufala, mo tufala i bin askem hem sapos hem i save abaot God. Yes. ?Sapos hem i wantem blong prea long God? Yes. ?Sapos hem i wantem toktok wetem ol misinari? Yes. ?Wetaem? Naoia. Tufala misinari i talem se bae tufala i kambak long 20 minit taem. Taem tufala i kambak, tufala i tekem wan memba wetem tufala we haos blong hem i stap kolosap.
Tufala misinari i bin tijim Roja plante taem long wan manis, insaed long hom blong hem. From ol samting we oli bin harem abaot Jos, haf blong famle i no wantem stadi wetem ol misinari. Afta long longfala manis blong lanem gospel, Roja i go long Jos wetem ol misinari. Olsem wanem oli bin welkamem hem i bin tajem hem bigwan. “Ol memba oli welkamem mi olsem se oli bin save mi blong longtaem finis,” hem i talem.
Afta long Jos, Roja i gobak long haos blong hem mo talem long famle blong hem se bae hem i baptaes long wan manis taem, mo olgeta oli fri blong oli jusum blong joenem Jos o nogat. Famle i bin askem hem blong hem i wet blong mekem se oli save joenem hem. Oli stat blong go long ol miting blong jos, mo olgeta tu, oli bin sapraes gud.
Long fas taem we boe blong Roja, Randrianadri, i go long wan miting blong Jos, i bin tajem hem. Hem i talem: “Fas taem we mi kam long Jos, mi sapraes tumas from se ol pipol oli gat tingting i stap daon. Faswan, oli dresap gud blong kam long Jos. Afta, mi luksave se oli stap long Jos from wan samting, be i no jes blong stap soemaot olgeta long ol narafala pipol.”
Famle Randrianarison i baptaes olsem wan famle long 20 Febware 2003. Long tetaem ia, Nirina i gat 8 yia, Sedinirina i gat 17 yia, mo Randrianadri i gat 19 yia. Famle i stop blong wok long ol Sandei, mo oli bin mekem fasin blong laef folem gospel i kam faswan long laef.
Ol Jenis
“Afta we mi baptaes, mi bin luk plante jenis insaed long hom blong mifala,” Arelina i talem, we i waef blong Roja. “Hem i kam wan hom we Spirit i stap, mo plante blesing, tugeta blong taem ia long wol mo long saed blong spirit i bin kam from mifala i laef folem gospel.”
Long lukluk long saed blong laef long wol, Roja i talem se Papa long Heven i bin helpem hem blong bildimbak bisnis blong hem. Afta long 2 yia we hem i dreavem taksi mo mekem ol narafala smol wok we hem i save mekem blong lukluk long famle blong hem, hem i stat blong kasem ol kontrak blong bildim haos. Hem i talem: “Mi biliv se God i blesem mi oltaem taem mi disaed blong folem Hem.”
Be ol boe blong hem oli talem se bigfala jenis we oli bin luk long papa blong olgeta, hem i fasin blong papa blong olgeta. Naoia, oli talem se papa blong olgeta i wan eksampol blong tingting i stap daon mo fasin we i kaen. Roja i talem se gospel i winim tingting blong hem se hem i mas jenisim hem. Stat long taem we hem i stat blong stadi long gospel, Roja i bin traem blong fulumap laef blong hem wetem ol gudfala samting.
Hem i talem: “From ol tijing blong gospel, mi neva gat wan sotkaen maen bakegen. Samtaem, i gat samting i kam temtem mi, be gospel i stap long hat blong mi, long hed blong mi, mo long spirit blong mi. Hem i helpem mi blong mi stap kwaet.”
Taem ol situesen i kam antap we hem i no harem gud long olgeta, Roja nao i stap blong mekem ol memba blong famle oli putum tingting i go daon, mo i talem bakegen long olgeta blong mekem samting semmak olsem we Sevya bae i mekem.
“Papa blong mi i kam blong putum tingting i stap daon, mo naoia, hem i keagud long famle blong mifala wetem lav,” Sedinirina i talem. “Taem mi luk jenis long fasin blong hem, mi talem tangkyu tumas long Papa long Heven, from gospel, mo blong stap olsem ol memba blong Jos.”
Wan Famle we I No Save Finis
Long 2006, wetem help blong Jeneral Sapot Mane blong Memba we I Go long Tempol, Roja mo Arelina i bin go long Johanesbeg, long Afrika, blong tufala i sil insaed long tempol.
Long 2009 i go kasem 2011, Sedinirina mo Randrianandri i bin go long misin long Saot Afrika—Sedinirina i go long Kep Taon, mo Randrianandri i go long Johanesbeg. Pat blong tingting blong olgeta blong givim seces i blong helpem ol narafala famle blong oli jenisim laef blong olgeta, semmak olsem famle blong olgeta i bin mekem.
“Wan merikel olsem i save hapen; mo i bin hapen from ol misinari oli bin kam long haos blong mifala,” Randrianandri i talem. “Mekem se mi wantem tumas blong mekem sem samting long wan famle, samples.”
Desisen ia i tekem wan nara blesing i go long Randrianarison famle. I bin gat wan taem blong naen dei, we tufala tugeta, Sedinirina mo Randrianandri, bae tufala i stap long Johanesbeg Misinari Trening Senta. Roja i bin mekem se bae oli flae long plen, i go long Saot Afrika wetem Arelina mo gel blong tufala, Nirina, blong mekem se ful famle i save sil insaed long tempol. Nirina, we i gat 14 yia long taem ia, i bin talem se i had blong tokbaot eksperiens ia, mo wanem hem i bin filim.
Hem i talem: “Hemia i mekem fet blong mi i kam strong moa, mo i bin helpem mi blong filim kolosap moa long God.”
Tedei, ol memba blong famle oli wok blong bildim mo mekem olgeta we oli stap raonabaot long olgeta oli kam strong moa. Roja i stap olsem bisop blong wod blong hem. Arelina i wok long Praemeri wetem program blong Fet long God. Sedinirina i wan asisten stek klak. Randrianandri i wan asisten wod klak. Nirina i wod miusik daerekta.
Gospel i bin wan ansa long ol prea blong Randrianarison hom. Hem i hilim ol soa we i open longtaem, i mekem olgeta oli kam kolosap moa, mo i bin givim janis long olgeta blong stap tugeta blong oltaem. Hem i tijim Roja blong lavem man. “Famle laef,” hem i talem, “i wan laef we i fulap long lav.”
Taem hem i pikimap ol misinari long taksi trak blong hem, Roja Andrianarison i putum hem long rod blong kam olsem wan disaepol.
Ol foto blong Randrianarison famle i kam long Matiu D. Fliton
Blong stadi long gospel olsem wan famle i bin helpem Randrianarison famle blong gro kolosap tugeta.
Blong travel i go long Saot Afrika blong sil long Johanesbeg Tempol i mekem Randrianarison famle i kam strong moa.
Antap: foto i kam long Deved William Niuman © IRI; andanit: foto © Lora Peka