Jodikdik ro
Iaar Maron̄ Joļo̧k Būrom̧ōj eo Aō
Rijeje eo ej jān Taiwan.
Ke ro m̧ōtta Brother Chen im lio pāleen raar peptaij n̄an ward eo am, iaar kanooj m̧ōņōņō. Juon iiō ālkin peptaij eo aer, raar liāp ilo tampeļ, im ļaddik eo nejier eo eaar mej m̧okta jān aer kobatok ilo Kabun̄ in eaar liāp ippāer. Eaar aiboojoj n̄an lo an Chen rein eddōkļo̧k ilo ko̧jpeļ in.
Innām Brother Chen eaar mej ilo juon itaak in wa iiō eo tok juon. Ālkin itaak eo, mej eo an eaar āinwōt iien otemjeļo̧k pād ilo ļōmņak eo aō im emakijkij aō ettōņak kake. Iaar ruj im jan̄ im kar kajjitōk im bar kajjitōk, “Etke? Etke Irooj eaar kōtļo̧k bwe kain jorrāān in en waļo̧k? Etke kain menin in eaar waļo̧k n̄an baam̧le em̧m̧anm̧ōņ in?” Juon raan, ke iaar kakkōt kōn kajjitōk kein, iaar bōk juon bok in kein katakin im riiti naan kein jān Būreejtōn Spencer W. Kimball (1895–1985):
“Eļan̄n̄e jej ļōmņak bwe mour in eaar juon wōt m̧ōttan ad mour, innām metak, būrom̧ōj, im likjab, im mour kadu in enaaj kar nana kōjellin. Bōtaab eļan̄n̄e jej kalimjōk mour āinwōt juon men indeeo ej ļapļo̧k n̄an mour eo m̧okta im n̄an mour eo ālkin mej, innām aolep men rej waļo̧k remaron̄ in pād ilo jekjek ko rekkar. …
“Jejjab ke lokjak n̄an kapo ko n̄an idajon̄jon̄e kajoor eo ad, nan̄inmej me jemaron̄ katak kijenmej, lokjak n̄an mej me jemaron̄ in erom jab wabanban im aiboojoj?”1
Ilo tōre eo, iaar kālet n̄an kōtļo̧k būromōj eo aō im kalimjōk kallim̧ur eo im tokālik eo ekkar. Iaar lo ilo kōļmenļo̧kjeņ eo aō make bwe Brother Chen ej m̧ōņōņō in koba ippān baam̧le eo an. Loļo̧kjeņ in eaar bōktok n̄an eō aenōm̧m̧an. Ijeļā bwe Jemedwōj Ilan̄ enaaj letok n̄an kōj māletlet im peran eo n̄an jelm̧ae apan̄ ko.