Bakit Kasal sa Templo?

Ni Joshua J. Perkey

Napakaraming beses nating pinag-uusapan ang tungkol sa kasal sa templo sa Simbahan. Naiisip ba ninyo ang dahilan?

Maraming pag-uusap kamakailan tungkol sa kasal—kung ano ito, kung bakit mayroon tayo nito, ano ang papel nito sa lipunan. Sa simbahan napakaraming beses nating pinag-uusapan ang tungkol sa kasal sa templo. Alam ninyo na mahalaga ito dahil narinig na ninyo ito mula noong unang ituro sa inyo ang tungkol sa ebanghelyo, kayo man ay isang Sunbeam o bagong binyag na kabataan.

Ngunit maaaring iniisip ng ilan sa inyo, “Bakit?” Sa inyo, maaaring ito ay higit pa sa tanong na kung ano talaga ang kasal sa templo. Gusto ninyong malaman—sa inyong puso, hindi lamang sa inyong isipan—kung bakit kailangan ninyong magsumigasig nang husto upang maikasal sa templo, lalo na kung ang kasal bilang ideya at institusyon ay tila humihina na sa mga lipunan sa iba’t ibang panig ng mundo.

Mangyari pa, nagsisimula ito sa doktrina tungkol sa pamilya.

Ang Doktrina Tungkol sa Pamilya

Ginagamit natin ang katagang doktrina para makatulong sa pagtukoy sa maraming bagay sa Simbahan. Halimbawa, binigyang-kahulugan sa Gabay sa mga Banal na Kasulatan ang doktrina ni Cristo bilang “mga alituntunin at aral ng ebanghelyo ni Jesucristo.”¹ Kaya ano ang ibig nating sabihin kapag pinag-uusapan natin ang doktrina tungkol sa pamilya o doktrina tungkol sa walang hanggang kasal?

Isinasaad sa “Ang Mag-anak: Isang Pagpapahayag sa Mundo” na “Ang Kasal sa pagitan ng isang lalaki at ng isang babae ay inorden ng Diyos at … ang mag-anak ang sentro ng plano ng Tagapaglikha para sa walang hanggang tadhana ng Kanyang mga anak.”² Sa madaling salita, kapag pinag-uusapan natin kung bakit tayo narito sa lupa at ano ang dapat nating gawin at kahinatnan, ang lahat ng ito ay nakaugnay sa ideya na tayo ay bahagi ng isang pamilya at maaaring magpakasal at bumuo ng sariling pamilya.

Isinasaad rin sa pagpapahayag tungkol sa pamilya: “Ang plano ng kaligayahan ng Diyos ang nagpapahintulot sa mga ugnayan ng mag-anak na magpatuloy sa kabilang-buhay. Ang mga banal na ordenansa at tipan na makukuha sa mga banal na templo ang nagbibigay ng pagkakataon sa mga tao na makabalik sa kinaroroonan ng Diyos at upang ang mga mag-anak ay magkasama-sama sa walang-hanggan.”³

Ngunit ano ang mangyayari sa ating mga pamilya kapag namatay tayo? Kung kayo ay ikinasal sa batas ng inyong estado o bansa, ang batas bang iyan ay may karapatan sa inyo kapag kayo ay namatay? Wala, dahil ang mga batas na iyon ay gawa ng tao at may karapatan lamang hangga’t nabubuhay kayo sa ilalim ng awtoridad na iyan. Para magpatuloy ang ugnayan ng mag-asawa sa kabilang-buhay, ang mga kasal na iyon ay dapat mabuklod sa tamang lugar ng taong may awtoridad na mananatili hanggang sa kawalang-hanggan. Ang lugar na iyan ay ang templo, at ang awtoridad na iyan ay ang priesthood (tingnan sa D at T 132:7, 15–19). Sa pagpili ng kasal sa templo at pagtupad sa mga tipang iyon, pinipili ninyong mabuhay magpakailanman kasama ang inyong asawa.

Ang Dahilan Kung Bakit Tayo Nagmamalasakit

Marahil alam na ninyo ang doktrinang iyan, ngunit iniisip pa rin ninyo, “Pero ano pa ang ibang dahilan kung bakit napakahalaga nito?” Siguro ay hindi ito tungkol sa pag-unawa sa doktrina. Marahil ito ay mas simpleng tanong kung ano ang kahulugan ng kasal at pamilya sa inyong puso. Ang simpleng sagot ay makakamtan natin ang pinakamalaking kaligayahan at kagalakan sa pamamagitan ng pamumuhay ng ebanghelyo at pagpapakasal sa templo at pagpapatatag nito.

Sa pangkalahatang kumperensya ng Abril 2013, ipinaliwanag ni Elder L. Whitney Clayton ng Panguluhan ng Pitumpu ang ganito: “Wala nang iba pang uri ng ugnayan na makapagdudulot ng malaking kagalakan, magpapaibayo ng higit na kabutihan, o higit na kadalisayan ng sarili.”⁴

Alam din natin na ang “kaligayahan sa buhay ng mag-anak ay lalong higit na makakamit kapag isinalig sa mga turo ng Panginoong Jesucristo.”⁵

Kung pag-iisipan ninyo ito, mag-uukol kayo ng malaking bahagi sa inyong buhay sa paghahanda para sa malalaking pagbabago na darating. Nariyan ang binyag, pagtatapos sa Primary tungo sa Young Men o Young Women, pagdalo sa templo, at pakikibahagi sa pagsasaliksik ng family history at pagsasagawa ng mga ordenansa sa templo para sa inyong mga ninuno. Para sa mga kabataang lalaki, nariyan ang pagtanggap ng priesthood at pagsulong sa mga katungkulan sa priesthood. Para sa mga kabataang babae, nariyan ang pagsulong sa mga klase ng Young Women. Nariyan din ang high school graduation o katumbas nito. At ngayon maaari nang magmisyon sa edad na 18 o 19. Napakaraming paghahandaan at inaasam.

Ngunit ang pinakamahalagang tipan na paghahandaan natin ay ang mabuklod sa templo. Kapag namumuhay ayon sa plano ng kaligayahan ang bawat miyembro ng pamilya at tinutupad ang kanilang mga tipan sa templo, nararanasan nila ang tunay na kagalakan.

Ang ebanghelyo ang lahat-lahat sa buhay. Ito ang talagang dahilan kaya tayo narito. Kapag sinusunod natin ang landas ng ebanghelyo, humahantong ito sa kagalakan. At ang landas na iyan ay hahantong sa kasal sa templo, sa buhay mang ito o sa buhay na darating. Walang mga pagpapalang ipagkakait sa matatapat na anak ng Ama.

Ipinayo ni Elder Bruce R. McConkie (1915–85) ng Korum ng Labindalawang Apostol, “Ang isang pinakamahalagang bagay na gagawin ng sinumang Banal sa mga Huling Araw sa mundong ito ay magpakasal sa tamang tao, sa tamang lugar, sa tamang awtoridad.”⁶

Mga Tala

1. Gabay sa mga Banal na Kasulatan, “Doktrina ni Cristo,” scriptures.lds.org.

2. “Ang Mag-anak: Isang Pagpapahayag sa Mundo,” Liahona, Nob. 2010, 129.

3. “Ang Mag-anak,” Liahona, Nob. 2010, 129.

4. L. Whitney Clayton, “Pagsasama ng Mag-asawa: Magmasid at Matuto,” Liahona, Mayo 2013, 83.

5. “Ang Mag-anak,” Liahona, Nob. 2010, 129.

6. Bruce R. McConkie, “Agency or Inspiration?” New Era, Ene. 1975, 38; tingnan din sa Thomas S. Monson, “Whom Shall I Marry?” New Era, Okt. 2004, 6.

Ang Kagalakan ng Pag-aasawa

Ang ilang kagalakang dulot ng pag-aasawa ay kinabibilangan ng:

Tiwala at Suporta. Kapag nag-asawa na kayo, kasama na ninyo ang isang taong magpapasaya sa inyo at maghihikayat sa inyo na gawin ang tama, magpapasigla sa inyo sa bawat araw, at makikibahagi sa lahat ng inyong kagalakan at kalungkutan.

Mga Anak. Nagdudulot ng malaking kagalakan ang pagkatiwalaan kayo na pangalagaan at arugain ang mga anak ng Ama sa Langit.

Pagbabahagi. Malaking pagpapala ang maging bahagi sa buhay ng ibang tao at balang-araw sa buhay rin ng mga anak. Ang tagumpay ninyong mag-asawa ay nagiging tagumpay ng buong pamilya. Ang pagbuo ng magagandang alaala nang magkasama ay nagdaragdag ng mas malalim na kahulugan sa buhay.

Payo. Ang asawa ay makapagbibigay sa inyo ng mabuti at tapat na payo, at mapagkakatiwalaan ninyo ito dahil alam ninyo na ito ay mula sa isang tao na ang tanging hangarin ay ang inyong kapakanan.

Lakas. Mas malakas ang dalawa kaysa isa. Maaari ninyong palakasin at tulungan ang isa’t isa na ipamuhay nang lubos ang ebanghelyo.

Tawanan. Kapag kilalang-kilala ninyo ang isang tao at talagang nagtitiwala kayo sa isa’t isa, magiging masaya ang buhay na puno ng tawanan at katuwaan.

Pagmamahal. Ang masabihan sa bawat araw na mahal kayo ay nagpapasigla at nagpapasaya.

Paglilingkod. May malaking kagalakan sa paglilingkod sa isa’t isa at lalo na kapag ginagawa ninyo ito sa isang taong mahal ninyo.

Pagkakaibigan. Nariyan palagi ang isang tao na sasamahan ka sa hirap at ginhawa.

Pagtitiwala. Nakakapanatag na malaman na kasama ninyo ang isang tao na palaging hangad ang pinakamabuti para sa inyo at na makapagsasabi kayo sa kanya nang walang pangamba.

Pisikal at Emosyonal na Intimasiya. Ang kasal ay isang natatanging ugnayan kung saan ibinibigkis ng Panginoon ang dalawang tao sa isang walang hanggang ugnayan na ang mga mithiin ay kinabibilangan ng pagkakaisa, pagsasama, at kagalakan.

Sumali sa Usapan

Sa buong buwan ng Agosto, pag-aaralan ninyo ang tungkol sa kasal at pamilya sa inyong mga korum ng priesthood at mga klase sa Young Women at Sunday School. Ang isa sa mahahalagang doktrina tungkol sa pamilya ay na sa pamamagitan ng kasal sa templo, ang pamilya ay maaaring mabuklod nang magkakasama upang makapiling muli ang pamilya matapos ang pagkabuhay na mag-uli.

Matapos basahin ang artikulong ito, isipin kung paano naiiba ang inyong buhay dahil maaari kayong mabuklod sa inyong asawa sa templo. Isipin din kung paano ito nakakaapekto sa inyong mga desisyon ngayon at kung ano ang ginagawa ninyo upang maghanda para sa kasal sa templo. Isulat ang inyong nadarama at isiping ibahagi ang mga ito sa iba sa pamamagitan ng pagpapatotoo sa inyong pamilya, sa simbahan sa araw ng Linggo, o sa social media.

Mga Aralin sa Linggo

Mga Paksa sa Buwang ito: Kasal at Pamilya