Kinahanglan Kitang Mag-ampo—Karon!
Ni Jeffery R. McMahon, Alberta, Canada
Ang among pamilya namauli gikan sa usa ka pagbiyahe ngadto sa Peace River, Alberta, Canada, mga lima ka oras gikan sa among panimalay sa Edmonton. Ngitngit na ang amihanang lugar, ug bisan tuod nag-snow sa among atubangan diha sa karsada, ang tanan daw malinawon ug kalma sulod sa among van.
Diha-diha dayon may makapabalaka nga pasidaan nga siga diha sa dashboard. Kausa pa ko kakita ini kaniadto, dugay na kaayo, ug karon nahadlok ko sa mahitabo. Dali nakong gipalung ang wala kinahanglana nga power, apan sa wala madugay napalong ang makina. Nasayud ko nga kami mibiyahe na og pipila ka kilometro gikan sa katapusan nga nalabyang lungsod, ug mas layo pa among biyahian para sa sunod nga lungsod. Wala gani ko kahinumdom nga may nasugatan mi nga sakyanan.
Samtang desperado mi nga naghunahuna sa among mga opsyon, ang among 11 anyos nga anak, si Casson, miingon, “Kinahanglan tang mag-ampo—karon!” Wala pa dangti og tulo ka bulan, si Casson nasagmuyo sa pagkamatay sa iyang manghud, tungod sa kanser. Pila kaha ka mga pag-ampo ang gipaabut ni Casson ngadto sa langit samtang siya naningkamot sa pagsabut nganong namatay iyang bugtong igsoong lalaki?
Ang akong asawa ug ako dili sigurado kon iya ba gyung nasabtan ang among pagpasabut nga ang atong mga pag-ampo kinahanglang nahiuyon sa kabubut-on sa Langitnong Amahan ug dili sa atong mga tinguha. Gihapon, siya nagpakita kanamo nga kinahanglang moduol sa Langitnong Amahan ug magpadayon sa pagbaton og hugot nga pagtuo diha Kaniya.
Sa wala madugay human sa among pag-ampo, adunay mga headlight sa sakyanan nga nagpadulong namo mikidlap sa rearview mirror. Mga segundo lang usa ka taas nga flatbed trak padulong sa Edmonton mihunong sa among atubangan.
Samtang ako ug ang drayber miduol sa usag usa, siya nangutana sa klaro nga linitokang French Canadian, “May mga bata ba sa van?” Dihang giingnan ko siya og oo, miingon siya nga nakalabay siya og laing naaberiya nga sakyanan pipila ka milya gikan kanamo apan wala mohunong tungod sa dili maayo nga panahon. Hinoon, samtang nagkaduol siya namo, siya mibati nga duna mi mga bata nga nagkinahanglan og tabang. Busa, mihunong siya.
Sulod sa pipila ka minuto giguroy ang among sakyanan sa iyang trak, ug kami padulong sa Edmonton. Bugnaw kadto nga biyahe sa luyo, apan mibati mi og kainit tungod sa matam-is nga kasigurohan nga ang Langitnong Amahan maminaw sa mga pag-ampo. Usahay ang mga tubag moabut nga wala nato mahunahuna, ug usahay ang mga tubag gamhanan ug direkta kay sa atong gihunahuna. Kinahanglan lang ta magbaton og hugot nga pagtuo ug pagsalig sa Ginoo.