Ang Dili Maayo nga Salida
“Mobasa ug motan-aw lamang ako sa mga butang nga makapahimuot sa Langitnong Amahan” (Akong mga Sumbanan sa Ebanghelyo).
Sa dihang si Evelyn nakakita sa ngalan sa salida, ang iyang kasingkasing nagsugod sa pagkulba.
“Class, duna koy surprisa kaninyo,” miingon si Mrs. Taylor samtang siya nagpaingon sa atubangan sa kwarto.
Si Evelyn mitan-aw sa iyang eksamin, nagngisi. Dihay grado nga usa ka dakong “A+” sa ibabaw.
“Maayo ang resulta sa eksamin ninyong tanan nga ugma kita manan-aw og salida isip ganti,” miingon si Mrs. Taylor, nagsulat og tulo ka mga ulohan sa salida sa pisara. “Ania ang mga opsyon nga atong pilian,” iyang giingnan ang tanan nga nalipay.
Nauknol si Evelyn sa iyang lingkuranan, naningkamot nga makakita kon unsa ang mga ulohan. Ang unang duha ka salida mao ang iyang mga paborito. Mipaduol siya sa iyang amiga nga si Katy. “Unsay imong botaran?”
“Sigurado ang ikatulo,” miingon si Katy. “Ang akong mga ginikanan wala motugot nga motan-aw kami niini, mao nga wala gyud ko makakita niini.”
Mitan-aw si Evelyn sa pisara pag-usab ug nakita ang ngalan sa ikatulo nga salida. Ang iyang kasingkasing misugod sa pagkulba. Si Evelyn nakadungog niini nga salida, ug siya nasayud nga dili maayo ang iyang bation sa pagtan-aw niini. Unsa kon ang iyang klase mobotar niini?
“Kinsa ang gusto nga mobotar sa opsyon 1?” Nangutana si Mrs. Taylor.
Gipataas ni Evelyn ang iyang kamot ug mitan-aw sa palibut. Gipaak niya ang iyang ngabil sa kakulba. Duha lamang ka laing mga tawo ang mibotar.
Gi-tally kini ni Mrs. Taylor sa pisara. “Opsyon 2?”
Nahugno ang kasingkasing ni Evelyn. Tulo lang ka kamot ang mipataas.
“Ug opsyon 3?”
Kinse ka kamot ang mipataas. Nabusdak si Evelyn sa iyang lingkuranan, naglain ang iyang tiyan. Unsaon niya nga dili makatan-aw sa salida kon ang tanan gusto niini?
Sa iyang pag-abut sa balay, midiretso si Evelyn sa iyang kwarto ug kusog kaayong mihagbong sa iyang backpack sa salog. Gibati niya nga morag nasakit sa tibuok adlaw. “Maayo pa og tinuod unta kong nasakit,” naghunahuna siya. “Aron dili ko moadto sa eskwelahan ugma.”
Gikuha ni Evelyn ang iyang eksamin sa iyang backpack ug gitan-aw kini, gigunitan kini. “Ang salida usa unta ka ganti, dili silot!” siya naghunahuna, masuk-anong gikumot ang eksamin ug gisuksok ilawom sa iyang higdaanan. Mga luha milugmaw sa iyang mga mata. Miluhod siya kilid sa iyang higdaanan ug misugod sa paghilak. Dayon misugod siya sa pag-ampo. Naglisud siya sa pagsulti og pipila ka pulong, naghangyo sa Langitnong Amahan sa pagkuha sa problema, apan wala madugay nausab ang iyang pag-ampo. “Palihug tabangi ko sa paghimo niini nga mas maayo. Dili ko gusto nga motan-aw og salida nga dili maayo ang akong bation, ug manghinaut ko nga ang akong mga higala ug magtutudlo makasabut.”
Nahuman ang pag-ampo ni Evelyn. Ang pagpangurog ug ang gibating dili maayo nawala. Siya wala gani mobati og kahadlok.
Mibarug, migawas si Evelyn sa iyang kwarto aron sa pagpangita ni Mama. Duna siyay ideya.
Pagkasunod adlaw, misulod si Evelyn sa klase. Sa usa ka kamot naggunit siya og sulat gikan ni Mama nagpasabut nga dili komportable si Evelyn sa pagtan-aw sa salida. Sa pikas kamot nagdala siya og tulo niya ka paborito nga mga salida. Gitunol ni Evelyn ang mubo nga sulat ngadto ni Mrs. Taylor ug mitan-aw kaniya nga nagbasa niini.
“Salamat sa pagsulti nako unsay imong gibati,” miingon si Mrs. Taylor.
“Miingon ang akong mama nga Ok ra nako nga moadto sa laing klase samtang nagsalida pa,” miingon si Evelyn. “Apan nagdala usab ako og laing mga salida in kaso kon ang tanan gustong motan-aw og lain.”
Mipahiyom si Mrs. Taylor ug gikuha ang pundok sa mga salida. “Ang salida dili usa ka ganti kon kitang tanan dili malingaw niini,” siya miingon.
Misulat si Mrs. Taylor og bag-ong mga salida sa pisara. “Class, gusto kong mobotar pag-usab sa salida karon. Duna koy pipila ka bag-ong mga opsyon alang ninyo.”
Si Evelyn milingkod sa iyang desk, malipayon nga makaapil na siya sa ganti sa klase. Apan ang labing maayo nga ganti sa tanan mao ang pagkasayud nga ang Langitnong Amahan mikuha sa iyang kahadlok ug mihatag kaniya og kaisug sa pagbuhat unsay matarung.
Paghulagway pinaagi ni Brad Teare