ʻEletā Ulisses Soares
ʻO e Kau Palesitenisī ʻo e Kau Fitungofulú
Kuo siotonu ʻa ʻEletā ʻUlasesi Soalesi, ʻa ia ne kamata ngāue ʻi he Kau Palesitenisī ʻo e Kau Fitungofulú ʻi Sānuali 2013, ʻi he tupulaki vave ʻa e Siasí ʻi ha ngaahi tapa kehekehe ʻo e māmaní.
Naʻe fāʻeleʻi ʻa ʻEletā Soalesi ʻi Sao Paulo ʻi Palāsila, ʻi ʻOkatopa 1958. Naʻe kau ʻene ongomatuʻá, ʻa ʻApalesito mo Meseti Soalesi, ki he Siasí ʻi heʻene kei taʻu nimá. Naʻa nau maʻu lotu ʻi ha loki ʻi ʻolunga ʻi ha fale taʻo mā. ʻOku manatuʻi ʻe ʻEletā Soalesi ʻa e loto vēkeveke naʻá ne maʻu ʻi heʻene kei taʻu valú he taimi naʻe fokotuʻu ai ʻa e fuofua siteiki ʻi Saute ʻAmeliká, ʻi Sao Paulo he 1966. Naʻe vave e tupu ʻa e Siasí ʻi Palāsila ki ha siteiki ʻe 50 ʻi he 1990 pea laka hake ʻi he siteiki ʻe 200 ʻi he taʻu 2000.
Naʻe ngāue ʻa ʻEletā Soalesi, ʻa ia naʻe maʻu hono mataʻitohi BAʻ i he tauhi tohí mo e ʻekonōmiká mei he ʻUnivēsiti Ponitifisiá ʻa e Katoliká (Pontificia Catholic University) mo hono MBA mei he ʻInisititiuti Fakapuleʻanga ʻo e Ako MA (National Institute of Postgraduate Study), ki ha kautaha vaʻe meʻalelé fakavahaʻa puleʻanga ʻi he taimi naʻe ʻoange ai ha ngāue ʻi he Siasí. Naʻe fakangāueʻi ia ʻi he Potungāue Paʻanga ʻa e Siasí, pea ʻikai hano taimi kuo hoko ko e talēkita ʻo e ngaahi ngāue fakatuʻasinó ʻi he ʻōfisi ʻo e Siasí ʻi Sao Pauló, ʻo tokoniʻi e Kau Palesitenisī Fakaʻēliá ʻi ha taʻu ʻe 10. Naʻe toe hoko foki ko e fuofua palesiteni ʻo e Siteiki Sao Paulo Palāsila Kosiá.
Naʻe hoko ko e palesiteni ʻo e Misiona Potukali Pootó mei he 2000 ki he 2003 pea ui ki he Kōlomu ʻUluaki ʻo e Kau Fitungofulú ʻi ʻEpeleli 2005. Naʻe ʻosi ngāue ʻi he Kau Palesitenisī Fakaʻēlia ʻo Palāsilá mo e ʻĒlia Tonga-hahake ʻo ʻAfiliká.
Naʻá ne pehē, “Kuo ʻomi ʻe he ngaahi ʻausiá ni kiate au ʻa e fakakaukau ʻe lava ke fokotuʻu ʻa e Siasí ʻi ha feituʻu pē ʻoku ʻi ai hatau kakai faivelenga, pea mo e fakakaukau ke u fakatokangaʻi ʻa e meʻa kuo pau ke toe lelei ange ʻeku fakahokó.”
Naʻe mali ʻa ʻEletā Soalesi mo hono uaifi ko Lōsana Fenanitesi Mōkato, ʻi ʻOkatopa 1982 ʻi he Temipale Sao Paulo Palāsilá. Ko e mātuʻa kinaua ʻa ha fānau ʻe toko tolu.
Naʻe hoko ʻa ʻEletā Soalesi ko ha faifekau taimi kakato ʻi he Misiona Palāsila Lio ti Seneló. Naʻe ʻosi hoko foki ko ha palesiteni ʻo e kōlomu ʻo e kaumātuʻá, mo e fakafofonga fakavahelahi ʻo e uelofeá.