ʻEletā Timothy J. Dyches
ʻO e Kau Fitungofulú
Ko e taha ʻo e ngaahi fatongia manakoa taha ʻo ʻEletā Tīmote Sione Tisesi ʻi he moʻuí ke “hoko ko ha fakamoʻoni” ʻo fakamoʻoniʻi ki he niʻihi kehé, mo tokoni ke nau omi kia Kalaisi. Tatau ai pē pe ʻoku hoko ko ha faifekau, fengāueʻaki mo hono fāmilí, pe ngāue ʻi heʻene ngāueʻangá, ʻokú ne tali fiefia ʻa e tufakangá mo e fatongiá mo feinga ke tokoni ki he niʻihi kehé ke nau fai e meʻa tatau.
Naʻe fāʻeleʻi ia ʻi Sānuali 1951 ʻi Mōlei ʻi ʻIutaā, USA, kia Milo Feletiliki mo Mele Katalina Tisesi, ko e fika ua ia ʻi ha fānau ʻe toko fitu. ʻI heʻene kei hoko ko e tīkoni kei siʻí, ne hiki hono fāmilí ki ʻElikou, Nevata, pea ngāue ai ʻi he tuku ʻa e akó ʻi he fale fakafaitoʻo ʻa ʻene tangataʻeikí. Naʻe akoʻi ia heʻene tamaí ʻi heʻena ngāue vāofí ʻi he mahuʻinga ʻo e ngāue mālohí—ko ha meʻa naʻe tokoni lelei ki ai ʻi heʻene hoko ko e faifekau kei talavou ʻi he Misiona Siamane Tongá mei he 1970 ki he 1972.
Naʻá ne pehē, “[Ko ha ngāue fakafaifekau faingataʻa, ka ko ha ngāue fakafaifekau lelei ia kiate au. Naʻá ku ako ai e mahuʻinga ʻo e ngāue mālohí mo e talangofuá kae ʻikai foʻí.]”
Naʻe hoko atu ʻe tōʻonga ngāue ko iá ʻi he ʻosi ʻo ʻene ngāue fakafaifekaú ʻi heʻene akó, ngāué, pea mo e ngaahi ngāue ʻa e Siasí. Naʻe fetaulaki ʻa ʻEletā Tisesi mo hono uaifi ki he kahaʻú, ʻa Sila Tatilī, he lolotonga ʻene ako ʻi he ʻUnivēsiti Pilikihami ʻIongí. Naʻá na mali ʻi he ʻaho 26 ʻo ʻEpeleli 1974, ʻi he Temipale Manitai ʻIutaá. ʻOku ʻi ai haʻana fānau ʻe toko tolu.
Naʻe maʻu ʻe ʻEletā Tisesi hano mataʻitohi BA mei he ʻUnivēsiti Pilikihami ʻIongí ʻi he ako fakaʻunvesití pea hoko atu ʻo maʻu hono mataʻitohi fakafaitoʻó mei he ʻUnivēsiti Fakafaitoʻo ʻo Uāsingatoní. Ko e lahi ʻo ʻene ngāue fakapalofesinalé naʻe ngāue fakatāutaha ko ha taha faitafa ki he telingá, ihú, pea mo e kiá ʻi Lino ʻi Nevata.
Ko e taimi naʻe ui ai ki he Kōlomu hono Ua ʻo e Kau Fitungofulú, naʻe lolotonga ngāue ʻa ʻEletā Tisesi ʻi he houalotu ʻo e Kau Talavoú ko e ʻetivaisa ki he kōlomu ʻo e kau tīkoní. Kuó ne ʻosi ngāue ʻi ha ngaahi fatongia kehe, kau ai ʻa e Fitungofulu Fakaʻēliá, palesiteni ʻo e Misiona ʻOlikoni Pootilení, palesteni fakasiteiki, tokoni ʻi he kau palesitenisī fakasiteikí, aleaʻanga māʻolunga, taha ngāue ouau ʻi he temipalé, palesiteni Lautohi Faka-Sāpate, mo e kalake fakauooti.