Elder Edward Dube
O Le Fitugafulu
Sa faalauiloa atu le talalelei ia Elder Edward Dube i le 1981 e se pule o le galuega, o le ana le maota sa ia faigaluega ai. Sa tuu atu i ai e le tagata lea se kopi o le Tusi a Mamona. Na te lei faitauina seia oo i le 1983 ae sa matua faagaeetia i le molimau a Iosefa Samita e uiga i le asiasiga a Moronae lea na ia tali atu ai i se valaaulia e auai i se sauniga anapogi ma molimau i le falelotu i Kwekwe, Zimbabwe.
Sa lei maua sona toafimalie muamua, i lona lagonaina o loo i ai o ia i se mafutaga faaleauauna i le toatele o i latou sa auai.
“Ae ao latou tuu mai a latou molimau e uiga i le Tusi a Mamona, sa ou lagonaina nisi fesootaiga ma nei tagata,” sa ia ta’ua ai, “ma sa mafai ai ona faasoa atu ou lagona e uiga i le Tusi a Mamona.”
Sa mulimuli ane maua ana lesona mai faifeautalai, sa papatisoina, ma iu ai ina auauna atu i le Misiona a Zimbabwe Harare.
I lena taimi, sa ia aoaoina ai le aiga o Naume Keresiya Salazani, ao 16 ona tausaga i lena taimi. Sa faaauau pea le la faamasaniga ina ua maea lana misiona ma faaipoipo ai i Kwekwe i le aso 9 o Tesema, 1989. Ia Me 1992 sa faamauina ai i laua i le Malumalu o Johannesburg i Aferika i Saute. O i laua o matua o ni afafine se toatolu ma se atalii.
Sa soifua mai ia Me 1962 i le nuu o Chirumanzu, Zimbabwe, ia Clement ma Rosemary Dube, sa maua e Elder Dube se tipiloma i aoaoga mai le Kolisi o Zimbabwe E. D. i le 1992 ona faigaluega ai lea i le Ofisa o Aoga a le Ekalesia, i le faavaeina o seminare ma inisitituti o mataupu faalelotu i Zimbabwe, Zambia, ma Malawi. Ua faamanuiaina lava o ia i le vaaia o le toatele o tamaiti aoga ia sa ia tauaaoina i ai a latou tusi faamaonia o faauuga ua auauna atu i tofiga faaleautaitai o le Ekalesia i na atunuu ao tuputupu ae ai le Ekalesia.
Sa auauna atu o ia o se peresitene o le korama a toeaina, peresitene o le paranesi, peresitene o le itu, peresitene o le siteki, fesoasoani i se au peresitene o se misiona, ma, mai le 2009 i le 2012, sa avea ai o ia ma peresitene o le Misiona a Zimbabwe Harare. Ao lei valaauina i lenei valaauga i le Korama Muamua a Fitugafulu sa auauna atu o ia o se Fitugafulu Eria.