Carole F. McConkie
Fesoasoani Muamua i le Au Peresitene Aoao o Tamaitai Talavou
Talu mai lona talavou, sa i ai pea ia Carol Foley McConkie se “faananau mo le malumalu.” O lena taulaiga sa faatonutonuina ai ana amioga i lona olaga atoa.
Sa soifua mai ia Aperila 1952 i Spokane, Uosigitone, ISA, ia Williams ma Joanne W.Foley, sa laitiiti lava Sister McConkie i le taimi na tuitui ai faifeautalai i le faitotoa o le fale o ona matua i Wilmington, Delaware, ma faailoa atu le talalelei i lona aiga. Sa vave ona taliaina e ona matua ia aoaoga e ui i feteenaiga ma le toe faia o ni suiga i o latou olaga.
Ao teineitiiti sa ia malaga ai ma lona aiga i le nofoaafi e sopoia le atunuu ina ia faamau ai i le Malumalu o Manti Iuta.
“O se aafiaga matagofie tele lena,” sa ia saunoa ai. “Ou te manatua le ofu ai i laei papae ma le uiga o lena mea i lou aiga. O se aafiaga ofoofogia, ma e ui sa ou laitiiti, ae ou te manatua lava lagona sa ou mauaina, o vaaiga o laei papae, ma le matagofie o lena aso. O lena aafiaga na ou maua ai le uluai manao e faatumauina le malumalu i lou olaga i taimi uma.”
Sa avea le malumalu ma sulu o le faamoemoe i taimi o tofotofoga ma i le taimi na faia ai lona lava ia aiga.
Sa ia feiloai i lana tane, o Oscar Walter McConkie III, ao la aooga ai i le Iunivesite o le Setete o Arizona. Sa maua e Sister McConkie lona faailoga o le tagata malaga i aoaoga faaPeretania. Sa la faaipoipo i le aso 22 Tesema, 1973, i le Malumalu o Mesa Arizona ma o matua o le fanau e toafitu.
I le taimi o lona valaauga e avea ma fesoasoani muamua i le au peresitene aoao o Tamaitai Talavou, o loo auauna atu Sister McConkie i le fono faatonu aoao o Tamaitai Talavou. Sa ia faaaluina le tele o lana auaunaga i le Ekalesia i valaauga e aofia ai le faiaoga ma se peresitene o Tamaitai Talavou i le uarota ma se fesoasoani i le Aualofa i le uarota ma le au peresitene o le Peraimeri. Sa ia auauna faatasi ma lona toalua ao pulefaamalumalu lona toalua i le Misiona a California San Jose mai le 2005 i le 2008.