Alang sa Kalig-on sa mga Kabatan-onan
Unsa ang Tinuod nga Higala?
Ang kahulugan sa usa ka higala nausab karon sa kalibutan nga naglambo sa teknolohiya. Karon tingali kita naghunahuna nga kita adunay daghang mga “higala.” Tinuod kini: malingaw kita nga mahibalo ug magpabilin nga mahibalo unsay nahitabo sa mga kinabuhi sa atong daghang mga kaila ingon man usab sa karon ug kanhi nga mga higala ug gani sa mga tawo nga wala nato mahimamat sa personal nga atong gitawag nga mga higala.
Sa sitwasyon sa social media, ang termino nga “higala” sa kasagaran gigamit sa paghulagway nga mga kontak kay sa mga relasyon. Kamo adunay abilidad sa pagpadala og mensahe sa inyong “mga higala,” apan dili kini sama sa pagbaton og relasyon sa maong tawo.
Usahay ang atong hilig mao ang pagbaton og mga higala. Tingali kinahanglan kitang mo-focus nga mahimong usa ka higala.
Dunay daghang mga kahulugan unsay gipasabut nga mahimong usa ka higala. Dili gyud ko makalimot nga nakadungog ni Elder Robert D. Hales sa Korum sa Napulog Duha ka mga Apostoles nga naghisgot mahitungod kon unsay ipasabut nga mahimong usa ka higala ug sa gamhanang impluwensya sa mga higala sa atong mga kinabuhi. Ang iyang kahulugan adunay malungtarung epekto sa akong kinabuhi. Miingon siya, “Ang mga higala mao ang mga tawo kinsa makahatag og kasayon sa pagsunod sa ebanghelyo ni Jesukristo.”1 Niini nga pagsabut, ang pagtinguha sa labing maayo sa laing tawo mao ang diwa sa tinuod nga panaghigalaay. Kini mao ang pag-una sa laing tawo. Kini mao ang pagkamatinuoron, maunungon, ug maputli kaayo sa tanang lihok. Tingali ang pulong pasalig ang nag-abli sa tinuod nga kahulugan sa panaghigalaay.
Sa dihang ang akong anak nga babaye, si Emi, nag-edad og 15, nakahimo siya og desisyon kon unsang matanga sa mga higala ang iyang pangitaon. Usa ka buntag niana akong namatikdan ang iyang kopya sa Basahon ni Mormon nga naabli sa Alma 48. Iyang gimarkahan ang mga bersikulo nga naghulagway ni Kapitan Moroni: “Si Moroni usa ka kusgan ug gamhanan nga tawo; usa ka tawo nga hingpit ang salabutan. … Oo, ug siya usa ka tawo nga malig-on diha sa hugot nga pagtuo kang Kristo” (mga bersikulo 11, 13). Diha sa kilid iyang gisulat ang, “Gusto kong makig-date ug maminyo sa usa ka tawo sama ni Moroni.” Samtang ako nagbantay ni Emi ug sa matang sa batan-ong mga lalaki nga iyang gikauban ug gika-date sa dihang nag-edad siya og 16, akong makita nga siya ehemplo niadtong mga hiyas ug nagtabang sa uban sa pagtuman sa ilang pagkatawo isip anak nga mga lalaki sa Dios, mga tighupot sa priesthood, ug umaabut nga mga amahan ug mga lider.
Ang tinuod nga mga higala nag-impluwensya niadtong ilang ikauban sa “pagbarug nga mas taas [ug] mas maayo.”2 Makatabang kamo sa usag usa, ilabi na sa batan-ong mga lalaki, mag-andam ug magserbiyso og halangdon nga mga misyon. Makatabang kamo sa usag usa nga magpabilin nga limpyo sa moral nga paagi. Ang inyong matarung nga impluwensya ug panaghigala adunay mahangturong epekto dili lamang sa mga kinabuhi niadtong inyong ikauban apan usab alang sa mga henerasyon nga moabut.
Ang Manluluwas mitawag sa Iyang mga tinun-an nga Iyang mga higala. Siya miingon:
“Kini mao ang akong sugo, nga kinahanglan maghigugmaay kamo ang usa sa usa, sama sa akong paghigugma kaninyo.
“Walay bisan kinsa nga may gugma nga labaw pa niini, nga ang usa ka tawo naghalad sa iyang kinabuhi sa pagpakamatay alang sa iyang mga higala.
“Kamo mga higala nako, kon magatuman kamo sa akong isugo kaninyo.
“Dili ko kamo nganlan nga mga ulipon; kay ang ulipon dili masayud sa ginabuhat sa iyang agalon: apan ginganlan ko kamo nga mga higala; kay ang tanan nga nadungog ko gikan sa akong Amahan, kini gipahibalo ko man kaninyo” (Juan 15:12–15; empasis gidugang).
Samtang kamo magpakabuhi ug magpaambit sa ebanghelyo ni Jesukristo, makadani kamo og mga tawo nga gustong mahimo ninyong mga higala—dili lang usa ka kontak sa usa ka social media site apan sa matang sa higala nga gipakitaan og ehemplo sa Manluluwas pinaagi sa Iyang mga pulong ug sa Iyang ehemplo. Samtang kamo maningkamot nga mahimong usa ka higala ngadto sa uban ug sa pagdan-ag sa inyong kahayag, ang inyong impluwensya makapanalangin sa kadaghanan nga inyong gikauban. Nasayud ko nga kon kamo mo-focus nga mahimong higala ngadto sa uban, sumala sa gisulti sa mga propeta ug sa mga ehemplo sa mga kasulatan, magmalipayon kamo ug mahimo kamong impluwensya alang sa maayo sa kalibutan ug moabut ang adlaw nga makadawat kamo og mahimayaon nga saad nga gihisgutan sa mga kasulatan mahitungod sa tinuod nga panaghigalaay. “Ug kana nga panag-uban nga ania kanato dinhi maanaa kanato didto, lamang kini pagaubanan sa walay katapusan nga himaya.” (D&P 130:2).
Mga paghulagway sa litrato © iStockphoto.com/Fonikum and by Les Nilsson