Napulo ka mga Paagi aron Makahibalo nga Kamo Nakabig

Ni Tyler Orton

Si Tyler Orton nagpuyo sa Java, Indonesia.

Imahe

Akong nakat-unan sa miting sa priesthood nga ang usa sa mga katuyoan sa Aaronic Priesthood mao ang pagtabang nato nga “makabig ngadto sa ebanghelyo ni Jesukristo ug magsunod sa mga pagtulun-an niini.”¹ Wala ko makasiguro unsay gipasabut sa “makabig ngadto sa ebanghelyo ni Jesukristo.” Akong gipangutana ang akong mga ginikanan ug ubang mga igsoon unsay gipasabut niini, ug among gihisgutan ang pipila ka mga paagi nga inyong makita kon kamo nakabig ba.

Tingali duna pay lain, apan ania ang 10 ka mga paagi nga among nakab-ot. Tungod kay ang pagkakabig usa ka proseso sa tibuok kinabuhi, dili kinahanglang mahingpit kita niini nga bahin karon, apan kini makatabang nato nga makahibalo kon kita nag-uswag ba.

Kon kamo nakabig, dili lang kamo makahibalo unsay inyong buhaton apan kamo usab magtinguha sa pagbuhat sa matarung nga mga butang. Dili igo ang paglikay sa paghimo og sayop tungod kay kamo mahadlok nga madakpan o masilotan. Kon tinud-anay nga nakabig, gusto gayud kamo nga mopili sa matarung.
Laing timailhan nga nakabig mao nga kamo wala nay tinguha sa pagbuhat og sayop. Ang Anti-Nephi-Lehies mao ang dakong ehemplo niini. Sa dihang nakabig sila sa ebanghelyo ni Jesukristo, sila “misulod ngadto sa usa ka pakigsaad uban sa Dios sa pag-alagad kaniya, ug paghupot sa iyang mga sugo.” (Mosiah 21:31). Sama sa mga Nephite nga gitudloan ni Haring Benjamin, sila “wala nay hilig sa pagbuhat og dautan” (Mosiah 5:2). Nahimo silang tinuod nga nakabig ngadto sa ebanghelyo ni Kristo, ug ang mga tintasyon ni Satanas wala nay gahum ibabaw nila.

Imahe

Sa pagpakita nga sila nagmatinud-anon sa ilang pakigsaad sa pagsunod sa ebanghelyo, ang nakabig nga mga Lamanite milubong sa ilang mga hinagiban (tan-awa sa Alma 24).
Kon kamo nakabig, mas mabalaka kamo unsay gihunahuna sa Dios kay sa unsay gihunahuna sa uban bahin nimo. Sa akong eskwelahan sa Indonesia, ang mga estudyante magsige og inom. Usahay makatintal nga mouban sa party kon ang tanan nagbuhat niini ug magbiaybiay nimo nga dili mokuyog. Ang akong igsoong lalaki giimbitar sa pag-inom ug sa party makadaghan, apan wala gayud siya—mibarug siya sa unsay iyang gituohan. Lisud kadto, ug migahin siya og daghang mga gabii nga nag-inusara. Sa dihang ang mga estudyante nanamilit sa iyang gradwasyon, daghang mga tawo misulti niya nga sila natingala kaayo nga siya nakabuntog sa pagpamugos sa barkada ug nagmatinud-anon sa iyang mga sumbanan. Gisultihan nila siya unsa ka taas ang ilang pagtan-aw niya tungod niini. Nagpakita siya nga siya nakabig pinaagi sa pagpakigbatok sa pagpamugos sa barkada.
Kon makabig, maningkamot kamo kanunay sa pagsunod sa ebanghelyo—dili lang sa mga Dominggo o kon kini sayon apan sa tanang higayon. Ang inyong mga aksyon dili mausab depende kon kinsa inyong kauban o kinsa ang nagtan-aw ninyo. Kon ang inyong ka-edad magbinuang sa pagkomedya o gustong manan-aw og bastos nga sine, dili mo mokuyog niini tungod kay walay nakakita; hinoon mobarug kamo unsay inyong gituohan.
Imahe

Kon kamo nakabig, mas mabination ug maloloy-on kamo sa pagpakigsandurot sa uban. Dili kamo mohukom o manaway o manglibak. Mas makahibalo kamo sa mga pagbati sa uban, ug mahimong natural ang pagpangita og mga paagi sa pagserbisyo ug pagtabang. Kon kamo naglakaw sa inyong eskwelahan ug dunay nahulgan og mga libro, dili na gani mo kinahanglang maghunahuna pa unsay buhaton. Awtomatik kamong motabang.
Imahe

Kon kamo nakabig, ang inyong tinguha sa pag-ampo magkadako ug kamo mobati nga kamo tinud-anay nga nakigsulti sa Dios kon kamo mag-ampo. Mogahin gyud kamo og panahon sa pag-ampo bisan unsa pay inyong gibati o unsay nahitabo sa inyong kinabuhi. Si Presidente Ezra Taft Benson (1899–1994) misulti nato, “Kon kita dili gusto nga mag-ampo, nan kinahanglan kitang mag-ampo hangtud nga mobati na kita nga ganahan nga mag-ampo.”²
Kon kamo makabig, maghandom kamo sa Dominggo tungod kay kini ang Igpapahulay. Kon moabut na ang Dominggo, imbis maghunahuna, “Oh, adlaw kini nga dili ko kakuyog sa akong mga higala o manan-aw og sine,” kamo maghunahuna, “Maayo, usa ka adlaw nga ako makasimba ug maka-focus sa espirituhanong mga butang ug mogahin og panahon uban sa akong pamilya!”

Imahe
Kon nakabig, inyong sundon ang mga sugo ug dili kamo mamalibad, mangatarungan sa kinaiya, o mangitag ikarason sa pagsupak og sugo. Dili kamo molapas sa utlanan; sundon ra ninyo ang mga sugo tungod kay nakahibalo kamo nga kini mao ang mas maayong paagi.
Imahe

Kon nakabig, gusto kamong mobayad sa inyong ikapulo. Giisip ninyo kini nga pribelihiyo ug mobati nga ang 10 porsyento dili dako, ilabi na itandi sa mga panalangin ug katagbawan nga inyong naangkon. Kini nga mga panalangin mas bililhon pa kay sa kwarta nga inyong gibayad.
Imahe

Kon kamo nakabig, kamo adunay dakong tinguha sa pagtabang sa uban nga makahibalo sa kamatuoran ug sa kalipay nga inyong nakaplagan. Ang nindot nga ehemplo sa kasulatan mao ang damgo ni Lehi, diin siya adunay dakong tinguha sa pagpakigbahin sa lamian nga bunga sa kahoy sa kinabuhi uban sa iyang pamilya. Sa dihang mikaon siya sa bunga, ang iyang unang nahunahunaan mao ang dili pagkuha alang sa iyang kaugalingon apan sa pagpangita sa iyang pamilya aron sila makaambit usab sa bunga ug makabaton og samang kalipay (tan-awa sa 1 Nephi 8:12).

Sa pag-summarize, nasayud kamo nga kamo nakabig kon kamo magsugod sa pagsunod sa mas taas nga balaod, ang ebanghelyo ni Jesukristo. Nagsunod kamo sa espiritu sa balaod ingon man usab sa letra sa balaod. Nagsunod kamo sa ebanghelyo sa tanang mga aspeto sa inyong kinabuhi. Inyong gisunod ang ebanghelyo sa hingpit, dili tungod kay gikinahanglan apan tungod kay gusto ninyo. Mas malipayon ug mas buotan kamo nga tawo, ug gusto kamong mahimong tawo nga gusto sa Langitnong Amahan nga kamo mahimo. Gusto kamong mahisama ni Jesukristo ug sa pagsunod sa Iyang ehemplo. Kon ingon ana na kamo nga tawo, sa tinud-anay nakabig na kamo.

Sa ibabaw: paghulagway sa litrato © IRI; mga sinsilyo © isStockphoto.com/Thinkstock; ANG PANAN-AWON NI LEHI SA KAHOY SA KINABUHI ni Robin Luch © IRI