O Le Auala Na Ou Iloa Ai
O La’u Valaaulia i le Faaolataga
Ata na tusia e Roger Motzkus
A o o’u talavou, sa ou asiasi ai i le tele o tapuaiga ma sa ou le mautonu ona sa eseese uma lava faauigaga o mau sa aoao mai e ia tapuaiga taitasi. Ou te le’i maua ni lagona lelei e uiga i le le faaaloalo sa ou iloa i nisi o i latou, o lea na uma ai loa lo’u taumafai e sue se lotu ou te auai.
O ni nai tausaga mulimuli ane sa papatiso ai sa’u uo o Cleiton Lima, i Le Ekalesia a Iesu Keriso o le Au Paia o Aso e Gata Ai. Na te le’i tauina mai ia te a’u lenei mea e ui o i maua o se uo lelei lava, ae a o faasolo pea aso, sa amata ona ou vaaia ni suiga ia te ia. I Aso Sa, sa masani ona ou alu i lona fale i le taeao ina ia mafai ona ma taalo soka, ae sa le mafai ona ou maua o ia i le fale. Sa tupu lenei mea i Aso Sa sosoo e lua pe tolu. Mulimuli ane sa ta’u mai ai e Cleiton ia te au e le mafai ona toe taalo soka i Aso Sa ona sa ia faamamaluina le aso o le Alii. Sa ou fai atu ia te ia, “O le ekalesia lenei ua e faavalevalea ai.”
Ona valaaulia mai lea e Cleiton a’u ou te alu atu i le lotu. Sa ou fai atu i ai se ‘alofaga faapea sa ou le fiafia lava i mea tau tapuaiga. Mo le 10 masina, sa aumai ai e Cleiton ia faifeautalai e aoao a’u, ae sa ou faia lava ni ‘alofaga pe fai atu i ai sa ou pisi tele. Ae sa le fiu ai o ia.
I se tasi aso ia Iuni, sa ia valaaulia ai a’u e auai atu i se siva a le Ekalesia. Sa ou ula ia te ia, “E tele ni meaai mauafua ma e toatele ni teineiti e i ai?” Sa ata ma fai mai ioe!
Ou te tautino atu sa ou toilalo i lo’u manava. Sa ou asiasi i le lotu ma sa ou fiafia i ai. Sa faafeiloai au e tagata uma, sa ou ‘aitele, ma sa amata ai ona ou fiafia e auai i sauniga. Ina ua ou taunuu atu i le lotu i le Aso Sa, sa toatele ni tagata sa ou feiloai i ai ma faalogo i a latou molimau. Sa ou le masani i le Tusi a Mamona, ae sa ou lagonaina le Agaga o le Alii ina ua molimau mai ni tagata eseese o le Ekalesia, “Ou te iloa e moni le Tusi a Mamona, ma o le Ekalesia lenei a Iesu Keriso, ma o Iosefa Samita o se perofeta sa valaauina e le Atua.” Ou te le’i mauaina muamua ni lagona e sili ona lelei. Ae sa ou le manao lava e feiloai atu i faifeautalai, peitai sa pai mai lena sauniga molimau ia te a’u.
O le vaiaso na sosoo ai, sa toe valaaulia ai au e Cleiton i le lotu. Sa le mafai ona sa i ai isi a’u fuafuaga. Sa ou vaaia le faanoanoa o ona foliga ina ua ou fai atu i ai ou te le’i iloa pe mafai ona ou alu.
Ae peitai, i le taeao o le Aso Sa sa ou ala ae ai ma se naunau e alu i le lotu. Sa ou nofo i luga i le 6:50, o se mea sa faigata ia te a’u, ma ou sauni loa ma faatalitali mo le oo mai o Cleiton. Sa te’i o ia ina ua ia vaai mai ua uma ona ou sauni ma faatalitali atu. O le Aso Sa lena sa aoao mai ai le epikopo e uiga i le perisitua. Sa malosi lo’u lagonaina o le Agaga ma sa ou maua le uunaiga e faapea e tatau ona ou faalogologo i lesona a faifeautalai. E oo ane i le faaiuga o le sauniga a Alii Talavou, ua ou iloaina o le a ou papatiso.
Ina ua tuua le lotu, sa ou fai atu ia Cleiton, “Ua ou fia papatiso!”
Sa faapea o ia o sa’u talaula. Ae sa ia faapea mai, “A ou valaau i alii faifeautalai, e te feiloai atu ia i laua?” Sa ou tali atu ioe.
Sa aoaoina au e ni alii faifeautalai maoae. Ina ua ou faalogo i le savali o le Toefuataiga, sa ou maua foi se faamautinoaga sili atu e tatau ona ou papatiso. Ae sa ou fia iloa mo a’u lava le moni o le Tusi a Mamona. Sa faailoga e alii faifeautalai le Moronae 10:3–5 i totonu o la’u Tusi a Mamona ma fai mai ia te au ou te tatalo ma fesili atu i leAtua pe moni lea.
O le afiafi na sosoo ai, sa ou manatua ou te le’i faitauina lava le Tusi a Mamona. A o amata ona ou faitau, sa ou lagonaina se agaga sili ona malosi. Sa ou tatalo, ma a o le’i uma [la’u tatalo], sa ou iloaina e moni le Tusi a Mamona. Ou te faafetai i le Atua mo le taliina mai o la’u tatalo. Sa ou papatiso ia Iulai 2006.
Sa mulimuli ane ou auauna atu o se faifeautalai i le Misiona a Pasila Cuiabá, ae o la’u uo o Cleiton sa auauna atu i le Misiona a Pasila Santa Maria. Sa ma faia le mea sa faia e Cleiton mo a’u: valaaulia tagata ia o mai ia Keriso ma fesoasoani ia latou maua le talalelei toefuataiina e ala i le faaaogaina o le faatuatua ia Iesu Keriso, salamo, ia papatisoina, ma maua le meaalofa o le Agaga Paia. O le auala moni lenei i le faaolataga.
Ia tatou valaauliaina i taimi uma a tatou uo ma aiga ia iloa lenei talalelei, aua sa valaaulia e le Faaola ia tagata uma ina ua Ia fetalai, “O mai ia te a’u” (Mataio 11:28). Ua ou iloa o le Ekalesia lenei a Iesu Keriso, ma o le taimi lenei e valaaulia ai tagata uma ia o mai ia te Ia.