Mataupu Faavae ma Feagaiga 87: 8.

O le autu o le Mutuale i le tausaga lenei o loo aoao mai ai ia i tatou ia nofoaga e tutu ai ina ia tatou saogalemu ai.

8 O le mea lea, ia outou tutu ai i nofoaga paia, ma aua le masi’i ese, seia oo mai le aso o le Alii; aua faauta, e vave lava ona oo mai ua fetalai mai ai le Alii. Amene.

Ia Outou Tutu Ai

Ata

Peresitene Thomas S. Monson

Ua valaauina i tatou e le Alii, “Faalatalata mai ia te au ma o le a Ou faalatalata atu ai ia te outou; saili mai ia te au ma le filiga ma o le a outou maua ai au” (MF&F 88:63). A o tatou faia lea mea, o le a tatou lagonaina Lona Agaga i o tatou olaga, ma tuuina mai ia i tatou le manao ma le lototele e tutu ai ma le malosi ma le mausali i le amiotonu—ia ‘tutu … i nofoaga paia, ma aua le masi’i ese.’”

Peresitene Thomas S. Monson, “Tutu i Nofoaga Paia,” Liahona, Nov. 2011, 84.

I Nofoaga Paia

Ata

Elder Dallin H. Oaks

“O a … ‘nofoaga paia’? E aofia ai le malumalu ma ona feagaiga e tausia ma le faamaoni. E aofia ai se aiga o i ai fanau e faatauaina ma matua e faaaloalogia. O nofoaga paia e aofia ai o tatou valaauga na tofia ai e taitai perisitua, e aofia ai misiona ma valaauga e faataunuuina ma le faamaoni i paranesi, uarota, ma siteki.”

Elder Dallin H. Oaks o le Korama a Aposetolo e Toasefululua, “Sauniuniga mo le Afio Mai Faalua,” Liahona, Me 2004, 10; faaopoopo le faamamafa.

Aua Le Masi’i Ese

O nisi nei o auala e mautinoa ai o le a le masi’i ese se mea:

O se taula—“Faamoemoe … e fai ma taula i agaga o tagata” (Eteru 12:4).
O se faavae mautu—“O luga lava o le papa o lo tatou Togiola, o Keriso lea, le Alo o le Atua, e ao ina oulua atinae ai lo oulua faavae … , o le faavae mautinoa lea” (Helamana 5:12).
O se tulaga mausali e tu ai—E le mafai ona e tu vae tasi i totonu o Siona ae tu le isi vae i le lalolagi, aua “o le tagata faalotolotolua e faaletumau ia i ona ala uma” (Iakopo 1:8).
Fao o le faleie—O fao o le faleie o Siona e fesoasoani i le Ekalesia ia tu maualuga ma mauaa, a o tuuina mai le malutaga mo i tatou: “[O] le faapotopotoina faatasi i luga o le laueleele o Siona, ma i luga o ona siteki, mo se puipuiga ma mo se sulufaiga mai le afa” (MF&F 115:6).

Aso o le Alii

Aso o le Alii—O Le Afio Mai Faalua o Iesu Keriso

E Vave Lava Ona Oo Mai

“E tatau ona tatou vaavaai mo faailoga [o le Afio Mai Faalua], e tatau ona tatou ola faamaoni i le mafai tatou te mafaia. … Ae e le tatau ona tatou nofoai ona o lena aafiaga e faatatau i ai o loo i luma atu o i tatou i se mea. E le mafai ona taofi lo tatou ola i le olaga. E moni, e tatau ona tatou ola i le olaga i se tulaga e sili atu le atoatoa, nai lo se isi taimi na tatou ola ai. Pe a mafaufau atu i ai, o le tisipenisione lenei o le atoaga o taimi.”

Elder Jeffrey R. Holland o le Korama a Aposetolo e Toasefululua, “O Lenei, e Silisili i Tisipenisione Uma,” Liahona, Iulai 2007, 20.