E Mafai Ona Fai So’u Faamanuiaga?
Art Crater, Niu Ioka, ISA
O ni tausaga se tele ua mavae sa ma o atu ai ma se uso sa fai a’u ma ona faiaoga o aiga, o Uso Schaaf, i le falemai e fai se faamanuiaga faaleperisitua o lona toalua a o le’i faia lona taotoga. Sa potu faatasi ia Tuafafine Schaaf ma se tamaitai e igoa ia Annie Leddar, o se gasegase ua leva ona ma’i i le kanesa ua ui o lē sa leai se faamoemoe e umi se taimi e soifua ai.
Sa ou aapa atu e toso le pupuni e vavae ai le va o moega e lua o le falemai a o lei amataina le faamanuiaga, peitai sa ou toe taofia. O lo’u le manao e vavaeese ia Annie, o lea sa ou faamalamalama atu i ai le mea sa ma fuafua e fai ma fesili atu i ai pe manao e molimauina le faamanuiaga. Sa fai mai o ia e fia matamata mai. O lana tane o le ua maliu, sa avea ma se faifeau o se isi ekalesia, ma sa ia fiailoa o tatou talitonuga. Sa ma faaauau loa ma Uso Schaaf i le faiga o le faamanuiaga a o faalogologo mai Annie.
O ni nai aso mulimuli ane, a o le’i foi mai Tuafafine Schaaf i le fale mai le falemai, sa talosaga ane Annie pe mafai ona maua foi sona faamanuiaga faaleperisitua. Sa ma foi atu ma le fiafia ma Uso Schaaf i le falemai e tuuina atu lona faamanuiaga. Sa le’i te’a le kanesa o Annie, ae sa tele se suiga manuia o lona soifua maloloina.
Sa manao o ia e aoao atili e uiga i le talalelei, o lea sa ou talosagaina ai faifeautalai e afe ane i le falemai e aoao o ia. Sa faalogo o ia i le savali o le talalelei ma se loto matala ma filifili ai e papatiso. O vaiaso uma talu ona uma lona papatisoga ma te o mai ai i le falemai e ave Annie i le lotu i lona nofoafaataavalevale.
Ona sa gasegase Annie, o lea sa faigata ai ia te ia ona feosofai, ae sa le’i umi ae ona maua lona lava auala e auauna ai i le Alii. Sa matou aveina atu ia te ia se masini lomitusi, ma sa ia faaaluina le tele o itula i aso uma i le falemai i le faiga o galuega o talafaasolopito o aiga. Sa soifua Annie i isi tausaga e tolu mulimuli ane nai lo le mea sa faamoemoeina ma saunia le faitau selau o igoa o aiga mo le malumalu a o le’i maliu o ia.
Ina ua maliu Annie, sa fai e Tuafafine Schaaf ia galuega sui i le malumalu mo le toatele o tuaa tamaitai o Annie.
O le mea ua ou iloa, o Annie na o le pau lea o le tagata o lona aiga na auai i le Ekalesia. Sa le’i naunau lava lona aiga o loo ola i lona aafia ai i le Ekalesia, ae ou te mautinoa o le toatele o ona aiga ua maliliu sa fiafia mo le galuega sui sa faia mo i latou.
Tatou te le iloa lava pe ua sauni tagata tatou te feiloai i ai e maua le talalelei. Ou te faafetai ona sa mafai ona ou iloa se fatu—sa totoina i le loto o Annie ina ua mavae lona molimauina o se faamanuiaga faaleperisitua—ua fuga ma faamanuiaina ai le faitau selau o fanau a le Tama Faalelagi.