Nofoaga Paia i Lou Olaga
O le autu o le Mutuale o le tausaga lenei ua valaaulia ai oe e laa ese mai le lalolagi ae laa atu i totonu o le malo o le Atua. E pei ona aoao mai Peresitene Boyd K. Packer, Peresitene o le Korama a Aposetolo e Toasefululua, ua tatou nonofo i teritori o le fili.1 O le “Ia outou tutu i nofoaga paia” o le ki lea i le laveaiina.
O lenei autu ua uunaia mai ai ni fesili taua: O le a se nofoaga paia? O fea e i ai se nofoaga paia? E mafai faapefea ona tatou tutu i nofoaga paia? E faapefea ona tatou faia ia nofoaga e masani ona tatou aumau ai ia sili atu ona paia? A o tatou sailia tali i nei fesili, o au tali o le a taiala ai au fegalegaleaiga, au filifiliga o gaoioiga, ma ou laei, upu, ma amioga.
Ua e tautino e faamalosia lou aiga ma le auaiga. Taumafai ia fai lou aiga o se nofoaga paia, e faatumulia i le Agaga o le Alii. E mafai ona e lagolagoina tatalo faaleaiga ma le suesueina o tusitusiga paia.
E mafai ona avea lou potu ma nofoaga paia e valaaulia ai le Agaga. A faapea e vaai le perofeta i lou potu, mata na te vaai i ai o se nofoaga paia? E te vaai i ai foi [o se nofoaga paia]?
E mafai ona tatou tutu i nofoaga paia pe a tatou o i le lotu. Ua aoao mai tusitusiga paia e faapea o uarota ma siteki o Siona o nofoaga paia ia o le a avea “mo se puipuiga, ma mo se sulufaiga mai le afa” (MF&F 115:6).
O le nofoaga aupito sili ona paia i le lalolagi o le malumalu. Na saunoa Peresitene Thomas S. Monson: “A’u uo talavou e, o e o i ai i o outou tausaga o le talavou, ia i ai pea lava pea a outou vaaiga i le malumalu. Aua lava nei faia se mea o le a taofia ai oe mai le ulufale atu i ona faitotoa ma ‘ai ai i faamanuiaga paia ma le faavavau iina. Ou te faamalo atu ia te outou o e o atu soo i le malumalu ma faia ai papatisoga mo e ua maliliu.”2 Ia outou agavaa e le aunoa ia maua se pepa faataga aoga o le malumalu, e tusa lava pe mamao ese se malumalu.
Soo se mea lava o loo e i ai o i ai le Agaga e mafai ona avea o se nofoaga paia. Na aoao mai Peresitene Harold B. Lee (1899–1973) o nofoaga paia e sili atu ona faatatau i le ituaiga olaga o loo i ai se tagata nai lo le mea o nofo ai.3 Afai e te ola agavaa mo le mafutaga tumau a le Agaga Paia, o lona uiga o loo e tu i se nofoaga paia.
O malumalu uma lava o loo i ai ni faaupuga ua tusia ai “E paia i le Alii.” Ia saili ia tutu i taimi uma i nofoaga paia. A o outou ola i tulaga faatonuina, tatalo i aso uma, ma faitau tusitusiga paia—ae maise lava le Tusi a Mamona—o le a e lagona le mafutaga a le Agaga Paia. Ua folafola mai e le Alii lava Ia ia te oe, “Aua e moni Ou te fai atu ia te outou, e i ai mea silisili o loo faatali mai mo outou” (MF&F 45:62). Ou te ioe ma molimau atu e moni lenei mea!