Autalavou
Faalogologo mo Uunaiga
I se tasi po na sola ese mai ai lo’u tausoga mai le fale, o lea na ou faanatinati atu ai e su’e. A o alu la’u taavale, sa ou tatalo mo le Agaga ia fesoasoani mai ia te au. Sa ou iloaina o le a tali mai le Atua ma taitai a’u, ma sa ou taumafai e faalogologo i uunaiga a le Agaga. Ae ina ua le mafai ona ou faalogoina se mea, sa amata ona ou le to’a, ma ua manatu ai e le o uunaia au e le Agaga.
E ui sa ou manao ou te alu mamao e saili ai, ae sa ou lagonaina e tatau lava ona ou sueina i le vaega o loo i ai le fale o lo’u tausoga. O lea na tonu ai ia te au ou te toe faataamilo tasi lava i le vaega lena. A o ou tu i se magaala, sa ou vaaia se tamaitai talavou o savali. Ua ou maua si o’u tei!
Ina ua ou oso i fafo o le taavale ma tamoe atu ia te ia, sa ou iloaina sa taitai lava a’u e le Agaga i lenei taimi atoa, e ala i le fesoasoani ia ou lagonaina e tatau lava ona ou nofo ai pea i le vaega lenei. Ona sa ou faalogologo mo se leo lemu, toeitiiti lava a ou le amanaiaina uunaiga a le Agaga. Ona ou malamalama ai lea o le tele o taimi o le a tatou le faalogoina ai se leo, ae o le a tatou lagonaina uunaiga i o tatou loto.
Sa ou matua faafetai i le taitaiga a le Agaga. E moni lava e i ai o Ia iina i taimi uma! Pei ona fai mai le mau, “O le a avea le Agaga Paia ma au soa e le aunoa” (MF&F 121:46).
Afai tatou te agavaa mo le taitaiga a le Agaga ma tatou nofouta i ai, e mafai ona avea i tatou ma meafaigaluega i aao o le Atua e agalelei ai i le tele o tagata. Faatasi ai ma le mafutaga faifai pea a le Agaga, o le a tatou iloa ai le ala e tatau ona tatou ui ai.