Galuega Faafaifeautalai

Suesue ma le agaga tatalo i mea nei, ma pe a talafeagai ai, ia talanoaina faatasi ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga. Mo nisi faamatalaga, alu i le reliefsociety.lds.org.

Ata

Faamaufaailoga a le Aualofa

Faatuatua, Aiga, Toomaga

Ua auina atu le Au Paia o Aso e Gata Ai “e galulue i le tovine [o le Alii] mo le faaolataga o agaga o tagata” (MF&F 138:56), lea e aofia ai ma le galuega faafaifeautalai. Tatou te le manaomia se valaauga aloaia faamisiona e faasoa atu ai le talalelei. O isi o le a faamanuiaina o latou olaga i le talalelei, o loo siomia ai i tatou, ma a o tatou tapenaina i tatou lava, o le a faaaogaina i tatou e le Alii. E mafai e faiaoga asiasi ona opogi o latou tiutetauave faaleagaga ma fesoasoani ai “e faataunuuina le faaofuina o le tagata i le tino ola pea ma le ola e faavavau” (Mose 1:39).

Ina ua faatulagaina e le Perofeta o Iosefa Samita le Aualofa i le 1842, sa saunoa o ia, o tamaitai e le gata ina laveaiina e matitiva, ae faaolaina foi o latou agaga.¹ O lenei mea o loo avea pea ma o tatou faamoemoega.

“O le Alii … na te tuuina atu se molimau o le upumoni ia i latou o le a faasoaina atu i isi,” na saunoa ai Peresitene Dieter F. Uchtdorf, Fesoasoani Lua i le Au Peresitene Sili. “Ma le isi, ua faamoemoe le Alii i tagata o Lana Ekalesia e ‘tautala atu [o latou gutu] i aso uma, i le folafolaina o [Lana] talalelei ma le leo o le olioli’ (MF&F 28:16). … O nisi taimi o se fuaiupu se tasi o le molimau e mafai ona faatulagaina ai mea e tutupu e aafia ai le olaga o se tagata mo le faavavau.”²

Mai Tusitusiga Paia

Mataupu Faavae ma Feagaiga 1:20–23; 18:15; 123:12

Mai lo Tatou Talafaasolopito

O le tala i a Olga Kovářová o Siekisolovakia, o se faataitaiga lea o le galuega faafaifeautalai a tagata o le au paia, mai le talafaasolopito o la tatou Aualofa. I le vaitau o le 1970, o Olga o se tagata a’oga faafomai ae sa matelaina i le fia taumafa i se olaga faaleagaga e loloto atu. Sa ia matauina Otakar Vojkůvka, o se tagata o le Au Paia o Aso e Gata Ai, ua 75 tausaga le matua. “Sa foliga mai ia te au ua fitusefululima ona tausaga, ae o lona loto e tusa ua sefuluvalu ma e tumu i le olioli,” na ia fai mai ai. “O se mea tulaga ese lea i Siekisolovakia i le taimi o le faitio.”

Sa fesili Olga ia Otakar ma lona aiga pe na faapefea ona latou maua le olioli. Sa latou faafeiloaia o ia i isi tagata o le Ekalesia ma avatu ia te ia se Tusi a Mamona. Sa ia faitauina ma le naunautai, ma e lei pine ae papatisoina o ia ma faamauina. Talu mai lena taimi, na avea Olga o se uunaiga mo le lelei i se lalolagi o pulega faamalosi faaupufai ma sauaga i tapuaiga. Sa avea o ia ma peresitene o le Aualofa i la latou paranesi laitiiti ma sa fesoasoani e laveai agaga o isi e ala i le aumaia o i latou ia Keriso.³

Ata na tusia e Matthew Reier