Faasoaina Atu o Lo’u Malamalama
Dolores Sobieski, Kalefonia, ISA
Sa o se aso ese lea i Kalefonia i Saute, ISA, i faititili, feemo o uila, mamafa o timuga ma le ogaoga o le vevela. Sa ou tulimatai atu i se malologa ma le matamataina o se ata tifaga i totonu o lo’u fale ea-malulu. Ae o le taimi lava o le a ou saofai ane ai, ae ou lagonaina e tatau ona ou telefoni atu i la’u uo o Sherrill.
Ina ua ou valaau atu, sa ou iloaina ai sa le’i ola lana paoa talu mai lena taeao. Sa popole o ia ina nei vaivai ana meaai faafulisa ma ne’i leaga ana susu, o lea sa ma lauina mai ai ana meaai i la’u pusaaisa.
O le afiafi na sosoo ai sa ma tutu ai ma Sherrill i luma o lona fale. O fale uma lava sa i le latou ituauala sa matuai pogisa uma, ae o fale sa i le isi ituala sa ola lava. O se tasi o fale sa faapitoa ona ou tosina atu i ai. E faafeagai sa’o lava mai le isi ituala, sa susulu le fale i le malamalama a o saofafai tagata i le pito i luma o le fale e talanoa ma talie ma fiafia ai lava.
I aso na sosoo ane ai, sa le mafai ona aveese mai lena vaaiga mai lo’u mafaufau. Sa maoae le eseesega: o le matuai pouliuli o le isi itu o le auala ae susulu moli o le isi itu; o tagata sa saofafai i le pogisa ae o o latou tuaoi sa fiafia i le malamalama.
O le vaaiga sa ou manatunatu ai le tele o taimi e avea ai au e pei o tagata o loo i le isi itu o le auala—fiafia i le malamalama o le talalelei ae o isi o loo nonofo i le pogisa. Sa ou vaai faalemafaufau ia te a’u lava o o’u saofai i le pito i luma o le fale ma ni nai uo mai le lotu, o fiafia i le malamalama o le talalelei ae le faasoaina atu i isi.
E fananau mai tagata uma i le lalolagi ma se malamalama—o le Malamalama o Keriso. I le avea ai ma tagata o le Ekalesia, ua tatou maua le avanoa o le faaopoopo atu i lena malamalama e ala i le faasoa atu o le talalelei. Na aoao mai le Faaola:
“Faauta, pe tutu ea e se tagata se lamepa ma tuu i lalo o se pusa fua saito? E leai, ae latou te tuuina i luga o se tuugalamepa, ma o le a susulu atu ai lona malamalama ia i latou uma o e o i totonu o le fale;
O lea ia faasusulu atu ai lo outou malamalama i luma o lenei nuu, ina ia latou vaai ai ia outou galuega lelei ma viia lo outou Tama o i le lagi” (3 Nifae 12:15 16).
I le avea ai ma ni tagata o le Ekalesia, ua ia i tatou le tiutetauave e faasusulu atu a tatou molimau ia Keriso ina ia iloa e tagata uma—aemaise o i latou o loo i le pouliuli faaleagaga. Ina ua uma lenei aafiaga, sa ou naunau loa ia avea au ma ituaiga tagata e mafai e le Tama Faalelagi ona faatuatuaina e aluese mai le lagolelei o le faapaologa o lo’u fale ae ave atu le malamalama o le talalelei i o’u tuaoi o e o loo i le pogisa.