O Se Fuafuaga mo lo Matou Aiga
“E mafai na faavavau aiga i le ala a le Tama” (Tusipese a Tamaiti, 98).
Sa ou nofonofo i luga o le moega o Tina ma Tama, i lo’u misia tele o i la’ua, ae tatagi loa le telefoni.
“Ei, Levi. E te iloa?” o le tala lea a Tama. “O lou tuafafine o Nola sa fanau mai ananei i le aoauli!”
Sa mafai ona ou iloa sa fiafia Tama, ae sa ese lava foi lona leo—e pei sa popole.
“O le a lona mamafa?” sa ou fesili atu ai, ma mafaufau pe sa ou manao moni e iloa le tali.
Sa sāō Tama mo sina taimi. “E sili laitiiti atu lava ma le lua pauna [0.9 kg],” o lana tala lea. O le taimi la lenei sa mautinoa lava lona leo popole. Sa tatau ona fanau Nola i le vaitau o le Kerisimasi, ae o lea ua fanau mai ia Setema. “E lamo’imo’ī tele o ia,” o le faaauau mai lea a Tama. “Manatua e tatalo mo ia, Levi. Ma tatalo foi mo i tatou ina ia mafai ona tatou talitonu ua silafia e le Tama Faalelagi le mea e sili ona lelei mo lo tatou aiga.”
Ina ua tuu i lalo le telefoni, sa ou alu atu i le umukuka ma aumai se taga pi sa fuafua Tina e fai ai se supo. Fai mai le taga na toeitiiti lava tutusa le mamafa ma le mamafa o Nola i le taimi lenei. Sa ou uuina i o’u lima, ma taumafai e vaai faalemafaufau po o a foliga o se pepe e faapena le tele.
“E lei leva nei ona i ai lona agaga ma le Tama Faalelagi,” o o’u mafaufauga na, i le manatuaina o mea sa ou aoaoina e uiga i le olaga i le muai olaga ma le ata o le faaolataga. Sa ou iloaina e tusa lava pe iu ina oti Nola, o le a mafai ona matou toe vaai ia te ia aua sa faamauina uma faatasi i matou o se aiga. Ae sa ou faamoemoe foi o le a matou mafuta ma ia iinei i le lalolagi.
I le aluga o nai isi masina na sosoo ai, sa tele lava ina i ai Tina ma Tama i le falemai. Sa o mai Tinamatua ma Tamamatua i lo matou fale e fesoasoani e vaai a’u ma o’u uso ma o’u tuafafine laiti. Sa anapopogi ma tatalo le uarota mo lo matou aiga, ma sa aumai e tamaitai agalelei mai le Aualofa ni meaai i afiafi mo i matou i nisi o taimi. Sa fia iloa e tagata uma pe na a mai Nola.
I se tasi afiafi, sa valaauina mai ai i matou uma e Tina ma Tama i totonu o le potu malolo. Sa la fai mai o le a o Tama ma le epikopo e fai se faamanuiaga o Nola. Ina ua aluese atu Tama ma lona suti ma le fusiua, sa faapotopoto mai e Tina i matou uma i talaane o le nofoa e fai se tatalo.
“Faamolemole ia faamanuia Tama a o ia tuuina atu se faamanuiaga faaleperisitua ia Nola,” o le tatalo lea a Tina. Sa faasolo ina vaivai lona leo. “Ma faamolemole, pe afai E te finagalo ai, ia mafai ona sau o ia i le fale ma ia maloloina.”
A o matou tatalo, sa mafai ona ou lagonaina le faatumulia e le Agaga Paia o le potu i le toafilemu ma le alofa. Sa pei sa ta’u mai e le Tama Faalelagi ia te a’u, e tusa lava pe o le a le mea e tupu ia Nola, o vaega uma lava ia o Lana fuafuaga.
O se taimi mulimuli ane o lena po, sa sau ai Tama ma faamatala mai ia i matou e faapea sa tupu se mea matagofie lava i le falemai. O le mea masani lava o le potu o Nola e malomaloa ma pisapisao. Sa tele masini ma faailo e i ai e tatagi ma moli emoemo, ma o taimi uma e nanati solo ai tausimai ma fomai e fesoasoani i pepe mosimosi iina. Ae ina ua taunuu atu Tama ma le epikopo, sa ese lava. Sa filemu masini uma. Sa nofonofo tausimai i talaane o pepe, e faitautusi pe vaai foi i latou. Sa mafai e Tama ma le epikopo ona tuuina atu se faamanuiaga o Nola e aunoa ma se mea na faalavelave ai.
Ou te le iloa pe o le a tuputupu ae Nola iinei i le lalolagi pe toe foi atu e nonofo ma le Tama Faalelagi i se taimi e le o mamao. Ae ua ou iloa e faafofoga ma tali mai le Tama Faalelagi ia tatou tatalo, ma ou te lagona le toafilemu pe a ou manatua ua i ai Sana fuafuaga mo tagata uma o lo’u aiga.
Ata na tusia e Ben Simonsen