Ua faaara te Ekalesia i te faanahoraa haapiiraa na te feia apî no 2013

Ua faaara te Ekalesia i te hoê faanahoraa haapiiraa apî—Haere mai, a pee mai ia’u : Rave‘a haapiiraa na te feia apî—No te mau pŭpŭ Autahu‘araa a Aarona, Feia apî tamahine, e te mau piha haapiiraa Sabati no 2013.

Te hoê o te mau opuaraa rahi o te faanahoraa Haere mai, a pee mai ia’u no te tauturu ïa i te mau orometua haapii—i roto i te Ekalesia e i roto i te utuafare—ia haapii mai ta te Faaora te huru, ma te faariro i te mau haapiiraa ei mau tau‘araa parau faatumuhia i ni‘a i te evanelia. E titauhia i te feia apî ia faaitoito mai i roto i te haapiiraa e i te aporaa.

« Tei ni‘a te faatumuraa i te haapaariraa e i te paturaa i te faaroo, te faafariuraa e te iteraa papû, ma te faaohipa i te mau haapiiraa apî a te mau hui mana faatere rahi e a te mau peresideniraa rahi o te pŭpŭ tauturu », te na reira ra te rata faaati a te Peresideniraa Matamua no te 12 no setepa 2012.

Ua faanahohia te Haere mai, a pee mai ia’u, ei tuhaa tei faatumuhia i ni‘a i te hoê haapiiraa tumu i te ava‘e hoê, e e haapiihia te reira i roto i te mau piha haapiiraa o te Haapiiraa Sabati, te Feia apî tamahine, e te Autahu‘araa a Aarona.

I roto i te tuhaa tata‘itahi, ua hau te mau haapiiraa i te mea e nehenehe e haapiihia i roto hoê ava‘e, no reira, te titauhia nei i te mau orometua e i te feia faatere ia imi i te faaûruraa e ia faaau maite no te ma‘iti i te arata‘iraa haapiiraa e faaohipa.

Ua hamani-atoa-hia te hoê buka arata‘i, Haapii i te evanelia ia au i te faanahoraa a te Faaora, o te tauturu i te feia faatere e i te mau orometua haapii ia maramarama maitai nahea ratou ia faaau i te mau haapiiraa i te hinaaro taa ê o ta ratou feia apî, e nahea ia tauturu i te feia apî ia apo i te evanelia.

E nehenehe e nene‘i mai i te mau haapiiraa atoa na ni‘a mai i te Itenati. E mahuti mai te buka haapiiraa Haere mai, a pee mai ia’u i te tahi atu taime ê. Ia tae i te hopea o te matahiti 2012, e roaa mai te mau arata‘iraa haapiiraa atoa i ni‘a i te Itenati i roto e 23 reo.

E nehenehe ta te mau melo, te feia faatere e te mau orometua haapii e haere e hi‘ohi‘o i teie faanahoraa haapiiraa apî i ni‘a i te Itenati lds.org/youth/learn.

Na te feia faatere no te retioni e no te fenua iho e faatere i te haapiipiiraa no te feia faatere e no te mau orometua haapii hou te hopea matahiti 2012.

Haere mai, a pee mai ia’u, e faanahoraa haapiiraa apî teie o te tauturu i te mau orometua ia haapii mai te au i ta te Faaora, e e tauturu atoa i te feia apî ia faafariu hope roa i roto i te evanelia.