Ang mga Batan-ong Brazilian Nagkonektar sa Family History, Buhat sa Templo
Si José A. Moscão adunay namatikdan: ang mga kabatan-onan nga miadto sa Templo sa Campinas Brazil daghan og “oras nga walay gihimo.”
Si Brother Moscão, ang direktor sa family history center nga anaa duol sa templo, nasayud nga tungod sa gilay-on daghang mga kabatan-onan ang kinahanglang mobiyahe aron makaadto sa templo, kasaragan moadto nga dinaghan ug mo-estar og pipila ka adlaw. Ang oras sa tunga-tunga sa ilang mga sesyon sa baptistry ug pagkaon ug paghulat sa ilang mga ginikanan ug mga lider nga miapil sa ubang mga ordinansa sa templo dili malikayan.
Apan tingali, naghunahuna siya, makahatag siya sa mga kabatan-onan og ikapuli sa pagsuroy-suroy sa nataran sa templo sa higayon nga sila adunay libreng oras.
Busa gihimo niya kini.
Usa ka Pagdapit
Misugod siya sa pagdapit sa mga kabatan-onan sa pagsulod sa center ug mitanyag nga motudlo kanila unsaon paghimo ang FamilySearch indexing.
Sa sinugdan ang uban naulaw o nagpanagana. Apan miingon si Brother Moscão nga sa dihang misulti siya kanila kabahin sa pagluwas sa mga tawo gikan sa kangitngit ug dad-on ngadto sa kahayag ang ilang mga pangalan agig pagsunod sa mga pulong sa buhing propeta, ang mga kabatan-onan natandog (tan-awa sa David A. Bednar, “Ang mga Kasingkasing sa mga Anak Mobati,” Liahona ug Ensign, Nob. 2011, 24–27).
Nga ang templo ug family history center mahinungdanon nga makita sa sama nga lugar nga dug-ol ra; kini nagpasabut sa pisikal nga paagi nga ang templo ug ang buhat sa family history duha ka bahin sa usa ka mahinungdanong paningkamot. Kana, miingon si George A. Oakes, presidente sa Templo sa Campinas Brazil, ang butang nga gianhi sa mga kabatan-onan sa district sa templo aron makat-unan.
“Sa wala pa ang pagpasabut og maayo kabahin sa pagpaapil nila sa family history ug indexing, ang ilang pagbiyahe sa templo mao lamang ang magpabunyag alang sa mga patay. Karon ang mga kasinatian sa indexing nahimo nang kabahin sa ilang buhat,” siya miingon.
Usa ka Pasiuna
Sa dihang misulod ang mga kabatan-onan sa center, si Brother Moscão ug ang mga misyonaryo nga nagboluntaryo sa center mihisgut sa mosunod nga mga baruganan sa mubo, dili pormal nga orientation:
-
Nahimo sila nga mga manluluwas sa bukid sa Zion (tan-awa sa Abdias 1:21).
-
Nagpatalinghug sila sa panawagan sa usa ka propeta (tan-awa sa “Ang mga Kasingkasing sa mga Anak Mobati”).
-
Nagluwas sila og mga tawo gikan sa kangitngit—ang kangitngit sa dugay nang nakalimtan nga mga film ug abugon nga mga basahon sa mga opisina sa tigrehistro ug sa mga simbahan. Ang indexing modala niadto nga mga pangalan sa kahayag ug mohimo niini nga daling masiksik aron ang ilang mga pamilya makakaplag kanila.
-
Naghimo niini nga buhat, sila moapil sa laing aspeto sa “labing mahimayaon sa tanan nga hilisgutan nga nahiapil sa walay katapusan nga ebanghelyo, ginganlan, ang bunyag alang sa mga patay” (D&P 128:17).
-
Naggamit sila sa ilang oras diha sa mahinungdanong buhat sa pagtubos sa mga patay, nga nagpanalangin sa mga pamilya.
-
Kitang tanan kabahin sa pamilya sa Dios, busa sa pag-index sa mga pangalan sa mga tawo nga wala sila makaila, nagtabang gihapon sila sa ilang pamilya.
-
Sa higayon nga makasabut sila unsaon pag-apil sa indexing, sila adunay oportunidad sa pagtudlo sa mga sakop sa ilang pamilya ug sa ubang mga batan-on sa ilang mga ward ug mga branch nga moapil usab.
Si Brother Moscão ug ang mga misyonaryo migamit dayon sa mga computer sa center aron ipakita sa mga batan-on unsaon pagsugod sa indexing ug unsaon pag-install ug paggamit sa software kon mauli na sila. Sa higayon nga makasabut sila, si Brother Moscão miingon, sila “magsugod sa pag-index uban sa kahinam nga walay sama.”
Kadasig alang sa Buhat
Ang gidaghanon mopakita niana nga kahinam. Sa unang duha ka bulan sa 2012, ang mga bisita naka-index og 6,370 ka mga pangalan; 3,305 niana gi-index sa mga kabatan-onan nga nag-edad og 12 ngadto sa 18. Gani, aron matagad ang nagtubo nga interes sa indexing, ang family history center sa Campinas kanunay nga milugway sa regular nga oras niini nga alas 8:00 sa buntag ngadto sa alas 6:00 sa gabii ug abli pa hangtud alas 10:00 sa gabii.
Apan ang mga kabatan-onan wala mohunong sa indexing sa dihang mibiya sila sa templo. Sa dihang nauli na sila, gipadayon nila ang ilang tahas sa unsay gitawag ni Brother Moscão nga “ang mga sundalo nga sobra sa 170,000 ka aktibong mga tig-index nga aduna ang Simbahan karon.” Daghan ang nakatuman sa mga tumong alang sa Katungdanan ngadto sa Dios ug Personal nga Kauswagan uban sa ilang buhat sa indexing.
Impluwenysa alang sa Kaayohan
Sayo niining tuiga, si Isabela A., 16 anyos, sa Vila Velha, Espírito Santo, Brazil, mibiyahe uban sa iyang inahan ug igsoong babaye sa templo; ang katapusang adlaw sa biyahe mao ang unang tuig nga anibersaryo sa kamatayon sa iyang lola. Si Isabela gibunyagan alang sa iyang lola, ug ang iyang inahan ang mihimo sa uban nga mga ordinansa sa templo alang kaniya.
“Gibati nako atol niining pagbiyahe nga kinahanglan kong mohimo og butang nga maayo,” mipasabut si Isabela. “Gusto ko nga makakat-on sa pag-index, ug gitabangan ko ni Brother José Moscão.
“Dayon, dihang gibunyagan ko alang sa akong lola, natandog kaayo ko sa Espiritu. Akong naamgohan nga adunay daghang mga tawo sa pikas tabil nga naghulat gayud, ug nagkinahanglan sila sa akong tabang. Akong naamgohan nga makahatag ko og gamay sa akong panahon sa pagserbisyo ug nga ako adunay daghang mahimo alang niini nga mga tawo. Ang indexing usa ka buhat sa gugma.”
Atol niini nga mga pagbiyahe ngadto sa templo, ang mga kabatan-onan sa district sa Templo sa Campinas Brazil miapil sa FamilySearch indexing tunga-tunga sa mga sesyon sa baptistry.
Gilitratohan ni José A. Moscão