Elder Richard J. Maynes
Ena Mataveiliutaki ni Vitusagavulu
“Na tamata kece e vuravura e luve ni Kalou, ka dau lomani ira vakatautavata na Luvena o Koya,” e kaya o Elder Richard John Maynes, ka se qai kacivi vou ki na Mataveiliutaki ni Vitusagavulu. Oqori, e kaya o koya, na imatai ni ivakavuvuli ni kosipeli e votu mai ena nona vakasama ni dau vakananuma na nona veiqaravi rabailevu e dau vakayacora ena veivanua tani eso, oka kina na ilesilesi ki Uruguay, Paraguay, Mexico, Ecuador, Peru, kei na Yatu Filipaini.
E vakuria vaqo, “Na veivakalougatataki tawamudu e dau yaco mai ena noda ciqoma ka bulataka na ivakavuvuli nei Jisu Karisito ena yaco kina na nodra bula vakacerecerei na luvena kece na Tamada Vakalomalagi, se vanua cava ga era tiko kina se na dredre cava era sotava tiko ena bula vakatovolei oqo.
O Elder Maynes, a sucu ena Okotova 1950 mai Berkeley, California e Amerika vei rau o Stan kei Betty Maynes, a tekivuna na nona veiqaravi e veivanua tani ena 1969 ena nona veiqaravi vakadaukaulotu tudei mai Paraguay kei Uruguay me yacova na 1971.
A vakamautaki Nancy Purrington, rau a sota ena nona cakacaka voli ena dua na otela mai Idaho, ena Okosita ni 1974 ena Valetabu e Manti Utah. E va na luvedrau.
A tauri ivola ena yabaki vata oya o Elder Maynes mai na Brigham Young University ena cicivaki bisinisi ka qai rawata e muri e dua na MBA mai na Thunderbird School of Global Management. A cakacaka vakaitaukei ka Vakailesilesi Liu ni dua na kabani ni cakamisini cici vakataki koya ni buli iyaya.
A veiqaravi o Elder Maynes vakaperesitedi ni Tabana ni Kaulotu na Mexico Monterrey mai na 1989 ki na 1992. A kacivi me dua na Vakaitutu Raraba ena 1997. Me tekivu mai na gauna oya sa veiqaravi oti ena mataveiliutaki ni Veiwasewase na South America Northwest, South America West, kei na Philippines. Sa veiqaravi oti talega o koya ena Matabose Liu ni Matabete ni Lotu, vaka-iVukevuke ni Dairekita Liu ena Tabacakacaka ni Kaulotu, vakakina vaka-Dairekita Liu ena Tabacakacaka ni Volakawa.
A kacivi ena ika 20 ni Janueri, 2012, me veiqaravi ena Mataveiliutaki ni Vitusagavulu, ka sosomitaki Elder Steven E. Snow, ka sa kacivi me Daunitukutuku makawa ka Vunivola ni Lotu.