Mensahe sa Visiting Teaching, Abril 2012

Magpalangga, Mag-amlig, kag Magpabakod

Tun-i ining materyal sing mainampuon kag, kon nagakabagay, hambali ini upod sang mga sisters nga inyo ginabisita. Gamita ang mga pamangkot agud buligan kamo sa pagpabakod sang inyo mga sisters kag himuon ang Relief Society nga aktibo nga bahin sang inyo mismo kabuhi.

Pagtuo, Pamilya, Bulig

Pareho sang Manluluwas, ang mga visiting teachers nagaalagad sa tag-isa-isa (tan-awa sa 3 Nefi 11:15). Nakahibalo kita nga madinalag-on kita sa aton pag-alagad bilang mga visiting teachers kon ang aton mga sisters sarang magsiling: (1) ang akon visiting teacher nagabulig sa akon nga magtubo sing espirituhanon; (2) nakahibalo ako nga ang akon visiting teacher nagaulikid gid sa akon kag sa akon pamilya; kag (3) kon may mga problema ako, nakahibalo ako nga ang akon visiting teacher magabulig nga indi na kinahanglan pangabayon pa.¹

Paano kita bilang mga visiting teachers magpalangga, mag-amlig, kag magpabakod sang isa ka sister? Masunod amo ang siyam ka mga panugyan nga makit-an sa kapitulo 7 sang Daughters in My Kingdom: The History and Work of Relief Society agud buligan ang mga visiting teachers sa pag-alagad sa ila mga sisters:

Magpangamuyo adlaw-adlaw para sa iya kag sa iya pamilya.
Magpangayo sang inspirasyon agud makilala sia kag ang iya pamilya.
Magduaw sa iya sing masunson agud kamustahon sia kag pasulhayon kag pabakuron sia.
Pirme magpakig-angot sa iya paagi sa mga pagbisita, mga tawag sa telepono, mga sulat, e-mail, mga mensahe sa cellphone, kag simple nga mga buhat sang kaayo.
Tamyawa sia sa mga miting sa Simbahan.
Buligi sia kon may yara sia sang emerhensya, masakit, ukon iban pa nga importante kaayo nga mga panginahanglan.
Tudloi sia sang ebanghelyo gikan sa balaan nga mga kasulatan kag sa mga Mensahe sa Visiting Teaching.
Iinspirar sia paagi sa pagpakita sing maayong halimbawa.
Magpahibalo sa lider sang Relief Society parte sa ila pag-alagad kag sa espirituhanon kag temporal nga kaayuhan sang sister.

Gikan sa Balaan nga mga Kasulatan

Lucas 10:38–39; 3 Nefi 11:23–26; 27:21

Gikan sa Aton Kasaysayan

“Ang visiting teaching nangin isa ka pamaagi para sa mga kababayin-an sang mga Santos sa Ulihing mga Adlaw sa bug-os kalibutan nga magpalangga, magbatiti, kag mag-alagad—nga ‘magbuhat suno sinang mga balatyagon nga gintanom sang Dios sa [aton] mga dughan,’ subong nga gintudlo ni Joseph Smith.”²

Ang isa ka sister nga bag-o lang nabalo nagsiling parte sa iya mga visiting teachers: “Namati sila. Ginpasulhay nila ako. Gin-updan nila ako sa akon paghibi. Kag ginhakos nila ako. … Ginbuligan [nila] ako nga makalampuwas gikan sa tuman nga kalisud kag kamingaw sadtong una nga pila ka bulan sang pag-isahanon.”³

Ang pagbulig sa temporal nga mga buluhaton isa man ka sahi sang pag-alagad. Sa pangkabilugan nga komperensya sang Oktubre 1856, si Pangulong Brigham Young nag-anunsyo nga ang de-kariton nga mga pionero nabara sa madamol kaayo nga isnow 270–370 ka milya (435–595 km) ang kalayuon. Nagpanawagan sia sa mga Santos sa Ulihing mga Adlaw sa siyudad sang Salt Lake nga luwason sila kag “hatagan gid sang igtalupangod inang mga butang nga aton ginatawag nga temporal.”⁴

Si Lucy Meserve Smith nagrekord nga naghukas sang ila madamol nga mga pang-sulod nga palda kag mga medyas didto mismo sa tabernakulo kag gintumpok ang mga ini sa mga karwahe agud ipadala sa natugnawan nga mga pionero. Dayon nagpanipon sila sang mga kobre-kama kag mga panapton para sadtong magaabot sa ulihi nga may pila lamang ka mga pagkabutang. Sang ang de-kariton nga mga grupo nag-abot, isa ka bilding sa banwa “ang puno sang mga suplay para sa ila.”⁵

© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/11. Petsa sang pagtugot sa paglubad: 6/11. Paglubad sang Visiting Teaching Message, April 2012. Hiligaynon. 10364 861

Ano ang Sarang Ko Mahimo?

Paano ko mahibaloan kon ano ang mga kinahanglanon sang akon mga sisters?
Paano mahibaloan sang akon mga sisters nga nagaulikid gid ako sa ila?