Lamharon
Makita Ko Sia Liwat
Ginpabatyag ni tatay sa kada isa sa amon nga mga anak nga espesyal kami. Ginpalangga niya kami kag madasig sia magpatawad. Ginhimo niya ang tanan-tanan agud sigurohon nga ang tagsa sa amon malipayon, kag iya ginpaathag nga luyag niya ang pinakamaayo para sa amon. Palangga ko gid sia katama.
Sang grade six ako, ang akon tatay napatay sa isa ka aksidente sa salakyan. Ako kag ang akon pamilya tuman gid nga nagkalisud. May nangin dako nga kakulangan sa amon pamilya. Si tatay ang tawo nga akon ginasaligan, ang tawo nga akon ginapalapitan kon may mga problema ako. Imbes nga mangayo sang bulig, gintugutan ko ang kaakig kag kasakit nga magpabilin. Sang ulihi namat-od ako nga yadto sala sang Dios. Gin-untat ko ang pagbasa sang akon balaan nga mga kasulatan kag pagpangamuyo. Nagasimba lamang ako bangod gusto ni Nanay. Gintinguhaan ko nga magpalayo sa akon Amay nga Langitnon.
Dayon nag-upod ako sa Young Women camp sa una nga tion. Nanamian ako magpangilala, apang wala ko sa gihapon ginabasa ang akon balaan nga mga kasulatan. Sa katapusan nga gab-i, naghiwat kami sang testimony meeting. May nabatyagan ako nga wala ko mabatyagi sa malawig nga panahon: ang Espiritu. Nagdayaw ako sang mga bataon nga babayi nga nagtindog kag nagpahayag sang ila mga panaksihon, apang padayon ako nga nakapungko bangod sa hunahuna ko wala ako may mapaambit nga panaksihon. Sa hinali nabatyagan ko nga kinahanglan ko magtindog. Gin-abre ko ang akon baba, nga nagahunahuna kon ano ang akon hambalon. Gani nagsiling ako nga nalipay ako sang Young Women camp. Dayon namarasmasan ko na lang ang akon kaugalingon nga nagasiling nga nahibal-an ko nga si Jesucristo napatay para sa akon kag nga ang akon Amay nga Langitnon nagapalangga sa akon kag nga ang Simbahan matuod.
Napuno ako sing pinasahi nga paghidaet. Salamat sa sining eksperiyensya sarang ako makasiling nga nakahibalo ako nga makita ko ang akon tatay liwat bangod sang Pagpasag-uli kag Pagkabanhaw sang Manluluwas.