Na ka e Vakavulica na iVola i Momani baleta na Loloma ni Kalou

Mai vei Elder Russell M. Nelson

Ena Kuoramu ni iApositolo Le Tinikarua

Eso na ivakaraitaki cecere ni Nona loloma na Turaga e volai tu ena iVola i Momani.

iVakatakilakila

Elder Russell M. Nelson

Levu sara na lotu Va-Karisito era sa kila na ivakaraitaki i Jisu Karisito me vaka e volai tu ena iVolatabu. Era qoroya na Nona dau lomani ira na dravudravua, na tauvimate, kei ira era dau butukisobu tu. O ira era sa Nona tisaipeli era na dau vakatotomuri Koya ka muria na nodra ivakasala na Nona iApositolo: “Meda veilomani, ni sa mai vua na Kalou na loloma, ia ko koya yadua sa dauloloma sa vakasucumi koya na Kalou, a sa kila na Kalou ko koya. … Ni sa loloma na Kalou” (1 Joni 4:7–8).

Na nanuma qo e vakamatatataka na iVola i Momani.E vakamacalataka se caka vakacava me dua e sucu mai vua na Kalou kei na cava me caka me dua e dauloloma me vakataki Koya. E tukuna e tolu na ivakavuvuli dina ka na kauta mai na kaukauwa ni loloma ni Kalou ena noda bula.

Na imatai sa ikoya, ni iVola i Momani e vakavulica ni ko vakabauti Jisu Karisito ka vakayacora na veiyalayalati vata kei Koya ka maroroya na nona ivakaro sa ikoya na ki kina sucuvou vakayalo. Vei ira era tiki ni iVola i Momani ka ra sa ia na veiyalayalati vaka o ya, e kaya o Tui Penijamini, “Ia ena vuku ni veiyalayalati dou sa vakayacora, dou sa vakatokai kina mo dou luvei Karisito, raica sa vakasucumi kemudou vakayalo ko Koya ena siga oqo, ni dou sa kaya dou sa vakabauta na yacana ka veivutuni, a sa vakasucumi kemudou kina mo dou luvena” (Mosaia 5:7).

Na ikarua sa ikoya ni iVakabula vakai Koya e vakavulica ni kaukauwa meda na vakataki Koya ena yaco ni sa ciqomi na cakacaka vakalotu ni kosipeli: “Ia oqo na noqu ivakaro: Dou veivutuni koi kemudou kecega na kai vuravura, dou lako mai vei au ka papitaisotaki ena yacaqu, ia mo dou vakasavasavataki ena Yalo Tabu mo dou savasava kina e mataqu ena siga mai muri” (3 Nifai 27:20).

Na ikatolu, e vakabibitaka o Koy avei keda meda vakamuria na nona ivakaraitaki: “Ia, a cava na ivalavala sa kilikili kei kemudou?” E taroga ena vakatataro. Nona isaunitaro: “Au sa kaya vakaidina vei kemudou, mo dou vakataki au” (3 Nifai 27:27). Sa dina sara, o Koya e vinakata meda vakataki Koya.

Eso na ivakaraitaki cecere ni Nona loloma e volai tu ena iVola i Momani Na ivakaraitaki oqo ena rawa nida vakayagataka ena noda sasaga meda veiucui kei Koya.

Na Nona lomani Liai kei na nona matavuvale—kei na nodra lomani Koya—sa ikoya ka kauti ira ki Amerika, na nodra vanua yalataki, na vanua era laki bula vakacegu kina.¹

Na nona lomani keda na Kalou, ena vica na senitiuri sa oti, sa ikoya e a vakaroti ira kina na parofita ni gauna i Nifai mera maroroya na itukutuku ni nodra kawa. Na lesoni me vulici mai na itukutuku o ya e semata na noda vakabulai kei na bula vakacerecerei. Na veivakavulici oqo sa tiko ena iVola i Momani. Na itukutuku bibi oqo sa tu me ivakadinadina ni loloma ni Kalou baleti ira na luvena ena veiyasai vuravura.²

Na loloma ga i Karisito baleti ira ‘eso tani tale na sipi” ka kauti Koya kina Vuravura Vou.³ Eda vulica mai na iVola i Momani ni gauna e mate kina na Turaga mai na Vuravura Makawa e a yaco na veika vakarerevaki kei na buto ni vanua me tolu na siga mai naVuravura vou. Sa qai siro sobu mai lomalagi na Turaga ni sa Tucaketale kei na Nona lagilagi me veivakavulici vei ira na tamata ena Vuravura Vou.

“Koi au na rarama kei na vu ni bula kei vuravura” e kaya vei ira o Koya, “au sa gunu mai na bilo ka solia vei au ko Tamaqu, au sa colata na nodra ivalavala ca na kai vuravura me vakacaucautaki kina ko Tamaqu” (3 Nifai 11:11).

Ni oti oya sa qai vakavuna edua na veikilai titobu sara ka rawa me vakayacora vata kei na dua. Sa qai sureti ira mera mai tara na mavoa sa tu e sarisarina kei na we ni ivako e Ligana kei na yavana me rawa ni ra kila kina ni o Koya “na Kalou ni Isireli, kei na Kalou ni vuravura kecega, kau sa mate ena vuku ni nodra ivalavala ca na kai vuravura” (3 Nifai 11:14).

Sa qai solia o Jisu vei ira na Nona tisaipeli na dodonu mera veipapitaisotaki, na soli ni solisoli ni Yalo Tabu, kei na nodra vakatabuya na sakaramede. Solia vei ira o Koya na kaukauwa mera tauyavutaka na Nona Lotu ka mera liutaka na tisaipeli.

Solia vei ira e so na ivakavuvuli ka sa solia talega vei ira na Nona tisaipeli mai na Vuravura Makawa. E vakabulai ira na nodra tauvimate. E tekiduru ka masu vua na Tamada ena kaukauwa ka vakalou ka sa sega mada ga ni rawa me volai. Ena kaukauwa ni qaqa ni Nona masu o ira era rogoca era vakasinaiti sara ga ena yalovakacegu. Ni sa vakasinaiti o Jisu ena Nona lomani ira e vakavuna sara ga Vua me tagi. E parofisaitaka na cakacaka ni Kalou ena veitabayabaki ka na liu mai ni bera ni qai yaco na gauna sa parofisaitaki tu baleta na Nona Lesumai Vakarua.⁴

Sa qai kerea vei ira mera kauti ira mai Vua na luvedra lalai.

Sa keveti ira yadua na gonelalai ka vakalougatataki ira ka masulaki ira vei Tamana.

A sa tagi ni sa vakalougatataki ira oti;

Sa qai vosa vei ira na lewevuqa ka kaya, Dou raici ira na nomudou lalai.

“Ia ni ra sa raici ira yani, era sa rai cake sara ka raica ni sa tadola ko lomalagi, ka ra sa siro sobu mai kina na agilosi ka sa vaka e nodra sala sobu mai na yameyame ni bukawaqa era sa mai vakavolivoliti ira na gonelalai, … ka qaravi ira” (3 Nifai 17:21–24).

Vaka sara ga o ya na savasava kei na kaukauwa ni loloma ni Kalou ka vakatakilai tiko ena iVola i Momani.

Ena gauna oqo vei keda ka da sa kalougata ni sa tiko vei keda na iVola i Momani, ka da sa lewena tiko na Lotu ni Turaga, sa tiko vei keda na Nona kosipeli, ka da sa na maroroya na Nona ivakaro eda sa na kila tiko na kena sa rui totoka na loloma ni Kalou. Eda kila me da rawata vakacava meda na taukena na Nona loloma. Ni da sa wili me Nona tisaipeli dina, eda sa na rawata kina na kaukauwa meda na dauloloma vakataki Koya. Ni da sa maroroya ga na nona ivakaro eda sa na vakataki koya sara tiko ga. Eda sa na vakarabailevutaka na noda loloma ena noda raici ira yani na tamata ena veiyasai vuravura, veimatavuvale kei na duivosavosa.

Ena yalovakavinavinaka baleta na Nona ivakaraitaki vinaka, sa rawa ni da cakava me noda ibole na tiki ni ivolanikalou oqo. “Dou masuta na Tamada ena yalomudou taucoko me vakasinaiti kemudou ena loloma oqo, io na loloma sa solia vei ira era sa muria na Luvena ko Jisu Karisito ena yalodina, mo dou yaco kina mo dou luve ni Kalou, ia ni sa rairai mai ko Koya, eda na tautauvata kaya, ni da na raica na matana dina” (Moronai 7:48).⁵

Na Kila Sa iKoya na Kila na Loloma

O au e dua na lewenilotu vou ni Lotu iJisu Karisito ni Yalododonu Edaidai, kau kila ni iVola i Momani e sega ni dua na ivola walega. E ivakadinadina qaqa ni nona lomani keda o Tamada Vakalomalagi. Sa ivakadinadina ni nodra lomani keda o ira na Yalododonu e liu. Sa ivakadinadina ni tiko dina ka taucoko vinaka tu na yavu ni bulamarau ni Kalou.

Na kilai ni dina ni ivola oqo sa ikoya na kena kilai ni bula tiko na Tamada Vakalomalagi kei na Luvena. Sa ikoya na kena kilai ni bula e ka totoka sara ka tawamudu. Sa ikoya na kena kilai ni ko na tovolea tikoga mo vinaka sara ka veivutuni ni ko sa lutu, ko na vosoti ena veigauna kece sara. Sa ikoya na kena kilai na ibalebale dina ni matavuvale. Sa ikoya na kena kilai ni ko na sega sara ni vakayalia e dua na wekamu, ni ra na waraki iko tu mai. Sa ikoya na kilai ni veivakalougatataki ni Tamada Vakalomalagi. Sa ikoya na kena kilai na vakacegu ena gauna ni cagilaba, sa na rawa ni o sa sotava ni oqo na ka ena gadrevi mo sotava. Sa ikoya na kena kilai ni Yalo Tabu me nomu itokani tu e veigauna. Sa ikoya na kena kilai ni loloma, e isaluwaki ni veika ena bulataki.

Emma Adesanya, Ireland

Kidava na Kaukauwa ni Nona Loloma

Niu a curu ena Lotu ena itekivu ni noqu vuli ena koliji au a taleitaka sara na veisau au a sotava, ka raica na veika vivinaka sa cakava tiko na kosipeli ena noqu bula. Au sa qai vakila ni vakalatilati tiko kina noqu via toso ki liu na noqu bula makawa. Ena rawa vakacava me vakayagataki au na Tamada Vakalomalagi meu veivuke ena tarai cake ni Nona matanitu ni oti na noqu a vakayacora eso sara na digidigi cala?

Ia ena dua na siga niu qai cega na noqu iVola i Momani ka wilika sara na iotioti ni tabana. Au a wilika na vosa ni vakamoce nei Moronai: “Dou lako mai vei Karisito, mo dou vinaka kina, … ia kevaka dou sa biuta tani na ivalavala sa sega ni vakalotu ka lomana na Kalou ena lomamudou taucoko, kei na yalomudou taucoko, kei na nomudou igu taucoko, sa na qai rauti kemudou na Nona loloma, ia na Nona loloma dou sa qai vinaka kina ena vukui Karisito, ia kevaka dou sa vinaka ena loloma ni Kalou ena vukui Karisito, sa na sega ni rawa mo dou cakitaka na kaukauwa ni Kalou” (Moronai 10:32). Au wadrava sara ga na veivosa oqori. Au vakila ni tukuna vei au na Yalotabu ni dina. Au sa qai vakila niu sa vakalailaitaka tiko ga na kaukauwa ni Kalou ena noqu nanuma ni na sega ni rawa me vakayagataki au o Koya me vaka ga na Nona lewa.

Au sa qai lewa me tekivu o ya au sa na sega ni “cakitaka na kaukauwa ni Kalou” ia au sa na ciqoma na ka sa oti ka vakanamata yani ki liu. Na levu ga ni noqu vakanamata ki liu ka lailai kina gauna sa oti, ka vakararavi ga kina loloma nei Jisu Karisito, na levu ni noqu vakila na loloma ni iVakabula kau sa marau sara vakalevu.

Christy Pettey, Washington, Amerika

Veipapitaisotaki o Alama ena Wai o Momani, mai vei Arnold Friberg

Sikovi Amerika o Jisu Karisito, mai vei John Scott