iVakavuvuli ni Noda Gauna Oqo

Eda vulica mai vei ira na parofita ni gauna makawa ni ra sa umanaki tu ena iVola i Momani e vuqa sara na “veitikina macala vinaka sara ka talei” ka ra maroroi tu mai meda vakasalataki kina ena noda gauna oqo (raica na 1 Nifai 13:40; 19:3). Na veika dina oqo veivakadodonutaki ka vakatorocaketaka na kena kilai vakavinaka na taucoko ni kosipeli i Jisu Karisito ka vukei ira era vulica na iVola i Momani mera muataka lakova na bolebole ni bula oqo ena inuinui kei na kaukauwa. Ena vica na malanivosa oqo, era vakadinadinataka kina na parofita kei na iapositolo ni gauna oqo na ivakavuvuli bibi oqo.

Sa Daunanumi Keda Tiko na Turaga

President Thomas S. Monson

“E votu mai vei au na nona vosa na Turaga e tiko ena ivola i Ica ena iVola i Momani. A kaya kina na Turaga ‘Raica kevaka au sa sega ni vakarautaki kemudou mo dou sota kei na ua lelevu ni wasawasa, na cagi kei na uwaluvu, dou na sega ni kosova rawa na wasaliwa titobu oqo’ [Ica 2:25]. Kemuni na taciqu kei na ganequ, sa vakarautaki keda tiko o Koya. Kevaka meda na rogoca na Nona vosa ka bulataka na ivunau, eda na vakabulai rawa mai na gauna oqo ni itovo vakasisila kei na ivalavala butobuto—na gauna eda rawa ni vakatauvatana ki na ua lelevu kei na cagi kei na uwaluvu e rawa ni veivakarusai. Sa daunanumi keda tiko o Koya. E lomani keda ka na vakalougatataki keda ni da vakayacora na veika dodonu.”

Peresitedi Thomas S. Monson, “Na iOtioti ni Vosa,” Liaona, Nove. 2009, 109.

O Jisu na Karisito

President Henry B. Eyring

“Na iVola i Momani sai koya na ivakadinadina kaukauwa duadua e volai ka sa tu vei keda me baleta nona sa Karisito o Jisu. Na cava a kaya o Nifai me baleta na yavu ni kena ciqomi na Yalo Tabu? Vakabauta na Turaga o Jisu Karisito. Na kena wiliki ena veigauna eso na iVola i Momani ena vakadeitaka beka na vakabauti ni Turaga o Jisu Karisito? O na sega sara ni boletaka oqori kevaka mo na wilika mada vakavinaka na Nifai. A kaya kina ni ‘oqo na isolisoli … kivei ira sa vakasaqarai koya vagumatua.’ Na vagumatua e kena ibalebale na veigauna taucoko. Sa kena ibalebale talega na vakasamataka vakatitobu kei na masumasu. Na masumasu ena oka talega kina na kerekere vakaidina me kila na dina. Ni lailai sobu ena sega ni okati me gugumatua. Ni lailai sobu ena takiveiyaga vei iko kei au.”

Peresitedi Henry B. Eyring, iMatai ni Daunivakasala ena Mataveiliutaki Taumada, “Going Home,” ena Brigham Young University 1986–87 Devotional and Fireside Speeches (1987), 77–78.

Na iVakaro Raraba ni Kosipeli

President Dieter F. Uchtdorf

“Na iusutu bula ni itukutuku ni kosipeli era sa umani tu ena ivolanikalou tabu ia e laki vakamatatataki cake ena iVola i Momani kei na ivakatakila kivua na Parofita o Josefa Simici. Oqo na vanua e vakaraitaka vakavinaka kina o Jisu Vakaikoya na Nona vunau kei na Nona kosipeli, ka mera vakamuria o ira na luve ni Kalou me ra ‘rawata na bula tawamudu’ (V&V 14:7).”

Peresitedi Dieter F. Uchtdorf, iKarua ni Daunivakasala ena Mataveiliutaki Taumada, “E Sega Li ni Kilikili Me da Marau?” Liaona, Nove. 2007, 19.

Nodra Papitaiso na Gonelalai

President Boyd K. Packer

“[Eso era vakabauta] ni ra kunekunetaki mai na ivalavala ca o ira na gonelalai ka ra curuma mai na bula vakayago oqo ena dua na ituvaki ca. Oqori e ivakavuvuli lasu!

“‘Ia kevaka e dina na ka au sa rogoca,’ a vola o Momani, ‘dou sa veiletitaka tiko na nodra papitaiso na gonelalai’ (Moronai 8:5).

“A vakatoka na nodra veileti me ‘cala vakasisila’ ka vola: …

“‘Mo rogoca na vosa i Karisito, na nomu iVakabula, na nomu Turaga ka nomu Kalou. Raica au sa sega ni lako mai ki vuravura meu kacivi ira sa yalododonu, ko ira ga sa ivalavala ca mera veivutuni; sa sega ni yaga na vuniwai vei ira sa bula vinaka, vei ira ga sa tauvimate; ia, ko ira na gonelalai era sa savasava, ni ra sega ni kila na ivalavala ca; ia sa sega ni tau vei ira na cudru ni Kalou vei Atama ena vukuqu, ka ra sa galala mai kina; …

“‘Raica oqori na vosa ni Kalou sa vakatakila vei au na Yalo Tabu; ia, na luvequ lomani, dou sa vakalialia na Kalou, ni dou sa papitaisotaki ira na gonelalai’ (Moronai 8:7–9). …

“Wilika taucoko na nona ivola. Oqo na ivakavuvuli dina.”

Peresitedi Boyd K. Packer, Peresitedi ni Kuoramu ni iApositolo Le Tinikarua, “Little Children,” Ensign, Nove. 1986, 17.

iVakaro mai na iVola i Momani

Elder L. Tom Perry

“Ena kedra maliwa na veilesoni eda vulica mai na iVola i Momani sai koya na vuni kena yaco kei na kena revurevu e dua na ivalu vakakina na sala ni kena wali. E tukuni kina na veika ca kei na veika vakarerevaki ni isoqosoqo vere vuni eso, ka ra tubu cake mera rawa ka kei na kaukauwa mai vei ira na tamata. E tukuna ni tiko dina o Setani ka vakaraitaka talega eso na iwalewale ni veika e dau vakayagataka. E vakasalataki keda ena kena vakayagataki vakavuku ni noda iyau. E vakamatatataka sara ga na rawarawa kei na dina ni kosipeli, kei na dina ni vakalou nei Jisu Karisito kei na Nona Veisorovaki me baleta na kawatamata. E vakaraitaka talega na nodra na vakasoqoni vata na Isireli ena iotioti ni gauna. E tukuna vei keda na inaki kei na ivakavuvuli ni veivakalotutaki. E vakasalataki keda meda qarauna na yalo dokadoka, sega ni veikauwaitaki, yalowele, na rerevaki ni ivakavuvuli vakailasu, veidabui, kei na bula dukadukali.

“Oqo sa vakatau sara ga vei keda na noda wilika na iVola i Momani ka vulica na kena ivakavuvuli ka bulataka.”

Elder L. Tom Perry ena Kuoramu ni iApositolo Le Tinikarua, “Veivakalougatataki mai na Kena Wiliki na iVola i Momani,” Liaona, Nove. 2005, 8.

Ena Vakalesuimai na Veika Kecega

Elder Dallin H. Oaks

“Ena iVola i Momani e vakamacalataki vakamatata sara kina na vakasama raraba ni tucaketale. A vakavuvulitaka na Parofita o Amuleki:

“‘Ia na mate i Karisito ena sereka na ivau ni mate vakayago ka ra na tucaketale ko ira kecega era sa mate.

“‘E rau na coko vata tale na yago kei na yalo ena kena itutu dina; ia ena semati vata tale na veitiki ni yago me vaka e liu; …

“‘Ia ena tucaketale mai na mate na tamata kecega, na qase kei na gone, na bobula kei na itaukei, na tagane kei na yalewa, ko ira sa ivalavala ca kei ira na yalododonu; ia ena sega ni yali e dua na drau ni uludra; ia ena cokoti vata tale na yagodra kei na yalodra ki na kena itutu e liu’ (Alama 11:42–44).

“A vakavuvulitaka talega o Alama me baleta na tucaketale ‘io ena semati vata na veitiki ni yago me vaka e liu’ (Alama 40:23). …

“Sa dua na vakacegu levu ni ra na tucaketale ka cokoti vata tale na yago kei na yalo me vaka e liu … ko ira na vakaleqai tu vakayago.’”

Elder Dallin H. Oaks ena Kuoramu ni iApositolo Le Tinikarua, “Na Tucaketale,” Liaona, Julai 2000, 17.

Na Rerevaki ni iSoqosoqo Vere Vuni

Elder M. Russell Ballard

“E vakavulica na iVola i Momani ni sa veibolei sara tiko vakalevu na nodra cakacaka ca na isoqosoqo vere vuni, sega walega vei ira na tamata yadua kei na matavuvale ia sa vakakina ki na kawa tamata kecega. Era oka tiko ena isoqosoqo vere vuni oqo o ira na ilawalawa ca, dauvolitaki waigaga, kei na isoqosoqo ca vakamatavuvale. Era cakacaka tiko na isoqosoqo vere vuni oqo vakataki ira na daubutako e Ketianitoni ena gauna ni iVola i Momani. … E nodra inaki talega mera ‘laba kina, vakacaca, butako, ka ia na veibutakoci ka kitaka na itovo ca kecega sa veicalati kei na lawa ni nodra matanitu kei na vunau ni nodra Kalou’ [Ilamani 6:23].

“Kevaka meda sega ni qaqarauni, sa rawa me totolo sara ka taucoko mai na nodra kaukauwa ka veivakauqeti na isoqosoqo vere vuni ni gauna oqo me vaka ga a yaco ena gauna ni iVola i Momani.”

Elder M. Russell Ballard ena Kuoramu ni iApositolo Le Tinikarua, “Standing for Truth and Right,” Ensign, Nove. 1997, 38.

iWali ni iBolebole ni Bula Oqo

Elder Richard G. Scott

“Era sa umani tu ena iVola i Momani na itukutuku sa vakarautaki tu vakalou me vakaraitaka mai na sala me vakadodonutaki kina na veivakauqeti ni ivakarau ni bula lasu kei na sala me ciqomi kina na taucoko ni bula. E vakavulici kina na sala me wali kina na leqaleqa kei na veibolebole eda sotava tiko ena gauna oqo. … Sa vakarautaka tu [Na Turaga] na sala me vakadodonutaki kina na cala bibi ni bula oqo, ia ena vakatawayagataki na veidusimaki oqo kevaka me lokataki tikoga ena dua na ivola sogoti.”

Elder Richard G. Scott ena Kuoramu ni iApositolo Le Tinikarua, “True Friends That Lift,” Ensign, Nove. 1988, 76.

Meda Nanuma Kina na Noda Veiyalayalati

Elder Robert D. Hales

“Sa dau vakalesuya tikoga vei keda na iVola i Momani ni noda papitaiso e dua na veiyalayalati meda ‘vakadinadinataka na Kalou [kei na Nona matanitu] ena veigauna kecega kei na veivanua kecega dou sa tiko kina me yacova na mate, io me vakabulai kemudou na Kalou, ka okati kemudou vata kei ira ena imatai ni tucaketale mai na mate, me nomudou kina na bula tawamudu’ (Mosaia 18:9; vakamatatataki).”

Elder Robert D. Hales ena Kuoramu ni iApositolo Le Tinikarua, “Na Veiyalayalati ni Papitaiso: Meda Tiko ena Matanitu ka Lewe ni Matanitu,” Liaona, Janueri 2001, 7.

Na Veivakalougatataki ni Talairawarawa

Elder Quentin L. Cook

“Levu sara na vanua ena iVola i Momani e tukuni tu vei ira na tamata ni kevaka mera talairawarawa ki na vunau era na qai tiko sautu ena vanua [raica na 1 Nifai 2:20; 2 Nifai 4:4]. Na yalayala o ya ena dau muria ga mai na ivakasala ni kevaka mera sega ni talairawarawa ki na vunau ni Kalou, era na tagutuvi laivi mai na Nona iserau [raica na Alama 36:30].”

Elder Quentin L. Cook ena Kuoramu ni iApositolo Le Tinikarua, “Nuitaka Ni Ko na Kila, Keitou Sotava e Dua na Gauna Dredre,” Liaona, Nove. 2008, 104.

Na nodra ivakadinadina na lewe ni Kuoramu ni iApositolo Le Tinikarua me baleta na iVola i Momani e rawa ni laurai ena ilavelave oqo ena tabana 10, 28, 32, 38, kei na 80.

Rau sa Mai Duabau e Rua na iTitoko

Niu se gone lailai sara sa tu vei au na iVola Tabu, me yacova niu sa ciqoma kina na iVola i Momani, au a sega tu ni kila na ivakavuvuli kece sara ni kosipeli. Au sa raica kina ni sa rawati walega na taucoko ni kosipeli i Jisu Karisito ena kena kilai na ikarua ni “ititoko” (raica na Isikeli 37:15–17). Ni rau sa semati vata mai baleti au, e veisautaka vakadua na noqu bula—au sa kilai au cake vakavinaka kei na noqu rawa ni lewe talega ni matavuvale tawamudu ni Kalou. Na cokovata sa parofisaitaki tu mai oqo—“ena yaco kina me dua vata ga ena ligamu” (tikina 17)—sa mai rawa kina ena nodrau kauwai e rua na goneyalewa daukaulotu yalodina ena nodrau solia vei au e dua na ilavelave ni ikarua ni ititoko.

E liu, a noqu rarama ga na cina kadrala; ia oqo sa mai vakararamataki cake na veituvaki kei na cicila eso ena veivakalougatataki ni taucoko ni kosipeli. Sa vaka ni sa soli vei au e dua na bula vou.

Ary Sala, British Columbia, Canada

Toso ki Liu ena Rarama

Eda wilika ena Ica wase 2 ena nona sa lomaleqa o taci Jereti ni sa na sega na cina ena loma ni nodra waqa. A taroga kina na Turaga baleta na ka oqo, ka sauma mai na Turaga ena dua na taro: “Ia na cava ko vinakata meu vakarautaka me nomudou cina?” (tikina e 25).

Au vakasamataka toka na sala a laki vakayacora kina o taci Jereti na taro ni Turaga. iMatai a laki kabata e dua na ulunivanua, me laki “bulia mai kina e 16 na vatu lalai” (Ica 3:1). A kauta sara na vatu oqo ki na dela ni ulunivanua, me laki masu. A tekivu ena nona vakamalumalumutaki koya vua na Turaga. A kerea me lomani, ka sa vakavinavinakataka na kaukauwa ni Turaga me sauma mai na nona masu. A qai vakaraitaka na nona vakabauta ena nona kaya, “Keimami kila ni sa rawa mo ni vakaraitaka eke na nomuni kaukauwa levu” (Ica 3:5). A kerea na taci Jereti vua na Turaga me tara na vatu me rawa ni laki vakararamataka na waqa.

Na itukutuku oqo sa mai veisautaka na ivakarau ni noqu masu. E liu, au dau taroga tu, “Tamaqu, na cava beka o ni vinakata meu cakava?” Na ka dina, o ya ni vuqa sara na gauna e gadrevi meu soli vakasama mada, vakadikeva na veika e tu vei au, tuvanaka na veika eso, oti meu qai gole vua na Tamada ka kerea Vua ke sa donu na ituvatuva o ya—ka laki masu me yaco na cakamana kau sega ni cakava rawa vakai au.

Elena Gómez de Santurión, Uruguay

E Tawamudu na Matavuvale

Au sa dau wilika tu mai na iVola i Momani mai na gauna au a papitaiso kina ena 1995. Ia me laki yacova sara niu sa laki vakamau sa vakaibalebale cake vei au kei na noqu matavuvale na noqu wilika na nodratou talevi Jerusalemi tiko na luvei Liai.

Sa vaka me vinakata na Turaga me tawamudu na matavuvale nei Liai. Taumada a kaya vei Liai me biuta tu mai na veika kecega ka me vakabula na nona matavuvale o ya ka me kauti iratou ki na vanua yalataki. Ena gauna ratou sa tiko kina ena lekutu, a kaya na Turaga vei Liai me talai iratou lesu na luvena me ratou laki kauta mai na kedratou ivolatukutuku na lewe ni matavuvale taumada. Ni oti o ya, a talai iratou me laki kau mai o Isimeli kei iratou na luvena yalewa. Sa vakarautaki kina oqo na nodratou matavuvale ni mataka.

Na kena semati na noda matavuvale tawamudu ena gauna oqo, e liu, kei na kena ni mataka sa itavi bibi sara meu na vakamareqeta—me vaka a vakayacora o Liai. Mai na veika beka oqo a vakarautaki kina o Liai me raica na vunikau ni bula kei na nona kila vakavinaka ni loloma ni Kalou e dodonu me teivaki tu ena loma ni dua na matavuvale tawamudu.

Salote Malani Maiwiriwiri, Hawaii, USA