Fas Presidensi Mesej SEPTEMBA 2011
Jeneral Konfrens—I No Wan Blesing Olbaot
Wan gudfala memba blong Jos i bin stap toktok wetem wan neiba we i no gat sem bilif olsem hemia blong yumi. Taem topik blong storian i tanem i go long jeneral konfrens, neiba ia i askem: “Yu talem se yufala i gat ol profet mo ol aposol? Mo, tu taem long wan yia, long wan wol konfrens, oli talemaot toktok blong God?”
“Yes. Hemia nao,” memba ia i ansa wetem ful tras long hemwan.
Neiba i tingting long hemia blong smol taem. I luk se hem i intres tru, mo afta i askem: “Wanem nao oli bin talem long las jeneral konfrens?”
Long stret taem ia, gudfala memba blong Jos i nomo gat gudfala tingting tumas blong serem gospel, mo hem i sem. Hem i traehad, be hem i no save tingbaot nating ol smol pat blong wan toktok.
Fren blong hem i luksave i had long hem mo talem: “Yu minim blong talem long mi se God i toktok long man, long dei blong yumi, mo yu no save tingbaot wanem nao Hem i talem?”
Tingting blong brata ia i stap daon afta long storian ia. Hem i bin promesem hem se bae hem i mekem gud moa blong tingbaot ol toktok we ol wokman blong Lod oli stap talem long jeneral konfrens.
Yumi evriwan i save olsem wanem i had tumas blong tingbaot evri mesej blong jeneral konfrens, mo mi save stret se yumi no nid blong stap sem sapos yumi no tingbaot evri samting. Be, i gat ol mesej long wanwan jeneral konfrens, we oli givim olsem wan presen mo wan blesing, we i kam long heven speseli from wanwan long ol situesen blong laef blong wanwan long yumi.
Blong rere long jeneral konfrens, bae mi givim tri stamba tingting we bae i save helpem yumi blong kasem, tingbaot, mo yusum ol toktok we ol wokman blong Lod oli talem, long wan moa gud wei.
1. Ol memba blong Jos oli gat raet blong kasem revelesen blong olgetawan taem oli stap lisin mo stadi long ol toktok we oli kam tru long insperesen mo oli talemaot long jeneral konfrens.
Taem yu stap rere from jeneral konfrens, mi invaetem yufala blong tingting hevi long ol kwestin we yufala i nid blong gat ansa long hem. Eksampol, ating yu wantem tumas se Lod i daerektem mo lidim yu long saed blong ol jalenj we yu stap fesem.
Ol ansa long ol spesel prea blong yu bae i save kam stret long wan spesel toktok, o i kam tru long wan sot toktok. Long sam taem, ol ansa oli kam long wan toktok hemwan, wan sot toktok o wan singsing. Wan hat we i fulap wetem tangkyu from blesing blong laef mo i wantem tumas blong harem mo folem ol toktok blong kaonsel, bae i mekem rod i rere blong kasem revelesen blong hemwan.
2. No tingting nating long wan mesej from se yu ting se yu harem toktok ia finis.
Oltaem, ol profet oli tij long fasin blong ripitim samting; hem i wan rul blong fasin blong stap lanem samting. Bae yu luk se oli ripitim ol stamba toktok mo ol doktrin long jeneral konfrens. Mi save talem stret long yufala: hemia i no from se man i no gat niu aedia o tingting. Yumi stap gohed blong harem ol mesej long ol semfala topik from se Lod i stap tijim mo talem gud long maen mo hat blong yumi abaot ol stamba prinsipol we oli impoten tumas long taem we i no save finis, mekem se yumi mas andastanem gud olgeta mo mas tekem aksen folem bifo yumi save muv i go long ol nara samting. Wan waes man blong bildim haos i putumdaon fandesen bifo hem i stanemap wol mo ruf blong haos.
3. Ol toktok we oli talemaot long jeneral konfrens oli mas stap olsem wan kampas we i poenem wei long yumi, blong yumi folem long ol manis we oli stap kam.
Sapos yumi lisin mo stap folem ol toktok blong Spirit, bae oli olsem wan Liahona, we i lidim yumi tru long ol samting we yumi no save, mo stap fesem ol ples we i gat jalenj mo ol maonten we i blokem yumi long fored (luk long 1 Nifae 16).
Stat long stat blong wol, God i bin putum ol profet oli stanap blong talemaot tingting blong heven long ol pipol blong taem blong olgeta. Hem i responsabiliti blong yumi blong lisin, mo afta, yusum ol mesej ia we Lod i givim long yumi.
Papa blong yumi long Heven we i gat sore mo lav, i no livim yumi fogud mo bambae Hem i no livim ol pikinini blong Hem i stap. Tedei, semmak olsem long taem bifo, Hem i bin jusum ol aposol mo ol profet. Hem i gohed blong talemaot toktok blong Hem long olgeta.
Hem i wan spesel janis blong harem ol mesej we God i gat blong wanwan long yumi long taem blong jeneral konfrens! Bae yumi rere gud from gudfala blesing ia blong kasem help we i kam long heven, we i kam tru long ol wokman blong Hem we Hem i jusum olgeta.
From hemia, i no wan blesing olbaot.
© 2011 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/10. Oli letem translesen: 6/10. Translesen blong First Presidency Message, September 2011. Bislama 09767 852
Yusum Mesej Ia blong Tij
-
Ridim atikol ia tugeta. Leftemap tingting blong famle blong faenem ol samting blong lisin long hem long taem blong jeneral konfrens.
-
Blong helpem ol yang pikinini blong yusum kaonsel we Presiden Ukdof i givim, soem long olgeta wan Jeneral Atoriti Jat (we yu save faenem long namba blong Liahona). Letem olgeta oli save se Fas Presidensi mo Kworom blong Olgeta Twelef Aposol, bae oli toktok long jeneral konfrens. Leftemap tingting blong ol pikinini blong lisin long konfrens mo droem wan pikja we bae i helpem olgeta blong tingbaot wanem we oli bin lanem. Ol papa mo mama, oli save go long Intanet long conferencegames.lds.org blong kasem moa konfrens aktiviti blong ol pikinini.
Long raet: foto we i kam long Les Nilson