Me Pwulopwul Kan
Mwahu, Mwahusang, Keieu Mwahu
Nan ah padahk en tiepene lap Oaktohpe 2007, Elder Dallin H. Oaks en Pwihn en Wahnpoaron Ehk-riemeno koasoaia duwen kemwekid kan me “mwahu, mwahusang, oh keieu mwahu.” Ni ansou me lel wasa me koasoaia duwen “nohn kihieng serihkan kediropw,” I soansuwedida nan ahi sehro.
I ese me nohn laudla me I wiewia. I kin iang sipai kan nihmwen sukuhlo, aliale kasukuhl apwal nihmwen sukuhl, oh iang towehda ekie kemwekid tohtohr. I sohte kin poadidi towehda kemwekid kan en Peinakapw Akan, oh ahi Rahn Sarawi kan kin direki pwunod en nannanti en kanekehla homework ni karuwaru. Prakdihs keseng oh iang wia doaropwehn rohng nihmwen sukuhlo sohla wia mehkot kaperen oh wiahla doadoahk.
Ahn Elder Oak’s padahko kahrehieng ahi kilang mwahu ahi koasoandi kan. Kemwekid kan me I iang towehda mwahu, ahpw re nohn tohtohla. I anahne pilada me keieu mwahu kan. Ni ei song en pilada mehnia me I pahn soikala, I diarada me rongamwahu en Sises Krais iei koasoandi me keieu mwahu me aramas kak nsenohki. I kihieng kapakap oh onopiki pwuhk sarawi en keieu, oh sangete ansouo, ahi mour kin tangamwahusang mahs.
Elder Oaks padahkihiengie me ni ansou me kitail kin wia dah me Kauno ketin kupwuriki kitail en wia mahs, soahng teikan pahn uhd soandi mwahu. Ma I pahn onopiki pwuhk sarawi kan mwohn ahi pahn mwadong de pil mwohn ahi pahn wia ahi homework, soahng koaros me kesempwal pahn pweida. Ni ansou me I kin kihieng Kauno en wia poahsoan en ahi mour, oh kaidehn kapatahieng Ih mwurin mehkoaros, ahi mour kin ahniki laudlahn meleilei oh pweida.
Met I kin kanaiehng en rong mwahu kaweid me kin kohda ni tiepene lap!
Mahlen sang Paul Mann