Iien ko rem̧m̧an n̄an Kōm̧m̧an Em̧m̧an
Wāween eo an Irooj n̄an jipan̄ ro me rej aikuj ilo mour in kanniōk ej Aikuj armej ro me kōn iakwe em̧ōj aer ajeļo̧k er make im ta eo ewōr ippāer n̄an Anij im jerbal eo An.
Ro jeiū im jatū, kōttōpar eo an ennaan in aō ej n̄an kautiej im kam̧oolol kōn ta eo Irooj eaar kōm̧m̧ane im ej kōm̧mane n̄an jerbal n̄an rijeram̧ōl im riaikuj ro ibwilijin ajri ro Nejin ioon laļin. E ej iakwe ajri ro nejin rej pād ilo aikuj im barāinwōt ro rej kōņaan jipan̄. Im E eaar ejaake wāween ko n̄an kōjeram̧m̧an jim̧or ro rej pād ilo aikuj im ro renaaj m̧ōņōņō in leļo̧k.
Jemedwōj Ilan̄ ej ron̄jaki jar ko an ajri ro Nejin ipeļaakin laļ in im rej kajjitōk kōn ekkan n̄an m̧ōn̄ā, kōn nuknuk n̄an kalbubu ānbwinier, im kōn ekkar eo enaaj kar itok jān an maron̄ n̄an kakke er make. E ekar ron̄jaki kajjitōk ko jen ke E eaar likūt m̧aan im kōrā ioon laļ in.
Kom̧ij katak kōn aikuj ko ijoko kom̧ij jokwe ie im jen peļaakin laļ in. Buruwōmi ej emakijkij an ļaan wōtwōt kōn en̄jake in tūriam̧o ko. N̄e kom̧ij ioon juon eo me ej kakkōt n̄an kapok jerbal im kom̧ij en̄jake ikreelel jab in n̄an jipan̄. Kom̧ij en̄jake menin n̄e kom̧ij etal n̄an m̧weo im̧ōn juon eo ejako pāleen im loe bwe ejjeļo̧k m̧ōn̄ā ippān. Kom̧ij en̄jake ikreelel n̄an jipan̄ n̄e kom̧ij loe pijain ajri ro rej jan̄ ilo jepeepļo̧k in an kar jorrāān m̧ōko im̧wer jān juon m̧akūtkūt an laļ ak jān kijeek.
Kōnke Irooj ej ron̄jake aer jan̄ im ej en̄jake tūriam̧o eo ami em̧wilaļ kōn ro rej pād ilo aikuj, E eaar baj jān jinoin iien kar kakke wāween ko n̄an Rijjilōk ro an n̄an jipan̄. E ekar karuwaineneik ro Nejin n̄an kakwojarjar aer iien, aer ļōmņak, im er make n̄an kobaik E ilo jerbal n̄an ro jet.
Wāween An jipan̄ ilo iien ko em̧ōj kar ņa etan mour kōn kien kwojarjar. Ilo bar juon tōre iaļ eo An kar ņa etan kōllaajrak ippān doon. Ilo tōre in ad ej ņa etan Būrookraam̧ eo an menin jipan̄ an Kabun̄.
Āt ko im meļeļe ko kōn kōjerbale rej oktak n̄an kajejet aikuj ko im jekjek ko an armej ro. Bōtaab iien otemjej ej wāween eo an Irooj n̄an jipan̄ ro rej pād ilo aikuj in mour in kanniōk ej aikuji armej ro me kōn iakwe em̧ōj aer ajeļo̧k er make im ta eo ewōr ippāer n̄an Anij im n̄an jerbal eo An.
Eaar kūr im kar jiron̄ kōj n̄an bōk kūnaad ilo jerbal in An n̄an lelōn̄ tak ro rej pād ilo aikuj. Jej kōm̧mane juon bujen n̄an kōm̧man bwe ilo dān ko in baptaise im ilo tampeļ ko rekwojarjar an Anij. Jej kōkāāl bujen ilo Jabōt ko n̄e jej bōk m̧ōttan kwojkwoj eo.
Kōttōpar eo Aō rainin ej n̄an kōmeļeļeik jet iaan iien ko rem̧m̧an em̧ōj An kar litok n̄an kōj n̄an jipan̄ ro rej pād ilo aikuj. Ijjab maron̄ kōnono kake er aolep ilo etad ilo juon wōt iien ippān doon. Kōjatdikdik eo aō ej n̄an bar kōkāāl im kōkajoorļo̧k kalim̧m̧ur ko ami n̄an jerbal.
Ewōr juon al in jar kōn kūr eo an Irooj n̄an jerbal in me Iaar al kake jān ke Iaar juon ļaddik jidikdik. Ilo tōre eo iaar ajri wōt eļap aō kejon̄jake toon eo ekam̧ōņōņō jān kajoor in naan ko. Ij jar bwe kom̧ naaj en̄jake naan ko ilo būruwōm̧i rainin. Jān ron̄jake naan ko bar juon alen:
Em̧ōj ke Aō kar kōm̧m̧an em̧m̧an ilo laļin rainin?
Em̧ōj ke Aō kar jipan̄ jabdewōt rej pād ilo aikuj?
Em̧ōj ke Aō kam̧ōņōņōik eo ebūrom̧ōj im kōm̧m̧an bwe juon lem̧ōņōņō?
Eļan̄n̄e jaab, em̧ōj Aō likjab ilo m̧ool.
Enan̄in ke wōr mera ļo̧k eddo eo an juon rainin
Kōnke Iaar m̧ōņōņō in jipan̄?
Em̧ōj ke an eo enan̄inmej im m̧ōk kar jipan̄ ilo jekjek eo aer?
Ke raar aikuji jipan̄ eo aō Iaar ke pād ijo?
Innām jerkak im kōm̧m̧an eļapļo̧k
Innām ettōņak kōn ijo jikūm̧ ijo ilōn̄.
Kōm̧m̧an em̧m̧an ej juon en̄jake in ekabun̄bōro, lan̄lōn̄ eļap jān jon̄an.
Juon kōjeram̧m̧an an jerbal im iakwe.1
Irooj emakijkij an jilikintōk ennaan ko me rej kakkōl kōn juon jorrāān n̄an aolepedwōj. Jet iien emaron̄ in juon en̄jake in tiriam̧o n̄an juon eo ej pād ilo aikuj. Juon jemen emaron̄ kar en̄jake ke ej loe an ajri eo wōtļo̧k im juon kūrar ilo neen. Juon jinen emaron̄ in kar en̄jake ke ej ron̄ an ajri eo nejin jan̄ kōn mijak ilo bon̄en eo. Juon ļaddik ak juon leddik emaron̄ kar en̄jake an tiriam̧o kake juon eo me ej emejen būrom̧ōj ak mijak ilo jikuuļ.
Kōj aolep kar un̄ur kōn en̄jake ko an tiriam̧o n̄an ro jet mekarta jejjab jeļā. N̄an waanjon̄ak, ilo ami kar ron̄ riboot ko kōn ņoo ko rem̧ōkaj aolepen Pacifice ālkin m̧akūtkūt an laļeo ilo Japan, kom̧ij en̄jake n̄ūrbōktak kōn ro me remaron̄ in kar metak.
En̄jake ko an tiriam̧o eaar itok n̄an taujin iaami wōj ro me raar ekkatak kōn ibwijleplep eo ilo Queenland Australia. Riboot in nuuj ko kar aņto̧o̧n kake kōn oraņ bōnbōn in ro rar pād ilo aikuj. Bōtaab elōn̄ iaami kar en̄jake metak eo an armej ro. Ennaan eo me ej kakkōl kōn juon jorrāān kar uwaak tok jān 1,500 ak lōn̄ļo̧kin kar membōr in Kabun̄ raar m̧ōņōņō in bōk kuņaer ilo Australia ro raar itok n̄an jipan̄ im n̄an kaeņōm̧m̧an.
Rekar ukōt en̄jake in tiriam̧o ko aer n̄an juon kālet in jerbal ekkar n̄an bujen ko (ko me raar kōm̧m̧ani ippān Anij). Em̧ōj Aō loe kōjeram̧m̧an ko me rej itok n̄an armej eo ilo aikuj eo me ej bōk jipan̄ im n̄an armej eo me eāilparok kaki iien ko rem̧m̧an n̄an leļo̧ki.
Ro jinen im jemen rejeļāļo̧kjeņ rej loe ilo jabdewōt aikuj an ro jet ilo juon wāween n̄an bōk tok kōjeram̧m̧an ko n̄an mour ko an ro nejier ļaddik im leddik. Jilu ajri rekar ebbōk kantenar ko rej ere tok juon kōjota enono n̄an m̧aan kōjem eo am. Ro jineir im Jemāer raar jeļā bwe kōm kar aikuj jipan̄ im kar kakobaiktok ajri ro nejier ilo juon iien eo em̧m̧an n̄an jipan̄ kōm.
Ro jinen im jemen kar kōjeram̧m̧an baam̧le eo am kōn jipan̄ em̧anm̧ōn eo aer. Kōn aer kālet n̄an kōtļo̧k n̄an an ajri ro nejier bōk kuņaer ilo letok, raar leļo̧k kōjeram̧m̧an ko n̄an ro jibwier ilo tok ālik. Ettōn̄dikdik ko an ro nejier raar āinwōt ke raar likūt m̧weo im̧ōm im kar kōm̧m̧an aō jeļā bwe ajri ro jibwin (rein jinen im jemen) renaaj maron̄ jeram̧m̧an (n̄an en̄jake lan̄lōn̄ eo ej itok kōn jipan̄). Renaaj jiron̄ ro nejier kōn lan̄lōn̄ eo me raar en̄jake ilo leļo̧k jerbal in jipan̄ n̄an Irooj. Ij Kememej en̄jake jab eo em̧m̧an me ekaitoklimo jān tōrein ajri ko aō ke Iaar kūntak wujooj n̄an juon eo ej jokwe itūrū kōn kūr eo an jema. Jabdewōt iien n̄e N̄a ij ruwainene n̄an āinwōt juon rileļo̧k Ij kememej im tōmak naan ko ilo juon al, “Jerbal in ej Kamonono, n̄an wujtake Anij, Indreo.”2
Ijeļā naan ko ilo al eo me raar jei n̄an kōmeļeļeik lan̄lōn̄ eo me ej itok jān ad kabun̄ jar n̄an Anij ilo Jabōt. Bōtaab ajri ro ilo kōjem eo am raar en̄jake ilo kajjojo raan lan̄lōn̄ eo kōn kōm̧m̧ane jerbal eo an Irooj. Im ro jineir im Jemāer raar loe iien em̧m̧an n̄an kōm̧m̧an em̧m̧an im kajeere lan̄lōn̄ n̄an epepen ko.
Wāween eo an Irooj n̄an kea kōn ro rej aikuj ej leļo̧k bar juon iien em̧m̧an n̄an ro jinen im jemen n̄an kōjeram̧m̧an ajri ro nejier. Iaar lo ilo juon jikin jar ilo juon Jabōt. Juon ajri edik eaar leļo̧k n̄an bisop eo ijo an baam̧le eo eo ke eaar deļo̧n̄ ļo̧k ilo jikin jar eo m̧okta jān kweilo̧k in kwojkwoj eo.
Ijeļā kajjien baam̧le eo im ļaddik eo. Baam̧le eo rej kab jeļā ke ewōr juon ilo ward eo eaikuj jipan̄. Jemen laddik eo eaar ba juon men āinwōt in n̄an ajir eo nejin ke eaar likūt eļapļo̧k jortak in jitlo̧k eo etenwadik jān m̧okta ilowaan enbōļoob eo. “Kōm ar jitlo̧k rainin im kar jar kōn ro rej aikuj. Jouj leļo̧k enbūļoob in n̄an bisop eo. Ijeļā bwe enaaj leļo̧k menin n̄an jipan̄ ro eļapļo̧k aer aikuj jān kōm̧.”
Ijeļļo̧kin jabdewōt metak ko kōn kwōle ilo Jabōt eo ļaddik eo enaaj kememej bwe raan eo kōn juon en̄jake ekam̧ōņōņō. Imaron̄ meļeļe jān ettōn̄ eo an im wāween eo ilo an leļo̧k enpeļo̧p me ekar en̄jake eļap leke an jemen n̄an bōk menin joortak an baam̧le eo n̄an rijeram̧ōl ro. Enaaj kememej bwe raan eo n̄e ej juon tikōn, im bōlen n̄an indeeo.
Iar loe bwe ejja m̧ōņōņō eo eļap wōt ilo turin mej ko mejen armej ro me raar jipan̄ armej ro n̄an Irooj ilo Idaho iiō ko rejem̧ļo̧k ļo̧k. Teton Dam eaar peļļo̧k ilo Jādede, Juun 5, 1976. Jōn̄ouljuon armej raar mej. Taujin raar aikuj in em̧m̧akūt jān im̧ōko im̧weer ilo jet awa ko. Jet eem̧ raar to̧ri. Im buki eem̧ ko remaron̄ in kar em̧m̧an n̄an jokwe ie kōn wōt kijejeto im jipan̄ ko rōtōr jān jon̄an me an ro im̧weer.
Ro me raar ron̄ kōn jorrāān eo rar en̄jake tiriam̧o, im jet raar kōņaan kūr n̄an kōm̧m̧an em̧m̧an. Ro rituried, bisop ro, būreejtōn ro an Doulul eo an Kōrā, ritōl ro an doulul, rikaki ro an m̧ōko im rikaki in loļo̧k ro raar likūt m̧ōko im̧wer im jerbal ko aer n̄an karreoik m̧ōko im̧ōn ro jet me rar ibwiji.
Juon ripālele kar jepļaak n̄an Rexburg jān juon iien kakije kar ālikin wōt kar ibwijleplep eo. Raar jab etal n̄an aer lale m̧weo im̧wer make. Ijelo̧kin, rar loe bisop eo aer n̄an kajjitōk ia eo remaron̄ in kar elolo jipan̄ ie. Ear jilkinļo̧k er n̄an ippān juon baam̧le rej pād ilo aikuj.
Ālkin jejjo kar raan raar etal n̄an aer lale ijo m̧weo im̧wer ear pād ie. Eaar jako, ekar jorrāān ilo ibwijleplep eo. Raar bar etal n̄an ippān bisop eo im kar kajjitōk, “Kiiō, ta eo komaron̄ kar kōņaan bwe kōmin kōm̧m̧ane?”
Jekdoon ia eo kom̧ij jokwe ie, em̧ōj ami kar lo kabwilōn̄lōn̄ eo an tiriam̧o kake kar oktak n̄an m̧akūtkūt eo jab ļōmņak kōn juon make. Emaron̄ in kar jab waļo̧k tok jān juon jorrāan eļap. Em̧ōj aō loe ilo doulul eo an priesthood ijo juon būratōr ej jutak n̄an kōmeļeļeik aikuj ko an juon em̧m̧aan ak juon kōrā me ej pukōt juon iien em̧m̧an n̄an jerbal n̄an rejtake e make ak baam̧le eo an. Imaron̄ kar en̄jake tiriam̧o kake eo ilo ruum̧ eo, bōtaab juon eaar kwaļo̧k etan armej ro me remaron̄ kar kōjerbal armej eo eo eaar aikuj jerbal.
Ta eo eaar waļo̧k ilo doulul eo an priesthood im ta eo ekar waļo̧k ilo im̧oko kar ibwiji ilo Idaho ej juon kōmeļeļe in wāween an Irooj jipan̄ ro eļap aikuj n̄an erom̧ un̄are peier make. Kōm̧ij en̄jake tiriam̧o im kōm̧ jeļā wāween eo n̄an jerbale ilo wāween eo an Irooj n̄an jipan̄.
Jej kemeeme 75th im kōjeram̧m̧an burookram̧ in jerbal in jipan̄ eo an Kabun̄ in ilo iiō in. Ekar ijjino n̄an tōpar aikuj ko an ro me raar luuji jerbal ko, jikin kallib ko im elaptata imoko ilo kar jeļā kake āinwōt Jorrāān eo Eļap an Menin Jeram̧m̧an.
Eļap menin aikuj ko an ajri ro nejin Jemed Ilan̄ ilo kanniek im rar itok bar juon kattōn ilo iien ko ad āinwōt ke rar bōki im āinwōt ke renaaj ilo aolep iien. Pedped in katak ko ilo pedped eo an būrookraam̧ eo an menin jipan̄ an Kabun̄ in rejjab wōt n̄an juon tōre ak juon jikin. Rej n̄an aolep iien im aolep jikin.
Pedped in katak ko rej an jetōb im indeeo. Wūnin, meļeļe kaki im likūti im kapene ilowan bōro ko būruwōd im enaaj kōm̧m̧an an menin maron̄ tōprak n̄an ad loe im bōk iien ko rem̧m̧an jabdewōt iien im jabdewōt ia me Irooj ej karuwaineneiki kōj.
Erkein rej jet iaan pedpedin katak ko me raar tōl iō ke Iar kōņaan kar jipan̄ ilo wāween an Irooj im n̄e Ikar bōk jipan̄ jān ro jet.
M̧ōktata, aolep armej rej m̧ōņōņō im rej en̄jake eļap kautiej-doon n̄e rej maron̄ kakke n̄an er make im baam̧le ko aer im innām leļo̧k pein jipan̄ n̄an kea kake ro jet. Ikar m̧ōņōņō kōn ro me rar jipan̄ iō ioon menin aikuj ko aō. Eļapļo̧k aō m̧ōņōņō ilo iiō ko n̄an ro me rar jipan̄ iō oktak n̄an un̄are peiū make. Innām Ij m̧ōņōņō kōn ro me raar kwaļo̧k n̄an iō wāween n̄an jipan̄ jet iaan jortoklik in jeram̧m̧an ko aō ko āinwōt jāān n̄an jipan̄ ro jet.
Em̧ōj Aō kar ekkatak bwe wāween eo n̄an jipan̄ bōk jortoklik in menin jeram̧m̧an ko ej n̄an joļo̧k dikļo̧k jān jon̄an eo Ij kōm̧m̧ane. Ippānļo̧k jortoklik in menin jeram̧m̧an ko me Iar āinwōt maron̄ bōki im kam̧ool jān en̄jake ekam̧ōņōņō im bwe menin ej m̧ool ej bwe em̧m̧anļo̧k n̄an leļo̧k jān bōk. Bwe ej ejjejet kōnke n̄e jej leļo̧k jipan̄ ilo wāween eo an Irooj Ej kōjeram̧m̧an kōj.
Būreejtōn Marion G. Romney ear kōnono kōn jerbal in jipan̄, “Ilo jerbal in, komij jab maron̄ leļo̧k eļap bwe komin make oktak im jeramōl. Im āļkin ear kōnono jen naan eo an mijen būreejtōn eo an, Melvin J. Ballard, wāween in: Ilo Wāween, juon armej ejjab maron̄ leļo̧k juon men eddik n̄an Irooj ijelo̧kin wōt n̄e E ej leļo̧k n̄an armej eo oktan kōjeram̧m̧an ko reļļap.”3
Em̧ōj Aō loe bwe n̄an erom̧ m̧ool ilo mour eo aō. N̄e Ij em̧m̧an n̄an ajri ro nejin Jemed Ilan̄ me rej pād ilo aikuj, E ej em̧m̧an n̄an n̄a.
Pedped in katak eo an ko̧jpeļ kein karuo me eaar āinwōt juon menin tōl n̄an n̄a ilo jerbal in menin jipan̄ ej kajoor eo im kōjeram̧m̧an eo an juon wōt bōro. Būreejtōn J. Reuben Clark, Jr. eaar ba wāween in: “Bwe leļo̧k eaar … bōktok … juon en̄jake in jemdoon an būratōr ro āinwōt em̧m̧aan ro ilo kaminene ko im jerbal ko raar jerbal ippān doon ilo juon jikin kallib an Menin Jipan̄ ak būroojāāk ko jet.”4
Ļapļo̧kin kar en̄jake kōn jemdoon ej m̧ool n̄an eo ej bōke āinwōt eo juon ej leļo̧k. N̄an rainin, juon em̧m̧aan eo me Iar jabōļ bwidej irrejet-n̄an irrejet in m̧weo kar im̧ōn im ar ibwiji ilo Rexburg kar en̄jake juon kōtaan ippa. Im ej en̄jake eļapļo̧k ujtiej n̄an bōki aolep men ko emaron̄e n̄an e make im baam̧le eo an. Eļan̄n̄e kōm kar makeļo̧k iaam im jerbal, kōmro jim̧or maron̄ in kar jerwane juon kōjeram̧m̧an ilo jetōb.
Ej tōl ļo̧k n̄an pedpedin katak eo an ko̧jpeļ kein kajilu kōn m̧akūtkūt ilo jerbal in menin jipan̄ n̄an n̄a: Kobaik baam̧le eo am̧ ippām ilo jerbal bwe ren maron̄ in jeļā kea kōn jet āinwōt aer kar kōn doon. Ļaddik ro im leddik ro nejim me rej jerbal ippam̧ n̄an jipan̄ ro jet rej pād ilo aikuj renaaj maron̄ m̧ōņōņō eļapļo̧k n̄an jipan̄ doon n̄e renej pād ilo aikuj.
Pedped eo aorōk kein kemān an menin jipan̄ an Kabun̄ in me Ikar ekkatak ainwōt juon bisop. Ekar itok jān ļoor kakien eo an eoon ko n̄an pukōt ro rejeram̧ōl. En̄in ej eddo eo an bisop ej n̄an kapukōt im kakke jipan̄ n̄an ro me rej aikuj wōt jipan̄ ālkin aolep men rej im baam̧le ko aer remaron̄ in kōm̧m̧ane. Iar loe bwe Irooj ej jilkintok Jetōb Kwojarjar n̄an kōm̧m̧an bwe menin en tōprak n̄an “kappukot im kom̧ naaj lo”5 kōn kea kōn rijeram̧ōļ āinwōt An kar ilo pukōt m̧ool eo. Bōtaab Iaar barāinwōt katak n̄an kobaik būreejtōn eo an Doulul eo an Kōrā ilo kappok eo. E emaron̄ bōk m̧adenļo̧k eo m̧okta jān kwe.
Jet iaami renaaj aikuji im̧we jab in ilo allōn̄ ko tok. N̄an kememe 75th iiō in būrookraam̧ eo an menin jipan̄ an Kabun̄ in, membōr ro ipeļaakin laļ in naaj kūr er n̄an bōk kuņaer ilo juon raan in jerbal in jipan̄. Ritōl ro im membōr renaaj pukōt m̧adenļo̧k ilo aer karōk jabdewōt būroojāak ko.
Inaaj kōm̧m̧ane jilu elmako̧t ko āinwōt ami pepe kake būrojāāk in jipan̄ eo ami.
M̧oktata, kōpooj eok make im ro kwoj tōl er ilo jetōb. Eļan̄n̄e wōt bōro ko rej un̄ur kōn Pinmuur eo an Rilo̧mo̧o̧r eo kom̧ maron̄ ke loe ilo alikkar menin kōttōpar eo an būroojāak eo āinwōt kōjeram̧m̧an jim̧or ilo mour in jetōb im kanniōk ilo mour ko an ajri ro nejin Jemed Ilan̄.
Elmako̧t eo aō kein karuo ej n̄an kālōt āiwōt ritōllo̧ke jerbal in jipan̄ eo ami ilowaan aelōn̄ in kiin̄ eo ak ilo jukuk in pād eo ro aikuj ko aer renaaj uūur bōro ko an ro me renaaj kōm̧m̧ane jerbal in jipan̄ eo. Armej ro rej jerbal renaaj en̄jake iakwe eo aer. Bwe ren maron̄ kōm̧m̧an eļapļo̧k bwe ren en̄jake lem̧ōņōņō, āinwōt an al eo kalim̧m̧ur, innām naaj tōpar aikuj ko aer ilo kanniōk.
Elmako̧t eo Aō āliktata ej n̄an pepe n̄an kōjerbal kajoor eo n̄an dapij baam̧le ko, ilo doulul ko, an doulul ko an radik, im armej ro me kom̧ jeļā kajjier ilo jukjukin pād ko. En̄jake ko kōn juon wōt renaaj koorļo̧k jerbal ko rem̧m̧an kōn jipan̄ eo kwōj leļo̧k. Im en̄jake ko kōn juon wōt ilo baam̧le ko, ilo Kabun̄ eo, im ilo jukjukin pād ko renaaj eddōk ļo̧k im naaj erom̧ juon jem̧ļo̧kin bwebwenato ālkin wōt an jem̧ļo̧k būrojāāk eo.
En̄in ej iien eo Aō em̧m̧an n̄an kwaļo̧k n̄an kom̧ ewi jon̄an Aō kam̧oolol kom̧. Kōn iakwe im jipan̄ eo epād ippemi letok in n̄an Irooj, em̧ōj Aō kar ritello̧ke kōn kam̧oolol ko an armej ro kom̧ ar jipan̄ er ilo Aō kar kweilo̧k ippāer aolepen laļ in.
Kom̧ kar lo juon wāween n̄an kotak er lōn̄ ļo̧k ilo ami kar jipan̄ er ilo wāween eo an Irooj. Kom̧ im ro rikaļoor ro rettā an Rilo̧mo̧o̧r eo āinwōt ko̧m kar kwaļo̧k kijemi im nimemi ilo jerbal in jipan̄ im armej ro kom̧ kar jipan̄ er kar kajion̄ in letok kijō ļo̧o̧b in kam̧oolol ilo kōrool tok.
Ij bōk ejja kwaļo̧k kam̧oolol ko jān armej ro me raar jerbal ippemi. Ij kememej juon iien jutak iturin Būreejtōn Ezra Taft Benson. Kōm ar kōnono kake menin jipan̄ eo ilo Kabun̄ eo an Irooj. Eaar kabwilōn̄e Eō kōn tōrein jodikdik ko an rekajoor ke eaar ba, kōm̧m̧ane juon makūtkūt ekar kaitoktok limo kōn pein. “Ij iakwe jerbal in, im en̄in ej jerbal!”
Ilo etan M̧aajta eo Ij lewōj kam̧oolol kōn jerbal eo ami n̄an jipan̄ ajri ro nejin Jemed Ilan̄. Ejeļā kajjiemi im Ej loe jerbal ko ami rem̧m̧an, wujlepļo̧k (ilo elap jerbal), im rekarmejete. Ij jar bwe Enaaj lewōj n̄an kom kōjeram̧m̧an ko kōn tōprakin jerbal ko ami ilo m̧ōņōņō eo eļap an ro kom̧ ar jipan̄ er n̄an Irooj.
Ijeļā bwe Anij Jemed ej mour im ej ron̄jaki jar ko ad. Ijeļā bwe Jisōs ej Ri Kraist eo. Kwe im ro kwōj jipan̄ er remron̄ in āinwōt erreo im kar kajoor ļo̧k jān ami jipan̄ E im ilo kōjeparok kien ko An. Kom̧ maron̄ jeļā āinwōt Ijeļā, jān kajoor eo an Jetōb Kwojarjar, bwe Joseph Smith kar rikanaan eo an Anij n̄an kar kōjepeļaak tok m̧ool im Kabun̄ eo emour, eo ej en̄iin. I kam̧ool bwe Būreejtōn Thomas S. Monson ej rikanaan eo emour an Anij. E ej juon waanjon̄ak em̧m̧an kōn ta eo Irooj eaar kōm̧m̧ane em̧m̧an. Ij jar bwe jān maron̄ dāpij iien ko ad rem̧m̧an n̄an “kotak pā ko [me] retoto, im kōkajoor ļo̧k bukie ko rem̧ōjņo.”6 Ilo āt kwojarjar eo etan Jisōs Kraist, amen.
© 2011 jān Intellectual Reserve, Inc. Aolep jim̧we ko rej an. Kar jeje in USA. Kōmālim kajin In̄lij eo: 6/10. Kōmālim ukook eo: 6/10. Ukook eo an Visiting Teaching Message, May 2011. Marshallese 09765 874