Te mau Parau faaûruhia no ni‘a i te hoê Ohipa Faaûruhia: Eaha ta te Feia A‘o i parau no ni‘a i te Totauturu.

E rave rahi mau a‘oraa i roto i te 181raa o te Amuiraa Rahi Matahiti a te Ekalesia tei faataahia no te faahaamana‘oraa i te faanahoraa totauturu a te Ekalesia, i roto i teie nei i te 75raa o te matahiti.

Teie i raro nei te mau tufaa o te mau a‘oraa tei faatumu i ni‘a i te faanahoraa totauturu e te mau ture totauturu tei haamauhia e te Fatu no te tauturu i Ta’na mau tamarii ia tauturu ia ratou iho.

Peresideni Thomas S. Monson

« Te faaite nei au e, na te Atua Manahope i faaûru mai i te faanahoraa Totauturu a te Ekalesia a Iesu Mesia i te Feia mo‘a i te mau Mahana Hopea nei ». (A hi‘o « Te Hiero Mo‘a—e Mori i to te Ao nei », api 90).

Peresideni Henry B. Eyring, Tauturu Hoê i roto i te Peresideniraa Matamua

« Te tupu faahou nei â, i teie mahana, te mau fifi i te pae o te oraraa o te mau tamarii a te Metua i te Ao ra, mai tei tupu na i mutaa ihora, e mai te tupu i te mau tau atoa. E ere te mau ture i niuhia ai te Faanahoraa Totauturu a te Ekalesia i te mau ture no te hoê noa taime e aore ra, no te hoê noa iho fenua. E mau ture râ no te mau tau atoa e no te mau vahi atoa ».

« Ua ani mai oia e ua faaue mai ia tatou ia rave i Ta’na ohipa no te amo i te feia nava’i ore. Ua rave tatou i te fafauraa ia rave i te reira i roto i te mau pape o te bapetizoraa e i roto i te mau hiero mo‘a o te Atua. Te faaapî nei tatou i te fafauraa i te mau Sabati atoa a rave ai tatou i te oro‘a mo‘a ». (A hi‘o « Te mau Rave‘a no te Rave i te Maitai », api 22).

Episekopo H. David Burton, Episekopo Faatere

E ere noa te faanahoraa totauturu a te mau peropheta e hoê noa aamu ha‘iha‘i i roto i te aamu o te Ekalesia. Na te mau ture i niuhia’i te reira faanahoraa e faaite e o vai ra tatou ei nunaa. O te tapa‘o mau hoi o to tatou ti‘araa ei mau pĭpĭ na to tatou Faaora e Hi‘oraa, o Iesu te Mesia ».

« E ere teie ohipa mo‘a no te haafana‘o e no te haamaitai noa i te feia e mauiui ra aore râ tei roto i te ati. Ei tamaroa e ei tamahine na te Atua, eita tatou e nehenehe e farii i te îraa o te ora mure ore ma te ore e haapa‘o ia vetahi ê a ora ai tatou i ni‘a i te fenua nei. E na roto hoi i te faatusiaraa e te horo‘araa ia tatou no vetahi ê e haapii ai tatou i te mau ture tiretiera no te tusia e te haamo‘araa ».

« Teie te ohipa mo‘a ta te Faaora e titau nei i Ta’na mau pĭpĭ. O te ohipa ïa Ta’na i here a ora ai Oia i te fenua nei. Teie te ohipa ta’u i ite e ite tatou Ia’na ia rave ahani tei ô nei Oia i rotopu ia tatou i teie mahana. (A hi‘o « Te Ohipa Haamo‘araa no te Totauturu », api 81).

Silvia H. Allred, Tauturu Hoê i roto i te Peresideniraa Rahi no te Sotaiete Tauturu

« Te rave amui nei te tane e te vahine o te Ekalesia i teie mahana no te tauturu i te feia nava‘i ore… Ia riro ana‘e te here ei ture arata‘i no tatou i roto i te aupururaa ia vetahi ê, ua riro ïa ta tatou taviniraa ia ratou ei evanelia ohipa. O te evanelia ïa i roto i to’na taime maitai roa a‘e. O te haapa‘oraa paieti e te ino ore ïa ». (A hi‘o « Te Tumu mau no te Pĭpĭraa », api 84).