Elder Randall K. Bennett
No te Hitu Ahuru
Ua tae i te taime e mea manuia roa oia i ta’na ohipa taote niho to Randall Kay Bennett e ta’na vahine faaipoipo, o Shelley, iteraa i te « hoê faaiteraa papû » no te faaineine i te tavini i te mau misioni. Te auraa o te reira e ti‘a ïa ia raua ia hoo i te reira ihoâ taime i to ratou fare.
Ua parau o Elder Bennett e aita te tumu no te faaiteraa i ite-vitiviti-hia e e ua tia’i raua e toru matahiti i riro ai to raua fare, te hoê faanahoraa tei titau e rave rahi faaoroma‘iraa e tei titau e ia « faaite raua i te Fatu e ua hinaaro mau raua i te tavini ». « Ua tamau noa maua i te ti‘aturi i te Fatu e ua tamata maua i te faaea piri atu Ia’na na roto i te haere-pinepine-raa i te hiero, te tai‘oraa i te papa‘iraa mo‘a i te mau mahana atoa, te pure, te haapaeraa maa, e te taviniraa ia vetahi ê ».
Aita i maoro roa i muri a‘e i te riroraa to raua fare i te hoo, ua piihia Elder Bennett ia tavini i te Pû Haapiipiiraa Misionare no Provo e i muri iho ei peresideni no te Misioni no Russia Samara.
Ua parau Elder Bennett e « E mea faahiahia e te haehaa ia ite e ua haamana‘o te Fatu ia maua e ua faaineine Oia ia maua ». « Ua noaa ia maua i te ite e ua ite te Fatu i to maua mau mana‘o e to maua aau. Ua haapii maua i te ti‘aturi e e mea ite a‘e Oia ia maua, e e mea ite a‘e Oia i te mea ta maua e rave nei, e ua here Oia ia maua ».
Taa ê noa’tu i to’na mau piiraa ei melo no te Piti o te Pŭpŭ Hitu Ahuru e ei peresideni misioni, ua tavini Elder Bennett ei peresideni e e tauturu i roto i te hoê amaa i te Pû Haapiipiiraa Misionare no Provo, e melo no te apooraa teitei no te tĭtĭ, tauturu i roto i te hoê episekoporaa, peresideni no te Feia Apî Tane no te paroita, e te tahi atu mau piiraa, e ei misionare i roto i te mau Misioni no France Paris e France Toulouse.
Ua noaa ia Elder Bennett te parau tu‘ite taote niho i te Fare Haapiiraa teitei no Alberta (Canada) e te hoê parau tu‘ite teitei no te faaafaroraa niho i te Fare Haapiiraa Teitei no Loma Linda i California Apatoa, Mau Hau Amui no Marite.
Ua fanauhia o Elder Bennett i te ava‘e Tiunu 1955 i Magrath, Alberta, Canada. O Donald Kay Bennett e Anne Darlene Long to’na na metua. Ua faaipoipo oia ia Shelley Dianne Watchman i te 23 no Eperera 1977 i te Hiero no Cardston Alberta. E maha ta raua mau tamarii.