ʻEletā J. Devn Cornish
ʻO e Kau Fitungofulú
ʻOku ʻiloʻi ʻe ʻEletā Sione Tevini Kōnisi ʻoku mahuʻinga ʻa e mēmipa mo e uiuiʻi kotoa pē ʻi he Siasí.
ʻOkú ne pehē, “ ʻOku mahuʻinga ke tau manatuʻi ko e taimi ʻoku tau fakakaukauʻi ai ha ngaahi uiuiʻi ʻi he Siasí, ʻoku ʻikai mahuʻinga ia pe ko e fē feituʻu ʻi he vakapuná ʻoku tau tangutu aí—ko e meʻa pē ʻoku mahuʻingá ko ʻetau heka ʻi he vakapuná. ʻOku mahuʻinga taʻengata ʻete kau ki he ngāué. ʻOku ʻikai fuʻu mahuʻinga ʻa e tuʻunga ia ʻoku tau maʻú.”
Mei hono uiuiʻi ʻo ʻEletā Kōnisi ke ngāue ʻi he Misiona Kuatemala-ʻEle Salavatoá ʻo aʻu ki hono uiuiʻi fakamuimui taha ko ʻeni ki he Kōlomu hono Ua ʻo e Kau Fitungofulú, naʻá ne ngāue mālohi ʻi hono fakahoko hono ngaahi fatongia faka-Siasí, kau ai ʻene hoko ko e palesiteni ʻo e Kau Talavoú, palesiteni ʻo e kōlomu ʻo e kaumātuʻá, sekelitali pule fakauōtí, kulupulita ʻo e kau taulaʻeiki lahí, aleaʻanga māʻolungá, pīsopé, palesiteni fakasiteikí, palesiteni ʻo e Misiona Lepupelika Tomenikani Sanitiakó, mo e Fitungofulu Fakaʻēliá.
Naʻe fāʻeleʻi ʻa ʻEletā Konisi ʻi ʻEpeleli 1951 ʻi Sōleki Siti, ʻIutā, ʻi he USA, kia Siaosi mo Nāomi Kōnisi, peá ne tupu hake ʻi ʻIutā, Sōsiá, mo Veisinia, ʻi he USA, kimuʻa pea toki foki ʻo ako he kolisí ʻi ʻIutā.
Naʻá ne fetaulaki mo ʻIleini Sīmoni ʻi ha ʻekitivitī ʻa e kau tāutaha lalahi kei talavoú lolotonga ʻene nofo ʻi Polovó. Naʻá na mali ʻi he Temipale Manitai ʻIutaá ʻi ʻAokosi 1973.
Naʻe ngāue ʻa ʻEletā Kōnisi ʻi he Kau Ngāue Fakafaitoʻo ʻi he Laulā Puna ʻa ʻAmeliká lolotonga ʻena ʻohake mo hono uaifí ha fānau ʻe toko ono, pea naʻe maʻu hono mataʻitohi BA mo e ngaahi mataʻitohi fakafaitoʻo mei he ʻUnivēsiti Sione Hopikiní, pea naʻe hoko atu pē ʻene ako fakafaitoʻó ʻi he Akoʻanga Fakafaitoʻo ʻo Hāvātí—Falemahaki ʻo e Fānaú ʻi Positoní.
Naʻe lahi e ngaahi taʻu ne fehikitaki holo ai e fāmilí ʻi he akó mo e ngāué ʻi ʻAitahō, Tekisisi, Kalefōnia, mo Sōsiá ʻi he USA, ka ʻoku pehē ʻe ʻEletā mo Sisitā Kōnisi, naʻá na saiʻia he ngāue ʻi he Siasí ʻi ha feituʻu pē naʻá na ʻi ai.
ʻOku pehē ʻe ʻEletā Kōnisi, “ ʻOku tupulaki ʻa e ngāué ʻi māmani kotoa, pea ko ha tāpuaki maʻongoʻonga ia ke te lava ʻo tokoni ki he fānau ʻa e ʻEikí ʻi ha feituʻu pē ʻoku nau ʻi ai.”
ʻOku pehē ʻe ʻEletā Kōnisi ko e uiuiʻi ko ʻeni ki he Kau Fitungofulú, “ʻoku tatau pē ia mo e ngaahi uiuiʻi kotoa ʻi he Siasí, ko ha toe faingamālie ʻe taha ke kau ai ki he ngāue ʻa e ʻEikí. ʻOku mau houngaʻia ʻi he faingamālie ko iá.”