ʻEletā Ian S. Ardern
ʻO e Kau Fitungofulú
ʻI he taimi kotoa pē ʻoku fai mai ai ha telefoni pe tukituki he matapaá, ko e ʻuluaki lea pē ʻeni ʻoku fai ʻe ʻEletā ʻIeni Sitinī ʻĀtení, “ Ko e hā ha meʻa ʻe lava ke u tokoni atu ai?”
Naʻe fāʻeleʻi mai ʻa ʻEletā ʻĀteni kia Hale mo Kalātisi Mekivika Uilisia ʻi Te ʻAloha, ʻi Nuʻu Sila, ʻi Fēpueli ʻo e 1954, pea naʻá ne pehē ʻoku meimei ko e fanga kiʻi ngāue tokoni ko ia ʻoku faʻa hā ngali siʻisiʻí ʻokú ne fakahoko ʻe ia ʻa e fuʻu liliu lahi ʻi he moʻui ʻa e tokotaha ʻokú ne fakahoko ʻa e tokoní mo ia ʻoku tokoniʻí. ʻOku pehē ʻe ʻEletā ʻĀteni, “ʻOku ʻikai faingamālie maʻu pē ke fai ha ngāue tokoni, ka ʻokú ne faitāpuekina maʻu pē ʻa hoʻo moʻuí.”
Naʻe fetaulaki ʻa ʻEletā mo Sisitā ʻĀteni lolotonga ʻena ako ʻi he Kolisi ʻa e Siasí ʻi Nuʻu Silá peá na mali ʻi he Temipale Hemilitoni Nuʻu Silá ʻi he ʻaho 17 ʻo Sānuali 1976. Ne tupu hake ʻena fānau ʻe toko faá ʻi ha ʻapi naʻe ʻi ai ʻa e feʻofaʻakí mo e fetokangaʻakí, pea naʻe fakamuʻomuʻa ai e maʻu ʻo e mahino mo moʻui ʻaki e ngaahi tefitoʻi moʻoni ʻo e ongoongoleleí. ʻOku pehē ʻe ʻEletā ʻĀteni, “Ko e tāpuaki ke mamata ki hono fakamuʻomuʻa ʻo e ngaahi meʻa tatau ʻi he ngaahi ʻapi ʻo ʻema fānau kuo malí.”
ʻOku lahi e meʻa ʻoku ʻamanaki mai ki ai e ʻEikí mei Heʻene fānaú, pea ʻokú Ne fokotuʻutuʻu ha founga ke malava ʻo fakahoko ai kinautolu. ʻOku pehē ʻe ʻEletā ʻĀteni, “ ʻOku ou houngaʻia lahi ʻiate kinautolu kotoa kuo nau tokoniʻi ki homau fāmilí ke mau muimui ki he ʻEikí.”
Kuo hoko ʻa e muimui ki he ngaahi akonaki ʻa e kau palōfitá ko e meʻa fika ʻuluaki ia ʻi he famili ʻĀtení. Ne hoko ʻo nau ʻulungāanga ʻaki ʻa e ako folofola fakaʻahó he naʻe fakapapauʻi ʻe he fānau īkí ʻoku fakahoko ʻeni koeʻuhí ka nau taufetongi ʻi hono fokotuʻu ha fakaʻilonga kulokula ʻi he tohi māhiná ke fakahaaʻi naʻe fai ʻa e lau folofolá he ʻaho ko iá. ʻOku pehē ʻe Sisitā ʻĀteni, “ ʻOku lava ke faʻu ʻa e ngaahi ʻulungāanga ʻoku leleí mei he fanga kiʻi meʻa iiki mo faingofuá.”
Kimuʻa ʻi hono uiuiʻi ʻo ʻEletā ʻĀteni ki he Kōlomu ʻUluaki ʻo e Kau Fitungofulú, naʻá ne hoko ko ha faifekau ʻi Falanisē mo Pelisiume, palesiteni ʻo e Kau Talavoú ʻi he siteikí, aleaʻanga māʻolunga, tokoni pīsope, pīsope, tokoni palesiteni fakasiteiki, palesiteni ʻo e Misiona Suva Fisí, mo e Fitungofulu Fakaʻēlia.
Ne maʻu ʻe ʻEletā ʻĀteni hono mataʻitohi BA mo MA ʻi he akó mei he ʻUnivēsiti ʻo Uaikató ʻi Nuʻu Sila. ʻOku kau ʻi heʻene ngaahi ngāue maʻuʻanga moʻui fakapalofesinalé ʻa e ngaahi tuʻunga lahi ʻi he Potungāue Ako ʻa e Siasí, kau ai ʻa e faiako, talēkita, kouʻotineita ʻo e seminelí ʻi Nuʻu Sila, pule ako ʻo e Kolisi ʻa e Siasí ʻi Nuʻu Silá, mo e Talēkita ʻo e ʻĒlia Pasifikí.