2011
Yog lub Pov Thawj Hwj Saib Xyuas thiab Yog Raws Li lub Pov Thawj Hwj tus Qauv
March 2011

Cov Mus Xyuas tom Tsev tsab Xov, Peb Hlis Ntuj 2011

Yog lub Pov Thawj Hwj Saib Xyuas thiab Yog Raws Li lub Pov Thawj Hwj tus Qauv

Ua tib zoo kawm tej ntaub ntawv no thiab, raws li qhov tsim nyog, nrog cov viv ncaus uas koj mus xyuas siab tham txog tej no. Siv cov lus nug kom pab ntxiv dag zog rau koj cov viv ncaus thiab kom thiaj nruab tau lub Koom Haum Niam Tsev tej kev coj ua rau hauv koj lub neej.

Daim Duab
Relief Society seal

Kev Ntseeg • Tsev Neeg • Kev Pab

Kuv cov viv ncaus, peb tau koob hmoov ntau nplua mias npaum li cas! Tsis yog peb yog mej zeej ntawm lub Koom Txoos nkaus xwb, tiam sis peb kuj yog mej zeej ntawm lub Koom Haum Niam Tsev thiab—“tus Tswv lub koom haum rau ib tsoom poj niam.”1 Lub Koom Haum Niam Tsev yog puav pheej hais tias Vajtswv hlub Nws cov ntxhais tiag.

Nej tej siab tej ntsws puas xyiv fab heev thaum nej xav txog lub koom haum no thaum chiv keeb? Thaum lub Peb Hlis Ntuj hnub tim 17, 1842, tus Yaj Saub Yauxej Xamiv txhim tsa pawg viv ncaus kom “yog lub pov thawj hwj saib xyuas thiab raws li lub pov thawj hwj tus qauv.”2

Txhim tsa kom “yog lub pov thawj hwj saib xyuas” muab txoj cai thiab ib lub ntsiab rau cov viv ncaus. Eliza R. Snow, lub Koom Haum Niam Tsev tus thawj tswj hwm thib ob, qhia hais tias lub Koom Haum Niam Tsev “yuav tsis muaj yog tias tsis muaj lub Pov Thawj Hwj, vim yog lub koom haum no txais tag nrho nws txoj cai thiab lus ntsiab los ntawm lub hauv paus ntawd los.”3 Txwj Laug Dallin H. Oaks ntawm Pawg Kaum Ob tug Thwj Tim piav hais tias, “Txoj cai uas cov nom tswv thiab cov kws qhia ntawm lub Koom Haum Niam Tsev … yog txoj cai uas lawv yuav muaj dhau los ntawm qhov uas lawv koom Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg thiab dhau los ntawm qhov uas cov thawj coj ntawm lub pov thawj uas tau hu lawv los ua tej hauj lwm no muab lawv txhua tus tsa ua tej hauj lwm no.”4

Txhim tsa kom “raws li lub pov thawj hwj tus qauv” muab hauj lwm dawb ceev rau cov viv ncaus. Julie B. Beck, lub Koom Haum Niam Tsev tus tuam thawj tswj hwm, piav hais tias: “Peb khiav peb tej hauj lwm no raws li lub pov thawj hwj tus qauv—uas txhais tau hais tias peb nrhiav kom tau, txais tau, thiab coj ua raws li qhov kev tshwm sim; ua ib pawg sab laj txiav txim siab txog ib yam dab tsi; thiab ua tib zoo saib xyuas txhua tus neeg ib leeg dhau ib leeg mus. Peb lub ntsiab pov thawj hwj yog kom npaj peb tus kheej kom thiaj txais tau tej koob hmoov ntawm lub neej nyob mus ib txhis dhau los ntawm txoj kev khi thiab ceev tej kev khi lus. Yog li ntawd, ib yam li peb cov nus uas tuav lub pov thawj hwj, peb txoj hauj lwm yog ib txoj kev cawm seej, pab lwm tus neeg, thiab rais los mus ib haiv neeg dawb huv.”5

Barbara Thompson, tus pab cuam thib ob hauv Koom Haum Niam Tsev pawg thawj tswj hwm.

Los ntawm cov Vaj Lug Kub

1 Kaulinthaus 11:11; Doctrine and Covenants 25:3; 121:36–46

Los ntawm Peb zaj Keeb Kwm

Thaum tseem tab tom ua lub Tuam Tsev Nauvoo, ib pawg viv ncaus txiav txim siab koom ua ke kom thiaj pab tej hauj lwm ua lub tuam tsev mus zoo dua. Eliza R. Snow sau tseg ib co kev cai tswj lub koom haum tshiab no. Thaum nws muab cov kev cai no rau tus Yaj Saub Yauxej saib, nws teb hais tias: “Hais rau koj cov viv ncaus hais tias tus Tswv twb pom zoo rau lawv qhov kev txi no, thiab nws tseem muaj ib yam zoo dua rau lawv thiab. … Kuv mam li txhim tsa ib lub koom haum niam tsev uas yog lub pov thawj hwj saib xyuas thiab yog raws li lub pov thawj hwj tus qauv.”6 Tsis ntev tom qab ntawd, tus Yaj Saub qhia lub Koom Haum Niam Tsev uas nyuam qhuav raug txhim tsa ntawd hais tias: “Nim no, tuav Vajtswv lub npe, kuv muab tus yawm sij rau nej, thiab lub Koom Haum no yuav zoo siab hom khaj, thiab kev txawj ntse thiab kev thoob tsib yuav ntws los saum ntuj los txij hnub no mus lawm tom ntej.”7 Tus Tswv tau xav kom cov viv ncaus no sawv los ua neeg dawb huv zog thiab npaj rau tej kab ke pov thawj hwj uas tsis ntev yuav saib xyuas thiab ua hauv lub tuam tsev.

© 2011 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/10. Pub txhais ua lus Hmoob: 6/10. Kev txhais Visiting Teaching Message, March 2011. Hmong. 09763 295

Lus Cim

  1. Spencer W. Kimball, “Relief Society—Its Promise and Potential,” Ensign, Peb Hlis Ntuj. 1976, 4.

  2. Joseph Smith, sau tseg hauv Sarah Granger Kimball, “Auto-biography,” Woman’s Exponent, Cuaj Hlis Ntuj. hnub tim 1, 1883, 51.

  3. Eliza R. Snow, “Female Relief Society,” Deseret News, Plaub Hlis Ntuj hnub tim 22, 1868, 81.

  4. Dallin H. Oaks, “The Relief Society and the Church,” Ensign, Tsib Hlis Ntuj 1992, 36.

  5. Julie B. Beck, “Relief Society: A Sacred Work,” Liahona, Kaum Ib Hlis Ntuj 2009, 111.

  6. Joseph Smith, sau tseg hauv Kimball, “Auto-biography,” 51.

  7. Teachings of Presidents of the Church: Joseph Smith (2007), 451.

Kuv Yuav Pab Li Cas?

  1. Kuv yuav tsum ua li cas kom thiaj pab cov viv ncaus uas kuv mus xyuas zoo siab txog tej koob hmoov uas muaj los vim yog lub Koom Haum Niam Tsev txoj hauj lwm dawb ceev?

  2. Kuv yuav ua dab tsi lub hli no kom thiaj ua rau kuv muaj peev xwm txais qhov kev tshwm sim rau kuv tus kheej zoo dua?