Thawj Pawg Thawj Tswj Hwm tsab Xov, Peb Hlis Ntuj 2011
Nrhiav Kom Tau qhov Zoo
Thaum nkawd tab tom nrhiav kom tau ib lub tsev tshiab, ib khub niam txiv uas yog Neeg Ntseeg hauv Hnub Nyoog Kawg tau nrog cov neeg uas yuav yog lawv cov neeg zej zog sib tham txog koog zej zog thiab cov tsev kawm ntawv nyob ib ncig ntawm cheeb tsam ntawd.
Muaj ib tug poj niam uas hais txog lub tsev kawm ntawv uas nws cov me nyuam mus kawm: “Nov yog ib qho chaw zoo kawg! Tus thawj saib tsev kawm ntawv yog ib tug txiv neej zoo kawg thiab siab zoo; cov xib hwb qhia ntawv kuj txawj ntawv, ua siab zoo, thiab ntxim nrog ua phooj ywg. Kuv zoo siab heev uas kuv tus txiv wb cov me nyuam mus kawm ntawv ntawm lub tsev kawm ntawv no tau. Koj yeej yuav nyiam nyob no tiag!”
Muaj dua ib tug poj niam uas hais txog nws cov me nyuam lub tsev kawm ntawv ntawd hais tias: “Twb yog ib qho chaw phem heev. Tus thawj saib tsev kawm ntawv xav txog nws tus kheej nkaus xwb; cov xib hwb qhia ntawv twb tsis paub dab tsi li, hais lus saib tsis tau lwm tus neeg, thiab tsis txawj ua siab zoo hlo li. Yog tias kuv muaj nyiaj txaus nyaib tawm ntawm cheeb tsam no, kuv mam li nyaib tawm mus sai li sai tau tiag!”
Qhov ntxim paub yog qhov uas hais tias ob tug poj niam hais txog tib tug thawj saib tsev kawm ntawv, tib co xib hwb qhia ntawv, thiab tib lub tsev kawm ntawv.
Nej puas tau pom tias tib neeg yeej los nrhiav tau tej yam uas lawv nrhiav kom tau? Yus yim nrhiav, yus yim nrhiav tau qhov zoo qhov phem hauv ib tug neeg twg los yog ib yam twg tiag. Tib neeg ua ib yam rau Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg txij thaum chiv keeb los. Cov neeg uas nrhiav kom tau qhov zoo txog peb yuav nrhiav tau ib co neeg uas ua siab zoo rau thiab khuv leej lwm tus neeg —ib haiv neeg uas hlub tus Tswv thiab muaj ib lub siab xav ua hauj lwm pab Nws thiab foom koob hmoov rau lwm tus neeg lub neej. Tiam sis kuj muaj tseeb hais tias cov neeg uas nrhiav kom tau qhov tsis zoo yuav nrhiav tau tej yam uas tsis phim qhov zoo tshaj.
Ntxim tu siab, feem ntau tej kev nrhiav kom tau qhov tsis zoo kuj muaj hauv lub Koom Txoos thiab. Cov neeg uas nrhiav kom tau tej yam uas lawv xav luag thuam thiab xyeej, lawv lub tswv yim xeem pheev xeem tawm kom thiaj ua tau li ntawd yeej tsis kawg hlo li. Lawv yeej tso tseg tsis tau lawv tej kev chawj chim hlo li. Lawv taug xaiv thiab liam lwm tus neeg txog ub no. Lawv tuav chawj chim kaum tawm xyoo, es nrhiav kom tau cib fim rhuav thiab luag thuam lwm tus neeg. Ua li no tsis haum tus Tswv lub siab, Nws hais tias, “qhov chaw uas muaj sib khib sib chim, ces qhov chaw ntawd muaj kev ntxhov siab thiab txhua yam kev phem” (Yaukaunpaus 3:16).
Thawj Tswj Hwm George Q. Cannon (1827–1901) tau paub Thawj Tswj Hwm Brigham Young (1801–77) zoo heev, tau nrog nws ua hauj lwm ntau xyoo, ua ib tug mej zeej ntawm Pawg Kaum Ob tug Thwj Tim thiab ua nws ib tug pab cuam hauv Thawj Pawg Thawj Tswj Hwm. Tom qab uas Thawj Tswj Hwm Young tas sim neej, Thawj Tswj Hwm Cannon sau tseg rau hauv nws phau ntawv ceev xwm txheej hais tias: “Yeej tsis muaj ib lub sij hawm twg uas kuv tau xyeej los yog lam tau lam liam txim hauv kuv nruab siab, los yog tej yam kuv hais los yog ua, rau [Brigham Young] tej kev coj cwj pwm. Qhov uas kuv yeej tsis tau ua li ntawd yog ib qho uas ua rau kuv zoo siab tam sim no. Kuv yeej los tau xav hais tias: Yog kuv xyeej los yog liam txim rau los yog txiav txim rau Tij Laug Brigham, kuv yuav ua li ntawd ntev li cas; yog tias kuv pib ua li ntawd, kuv yuav tso tseg thaum twg? Kuv tsis tso siab rau kuv tus kheej yog tias kuv taug txoj kev ntawd. Kuv paub hais tias feem ntau tib neeg thim txoj moo zoo vim lawv pib xyeej thiab luag thuam lub koom txoos thiab nws cov thawj coj. Lwm tus neeg, uas muaj zog, tswv yim, thiab paub thoob dua kuv, tej zaum lawv yuav ua tau ntau yam thiab dim tej kev phem uas kuv tsis muaj cuab kav ua.”1
Thawj Tswj Hwm Cannon cov lus qhuab ntuas no yog ib yam uas peb cov uas yog mej zeej hauv lub Koom Txoos yuav tsum ua tib zoo xav txog. Vajtswv txoj lus qhuab ntuas cov ntseeg Khetos kom “zoo kawg nkaus, … tsis ntau ncauj, paub cai, hais lus zoo, nrog luag ua phooj ywg, hlub lwm tus, muab siab rau ua hauj lwm zoo, tsis xaiv leej twg ntsej muag thiab tsis zais siab.” Rau lawv cov uas tsim kom tau kev thaj yeeb nyab xeeb, “lawv yuav pab tau sawv daws ua tau neeg ncaj ncees” (Yaukaunpaus 3:17, 18).
Peb muaj kev ywj siab xaiv. Thaum peb saib lwm tus neeg, peb nrhiav kom tau qhov tsis zoo los tau. Tsis li, ces peb tsim tau kev thaj yeeb nyab xeeb thiab ua hauj lwm tau kom sim to taub, ua ncaj ncees rau, thiab zam txim rau lwm tus neeg ib yam li peb xav kom lawv ua li ntawd rau peb. Twb yog peb txoj kev xaiv lawm; vim qhov uas peb nrhiav kom tau, qhov ntawd peb yeej yuav nrhiav tau tiag.
© 2011 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/10. Pub txhais ua lus Hmoob: 6/10. Kev txhais First Presidency Message, March 2011. Hmong. 09763 295
Qhia los ntawm tsab Xov No
“Tej zaum koj yuav xav hais tias koj tsis to taub zoo txog ib txoj ntsiab cai uas koj tab tom npaj yuav qhia,” Teaching, No Greater Call ([1999], 19) hais. “Txawm yog li ntawd los, thaum koj rau rau siab ke thov Vajtswv ke kawm txoj ntsiab cai ntawd, es sim ua neej raws li, thiab npaj qhia txog txoj ntsiab cai ntawd, thiab qhia txoj ntsiab cai ntawd rau lwm tus neeg, nej yuav ntxiv tau dag zog rau nej zaj lus tim khawv kom muaj zog thiab muaj tob dua.”
Thaum koj nrhiav kom tau qhov zoo hauv lub neej no thiab rau ntawm lwm tus neeg lub hli no, koj yuav haj yam npaj tau kom thiaj qhia tau tsab xov xwm no thiab ua tim khawv hais tias tsab xov xwm no muaj tseeb tiag.