Paghimo sa Templo nga Bahin sa Inyong Kinabuhi
Para sa Kabatan-onan
Bisan og kamo nangandam sa pagdawat sa umaabut ninyong mga ordinansa sa templo, ang templo makahimo og talagsaong impluwensya sa inyong kinabuhi karon.
Ang templo mao ang pinakasagradong dapit sa yuta—usa ka dapit diin ang yuta ug ang langit mag-abut ug diin kita mobati nga duol sa Langitnong Amahan ug ni Jesukristo. Bisan og kamo nangandam sa pagdawat sa inyong mga ordinansa sa templo sa umaabut, ang templo makahimo og talagsaong impluwensya sa inyong kinabuhi karon. Aniay pipila ka butang nga inyong buhaton sa paghimo sa templo nga usa ka bahin sa inyong kinabuhi samtang kamo batan-on pa.
Pag-apil sa mga Bunyag alang sa Patay
Ang takus nga batan-ong mga lalaki ug batan-ong mga babaye nga nag-edad og 12 ug pataas makaadto sa templo aron magpabunyag alang sa ilang mga katigulangan nga namatay nga wala mabunyagi. Si Presidente Thomas S. Monson namulong sa kalipay nga ikadalit niini nga pagserbisyo:
“Usa ka buntag niana samtang ako naglakaw ngadto sa templo, ako nakakita og pundok sa batan-ong mga babaye kinsa, sayo nianang buntaga, miapil sa mga bunyag alang niadtong kinsa namatay na. Ang ilang buhok basa. Ang ilang mga pahiyom midan-ag. Ang ilang mga kasingkasing napuno sa hingpit nga kalipay. Usa ka babaye miatubang pag-usab sa templo ug mipadayag sa iyang mga pagbati. ‘Kini mao ang labing malipayon nga adlaw sa akong kinabuhi,’ siya miingon.”1
Ang trese anyos nga si Jessica Hahn sa Daphne, Alabama, gibunyagan alang sa pipila sa iyang mga katigulangan didto sa Templo sa Atlanta Georgia. Bisan og mikabat og lima ka oras sa pagbiyahe padulong sa templo, miingon siya nga ang kasinatian talagsaon. “Ang pagsul-ob og putli nga puting sinina ug mabunyagan alang sa akong mga katigulangan naghatag kanako og talagsaong pagbati,” miingon siya. “Akong gibati nga ako nakaila na kanila karon.”
Adtoa ang templo kanunay kutob sa mahimo. Didto kamo makasinati sa kalipay sa pagtabang sa uban nga makadawat sa mga panalangin sa bunyag.
Pagsuporta sa Buluhaton sa Templo
Adunay daghang pamaagi sa pagsuporta sa buhat sa templo, bisan kon kamo dili makaadto sa templo kanunay sa inyong kaugalingon. Makakat-on kamo mahitungod sa inyong mga katigulangan ug sutaon kon ang mga ordinansa sa templo napahigayon na ba alang kanila. Makatanyag kamo sa pagbantay sa mga bata aron ang mga ginikanan makatambong sa templo. Tungod kay ang tulumanon sa templo nagpokus gayud sa mga pamilya, makalihok kamo sa paglig-on sa kaugalingon ninyong pamilya. Ug mahimo mopakigbahin kamo ngadto sa uban sa inyong pagpamatuod nga ang templo sa tinuod mao ang balay sa Ginoo.
Pagpakatakus sa Pagsulod sa Templo
Tungod kay ang templo ingon niana ka sagrado nga dapit, ang Ginoo mipahimutang og tag-as nga mga sumbanan nga atong sundon sa dili pa kita makasulod. Si Presidente Dieter F. Uchtdorf mipasabut nga “ang mga sumbanan nga gihatag sa Ginoo nga ang mga pangutana sa rekomend sa templo sama gayud sa mga sumbanan nga inyong mabasa diha sa Alang sa Kalig-on sa mga Kabatan-onan. Sa mga panahon sa kalinaw maingon man usab sa mga panahon sa dakong tintasyon, kini nga mga sumbanan ug ang paggiya sa Espiritu Santo motabang sa paghimo og hustong mga pagpili. … Kon sa unsa nga paagi gigamit ninyo kining mga sumbanan magbutyag mahitungod og kinsa kamo ug unsa ang buot mahinabo kaninyo.”2
Sunda ang mga sumbanan sa Ginoo, ug kamo mahimong takus sa pagsulod sa templo. Ang pagkaangkon og tinguha nga makasulod sa templo sa umaabut makatabang kaninyo sa pagpalayo sa mga tintasyon karon. “Naghatag kini kaninyo og rason sa pagpadayong takus,” miingon si Marlon Ruiz, edad 16, sa Sunrise, Florida. “Hangtud nga kamo aduna niana nga tumong, kanunay kamong maghunahuna mahitungod sa inyong buhaton tungod kay dili kamo makaadto sa templo kon kamo dili takus.”
Pagplano alang sa Kaminyoon sa Templo
“Akong nakita ang templo ug naghunahuna sa pagminyo didto sa umaabut,” miingon si Annika Reithmeier, edad 16, sa Oslo, Norway. “Nasayud ako nga ang mga saad nga imong himoon sa templo mga saad uban sa Ginoo. Ang mga butang nga imong makat-unan didto dili mausab o dili kay mawala lamang.”
Pagbutang og litrato sa templo sa pipila ka dapit diin kanunay kini nimong makita, ug maglantaw sa panahon nga ikaw makadawat sa kaugalingon nimong mga ordinansa sa templo.
Sa nag-edad pa siya og 14, si Jody Hazelbaker sa American Fork, Utah, mibisita sa Templo sa Mount Timpanogos Utah atol sa open house. “Sa dihang naglakaw ako padulong sa lawak alang sa pangasaw-unon, mihunong ako sa makadiyot ug mitutok sa samin,” siya miingon. “Samtang ako mitan-aw, akong nakita ang akong kaugalingon sa umaabut, nagsul-ob sa usa ka matahum nga wedding gown ug dako nga pahiyum. Nasayud ako nga mao kini ang dapit diin ako maminyo, sa templo, duol sa akong Langitnong Amahan.”