Atong Responsibilidad nga Mahimong Takus sa Pagsimba sa Templo

Tun-i kini nga materyal, ug kon angay hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.

Imahe

Relief Society seal

Hugot nga Pagtuo • Pamilya • Pag-alagad

Gikan sa mga Kasulatan

Isaias 2:2–3; D&P 109:22–23; 110:8–10

“Ang mga pakigsaad nga atong gihimo uban sa kaabag nga mga ordinansa nga atong madawat diha sa templo mahimo nga atong mga kalig-unan sa pagsulod ngadto sa presensya sa Dios. Kini nga mga pakigsaad motuboy kanato lapas sa mga kinutuban sa atong kaugalingong gahum ug panan-aw. Naghimo kita og mga pakigsaad aron pagpakita sa atong debosyon sa paglig-on sa gingharian. Mahimo kita nga mga katawhan sa pakigsaad tungod kay kita gibutang ubos sa pakigsaad ngadto sa Dios. Ang tanang gisaad nga panalangin maato pinaagi sa atong pagkamatinud-anon ngadto niini nga mga pakigsaad. …

“Unsay mabuhat sa kababayen-an sa Simbahan aron maangkon ang mga panalangin sa templo?

“Pinaagi sa Iyang mga propeta, ang Ginoo nagdapit niadtong kinsa wala pa makadawat sa mga panalangin sa templo sa pagbuhat sa bisan unsa nga gikinahanglan aron makadawat niini. Siya nagdapit niadtong kinsa nakadawat na sa mga panalangin sa pagbalik kanunay kutob sa mahimo aron pagtagamtam pag-usab sa kasinatian, sa pagdugang sa ilang panglantaw ug panabut sa Iyang mahangturong plano.

“Magpakatakus kita nga magbaton og bag-o nga rekomend sa templo. Mangadto kita sa templo aron bugkuson ang atong mga pamilya sa kahangturan. Mobalik kita sa templo kanunay kutob nga itugot sa atong mga kahimtang. Atong hatagan ang atong nangamatay nga mga kabanay og kahigayunan nga makadawat sa mga ordinansa alang sa kahimayaan. Atong tagamtamon ang espirituhanon nga kalig-on ug ang pagpadayag nga atong madawat sa atong pag-adto sa templo kanunay. Magpakamatinud-anon kita ug maghimo ug maghupot sa mga pakigsaad sa templo aron madawat ang kahingpitan sa mga panalangin sa Pag-ula.”¹

Silvia H. Allred, unang matatambag sa kinatibuk-ang kapangulohan sa Relief Society.

Gikan sa Atong Kasaysayan

Si Presidente Gordon B. Hinckley (1910–2008) nagtudlo nga ang Relief Society naggikan sa tinguha sa mga sister sa pagsimba sa mga templo:

“Panahon sa pagtukod sa Templo sa Kirtland ang mga babaye gitawag sa paggaling sa ilang pinggan ngadto sa gamay aron isagol sa plaster nga gamiton diha sa mga bong-bong sa templo, nga modakop sa hayag sa adlaw ug sa bulan ug sa pagdan-ag niana nga kahayag aron sa pagpanindot sa panagway sa building.

“Niadtong mga panahona, diin adunay gamay kaayo nga kwarta apan puno sa hugot nga pagtuo, ang mga trabahador mihatag sa ilang kusog ug mga kapanguhaan sa pagtukod sa balay sa Ginoo. Ang mga babaye mihatag kanila og pagkaon, ang labing maayo nga ilang maandam. Edward W. Tullidge mireport nga samtang ang mga babaye nagtahi sa mga tabil sa templo, si Joseph Smith, nag-obserbar kanila, miingon, ‘Nan, mga sister, naa gyud mo pirmi. Ang mga sister gyud ang pirming una ug mag-una sa tanang maayong buhat. Si Maria mao ang una didto sa lubnganan aron motan-aw sa nabanhaw nga Ginoo; ug ang mga sister karon maoy una nga motrabaho sa sulod sa templo.’ …

“Usab sa Nauvoo, sa dihang ang templo gipadayon pa sa pagtukod, pipila ka mga babaye ang nagkahiusa sa paghimo og mga isusul-ob sa mga trabahante. Tungod niini nga hitabo nga ang baynte kanila nagtapok niadtong Huwebes, 17 sa Marso 1842, sa lawak sa ibabaw sa tindahan sa Propeta.”²

Unsa ang Atong Mabuhat?

Unsa nga suporta ang matanyag nako sa pagtabang sa akong mga sister sa pagpangandam ug pagtambong sa templo?
Unsaon nako sa pagpakita og ehemplo sa panulundon sa una nga mga sister kinsa misakripisyo sa pagdawat sa mga panalangin sa templo?
Unsaon nako sa pag-angkon sa mga panalangin sa templo?

Sa tuo: litrato sa Templo sa Oquirrh Mountain Utah pinaagi ni Christina Smith