Pinaagi sa Gagmay ug Yano nga mga Pamaagi
Sa dihang maghunahuna ako kabahin sa akong mga kasinatian sa pagkabatan-on, maghunahuna ako sa panagtigum sa daghang gagmay ug yano nga mga butang nga nakalig-on sa akong pagpamatuod (tan-awa sa Alma 37:6–7). Ang ward sa akong pagkabatan-on ingon og dako nga pamilya. Kon kami adunay panihapon sa ward, ang tanan motunga. Sa bisan unsa nga panahon nga ang Relief Society adunay bazaar o ang Primary adunay parada, ang tanan motunga. Ang among ward mao ang among sosyal nga kinabuhi.
Naghinumdom pagbalik sa akong unang road show sa ward, tataw akong nakahinumdom sa sayo sa buntag nga mga praktis, sa mga pag-ampo, sa pag-istoryahanay sa uban samtang kami nagpaabut sa pasundayag sa among bahin, ug sa panaghugoy [camaraderie] nga among gibati samtang kami namintal og talan-awon, nagpraktis, ug dungan nga nagkat-on. Kini ang mga panahon nga ako nakakita sa unsang paagi nga ang ebanghelyo mitabang sa tinuod nga mga kinabuhi sa tinuod nga mga tawo. Nakita nako giunsa sa akong mga adviser pagdala sa mga problema, giunsa sa mga lider paglihok ubos sa kalisud [pressure], giunsa sa mga magtiayon pagpakig-uyon-uyon sa usag usa, ug naghimo ako og hilom nga mga desisyon kabahin sa pagsunod sa mga baruganan nga gitudlo kanako pagka-Dominggo. Mibati ako sa Espiritu samtang kami nag-ampo alang sa mga milagro, sama sa paghinumdom sa among mga bahin o sa panglawas sa usa sa mga batan-on.
Wala na ako makahinumdom sa akong mga linya niana nga road show, ni makahinumdom sa uban pang mga partikular. Apan ako nakahinumdom unsa ang akong gibati samtang ako nagpasundayag ug samtang ako nagtan-aw sa mga nawong sa akong kauban nga mga miyembro sa ward ug nakakita sa ilang suporta ug mibati sa ilang gugma.