Laugatasia le Aoga

A o fuafuaina ma faatinoina e taitai ma le autalavou a latou gaoioiga, e mafai ona latou fesoasoani e fatufatuina ni mea e manatua—ma molimau—lea latou te tauaveina atu i le faavavau.

O le a le tatou mea e fai i lenei vaiaso?” atonu o se fesili e faafofoga soo lava i ai taitai—ma atonu e oo ai le popole—a o tatou taumafai e fesoasoani i le autalavou e fuafua ma faatinoina ni gaoioiga anoa i Mutuale. Ma e ui ina tatou iloa soo le tali o lena fesili, atonu e faigata atu se fesili faapea “O le a le mea o le a tatou ausiaina i le faataunuuina o le mea o loo faia i lenei vaiaso?”

Talu ai nei, a o saunoa atu i taitai o le autalavou, na fautua atu Peresitene Thomas S. Monson, faapea “o le tiutetauave autu o le fesoasoani atu i le autalavou e filifili le mea sa’o pe a latou feagai ma se filifiliga, o se mea taua e pei o se tulafono i le asō e pei ona sa i ai lava.”

“Tuu atu ia i latou ni mea e manatua e tauave atu i le faavavau,” o lana saunoaga lea, “ma o le a faamanuiaina lou igoa e le Alii.” Na Ia toe saunoa mai, e pei ona masani ai, e musuia e le Alii i latou o e Na te valaauina.¹

Sa valaaulia e le Liahona nisi o taitai o le Ekalesia e tomanatu i se Mutuale taua po o nisi gaoioiga a le autalavou ma faasoa mai mea na faataunuuina ai mo i latou. Atonu o le a maua e taitai o aso nei se faamafanafanaga i nei aafiaga, i le mautinoaina lea o a latou taumafaiga tuuto o le a fesoasoani e fausiaina ni mea taua e manatua—ma molimau e faavavau.

O le a le Mutuale?

E tatau ona i ai gaoioiga faatulagaina masani e ta’ua o le Mutuale mo alii ma tamaitai talavou. O le upu Mutuale e fautua mai ai ni aafiaga fetufaai lea e i ai le fefaaaloaloai ma le felagolagomai o le tasi i le isi. O gaoioiga a le Mutuale e tatau ona tuuina atu ai i le autalavou ni avanoa eseese e auauna atu ai i isi ma atiina ae ai faaleagaga, agafesootai, faaletino, ma le faaleatamai.

O le Mutuale e fai i se aso po o se afiafi e ese mai le Aso Sa po o le Aso Gafua. E masani lava ona ta’itasi i le vaiaso ona faataunuuina ae e mafai ona faaitiitia pe a manatu taitai perisitua faapea o femalagaaiga, punaoa, po o isi tulaga e ono lē mafaia ai ona faia faalevaiaso.

O le au peresitene o Alii ma Tamaitai Talavou i totonu o le uarota po o le paranesi e vaaia le Mutuale, i lalo o le taitaiga a le au epikopo po o le au peresitene o le paranesi.

Mo nisi faamatalaga, alu i le LDS.org ma kiliki i le “Serving in the Church.”

Ata na tusia e Christina Smith ma Craig Dimond