iVaqa ni Siko Vuvale, June 2010
Vakavoutaki ni Veiyalayalati ena Sakaramede
Vakavuvulitaka na ivolanikalou kei na vosacavuti oqo se, kevaka e gadrevi, e dua tale na ivakavuvuli ka na vakalougatataki ira na marama o dau sikova.Wasea na nomu ivakadinadina me baleta na ivunau. Sureti ira ko sa sikova me ra wasea mai na veika era sa vakila ka vulica.
A Tekivutaka o Jisu Karisito na Sakaramede
“Sa taura na madrai ko Jisu, ia ni sa lotutaka oti, sa dovia, ka solia vei ira na tisaipeli, ka kaya, ‘Taura, kania’ (Maciu 26:26). ‘Oqo na yagoqu sa soli ena vukumudou: dou cakava oqo mo dou vakananumi au kina’ (Luke 22:19). Sa vakakina na nona taura na bilo waini, sa dau waki vata kei na wai, sa vakavinavinakataka, ka solia yani vei ira era sa tiko vata kaya, ka kaya: ‘Oqo na noqu dra ni veiyalayalati vou,’ ‘sa liviraki … me bokoci na ivalavala ca.’ ‘Dou cakava oqo mo dou vakananumi au kina.’ …
“Vakatekivu mai na ka a yaco ena taba ni vale e cake ni vakarau na ilakolako i Kecisemani kei Kolikoca, era sa kovuti tu na luve ni veiyalayalati me ra dau nanuma na solibula nei Karisito ena ivakarau vou, cecere cake, sa vakalou sara, ka, ka ni tamata yadudua.”1
Elder Jeffrey R. Holland ena Kuoramu ni iApositolo Le Tinikarua.
Eda Vakavoutaka na Noda Veiyalayalati ni Papitaiso ena Sakaramede
“Ena gauna eda sa papitaiso kina, eda sa vakatikora vei keda na yaca tabu i Jisu Karisito. Na noda taura na Yacana me noda sa dua na cakacaka bula bibi eda sa vakayacora ena bula oqo. …
“Ena veimacawa ena soqoni ni sakaramede eda yalataka kina me da nanuma tiko na isoro ni veivakaduavatataki ni noda iVakabula ni da vakavoutaka na noda veiyalayalati ni papitaiso. Eda yalataka kina me da vakamuria na iVakabula—o ya me da talairawarawa vua na Tamada ka dau maroroya tikoga na Nona ivunau. Na veivakalougatataki eda na ciqoma kina sa ikoya me na dau tiko vata ga kei keda na Nona Yalotabu.”2
Elder Robert D. Hales ena Kuoramu ni iApositolo Le Tinikarua.
“Au a tiko vata kei na dua na goneyalewa yabaki walu ena nona papitaiso. Ni sa oti a kaya mai o koya ena yalodei, ‘E taura e dua na siga taucoko na noqu papitaiso, kau se bera ni ivalavala ca mada!’ Ia na nona siga talei o ya a sega ni balavu, kau vakabauta ni sa vuli tiko mai kina oqo o koya, me vakataka ga ni da na vuli taucoko, ena noda saga vakaukauwa mada ga, eda na dau sega ni levea rawa na veika ca kece sara, na digidigi cala yadudua. …
“… E sega ni rawa meda veisautaki keda vakaidina vakai keda ga. E sega ni veirauti na noda lewa e loma kei na noda inaki vinaka. Ni da caka cala se digidigi vakatani, eda na gadreva na veivuke ni iVakabula me da lesu tale ki na salatu dodonu. Eda na vakaivotavota ena sakaramede ena veimacawa me da vakaraitaka kina na noda vakabauta tiko na Nona kaukauwa me veisautaki keda. Eda na vakatusa na noda ivalavala ca ka yalataka me da biuta laivi.”3
Julie B. Beck, peresitedi raraba ni iSoqosoqo ni Veivukei.
© 2010 mai na Intellectual Reserve, Inc. Dodonu kece e taqomaki. Tabaki e Amerika.Vakadonui me Vakavalagi: 6/09. Vakadonui me vakadewa: 6/09. iVakadewa ni Visiting Teaching Message, June 2010. Fijian. 09366 858