iTukutuku ni Mataveiliutaki Taumada, June 2010
O Iratou na Kula E sa Sika na Tabadratou
E voleka ni 60 na yabaki sa oti, niu a se qai bisopi vou, a takali kina e dua na yada ena noqu tabanalevu, o Kathleen McKee. Na veika e taukena e wili kina e tolu na kula ni vale. E rua, e rau dromodromo, ka me na soli vei ira na nona itokani eso. Na kena ikatolu, o Billie, e dromodromo talega ka sa sika toka na tabana. Ena dua na ivola a vola toka vakaoqo vei au o Sister McKee: “Au kerea mo dou qai tauri ka oqo me nomudou? E sega ni rairai vinaka, ia e totoka na domona.”
Na bula nei Sister McKee sa vakataka na nona kula dromo oqo e sa sika na tabana. A sega ni totoka na kena irairai, tuvaki donu, se me dokai ena nona vakakawa. Ia na domo ni nona sere e vukei ira na tamata me ra colata vakayaloqaqa na nodra icolacola ka cuqena vakaukauwa na nodra cakacaka.
Sa sinai tu o vuravura mai vei ira na kula dromodromo e sa sika na tabadra. E ka ni rarawa ni vica wale vei ira na isakisaki vakaoqo era kila na lagasere. Eso vei ira era itabagone era sega ni kila tiko ni ra kilai ira vakaiira, na cava me ra yacova se me ra tamata vakacava; era gadreva ga me ra dua ga na tamata. Eso era sa vakalairoro ni ra sa qase, era vakaicolacola, se vakasinaiti ena lomatarotaro—ka bula voli ena dua na ivakatagedegede e lolovira mai na kena e rawa ni ra yacova.
Me da bula cecere, e dodonu me da tara cake na kaukauwa me da sotava na leqa ena yaloqaqa, ena rarawa ena mamarau, kei na qaqa ena yalomalumalumu. O ni na taroga, “Eda na rawata beka vakacava na inakinaki kece oqo?” Meu sauma, “Ena noda kilai keda dina vakai keda!” Eda luvena tagane kei na yalewa na Kalou sa bula tiko, na kena ivatuka eda sa buli kina. Vakasamataka mada o ya: eda sa ucuya na ibulibuli ni Kalou. Eda na sega ni rawa ni kila deivaki na ka oqo kevaka eda na sega ni bula voli ena dua na kaukauwa kei na qaqa vou.
Ena vuravura oqo, sa vaka me vakaliuci tiko na keda totoka se matavinaka ka sega na keda irairai vakayalo. Ia e voqa kina na ivakasala ni Turaga ena gauna makawa vei parofita Samuela: “Ni sa sega ni raica ko Jiova me vaka sa raica ko ira na tamata; ni sa raica na ka e sau ko ira na tamata, ia sa raica na yalo ko Jiova” (1 Samuela 16:7).
Ni gauna e vakasaqara kina na iVakabula e dua na tamata vakabauta, a sega ni digidigi mai vei ira era sa vakadonui ira vakai ira era dau kune vakalevu e valenilotu. Ia, a digitaki koya mai vei ira na gonedau e Kapenaumi. Ena nona lomatarotaro, sega ni vuli, a saumaki vakatotolo o Saimoni me ko Pita, na iApositolo e vakabauta. Sa yaco e dua na kula dromodromo e sa sika na tabana me laurai ni sa kilikili me sa nuitaki ka lomani vakavinaka mai vua na iVakavuvuli.
Ena gauna sa digitaka kina na iVakabula e dua na daukaulotu e maqusa sara ka kaukauwa, a sega ni raici koya mai na kedra maliwa era sa Nona ia mai vei ira era Nona meca. A vuki o Saula na dauveivakacacani me ko Paula na daukaulotu.
E digitaki ira na tamata bula tawa kilikili na Dauveivueti me ra vakavulica na sala ki na bula sa uasivi sara. A vakayacora vakakina ena gauna ko ya. E vakayacora tiko vakakina ena gauna oqo—sa vakakina vei ira na kula dromodromo e sa sika na tabadra. Sa kacivi iko kei au me daru qaravi Koya eke. Me taucoko na nodaru yalodina. Ena nodaru sasaga, kevaka me daru na bale, me daru qai kerea: “Ni liutaki keimami, mo ni liutaki keimami, na Kalou cecere dauveibuli, mai na vanua butobuto me keimami tucake tale yani.”1
Sa noqu masu ni da na vakayacora na veika a cakava na Kai Kalili, sa dau kune ena kedra maliwa na dravudravua, na malumalumu, na tabakisobu, kei ira sa vakararawataki. Me da lagata e dua na sere dina mai lomada ni da vakayacora vakakina.
© 2010 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/09. Vakadonui me vakadewa: 6/09. iVakadewa ni First Presidency Message, June 2010. Fijian. 09366 858